~SUN~ Pictures, Images and Photos

الثلاثاء، 25 نوفمبر 2008

حسن و مرقص أتظبطوا فى الحجز ..


سؤال محيرنى و مش لاقى له أى اٍجابه من فتره كده يعنى ..
دلوقتى السؤال أصبح سؤالين بعد الاٍحداث المؤسفه المخجله اللى حصلت بالأمس فى عين شمس بين المسلمين و المسيحيين من سكان المنطقه !!
سيبكم من السؤال الأول دلوقتى .. خلينا فى السؤال التانى :
- ببساطه كده يعنى هو أيه اللى يزعل المسلمين من أن الأقباط يتجمعوا 100 و لا 200 و لا حتى ميت ألف و يصلوا فى مبنى خدمات تابع لكنيستهم قيل أنه كان أصلا مصنع لبسه و فانلات ؟
يعنى أيه اللى يهيج الدنيا على المسيحين اللى بيقيموا صلاتهم فى أى مكان سواء كان هذا المكان حاصل على ترخيص لأقامة الصلوات أو مش حاصل على هذا الترخيص (يعنى أيه ترخيص لاٍقامة الصلاه أصلا ؟؟؟!!!!) ..
يعنى بجد أيه اللى يزعل المسلمين من كده ؟
حد يفهمنى يا جماعه يمكن أنا مش فاهم ..
أنا مسلم و لله الحمد و لا عمرى زعلت أن مسيحى بيصلى و لا أن مسلم مش بيصلى لأن الأتنين حسابهم على اللى خلقهم سبحانه علام الغيوب ..
عايز أسأل هل كل المسلمين فعلا بيزعلوا لما المسيحيين بيتلموا فى الكنيسه و لا فى أى حته و يصلوا ؟
عايز أسأل كمان المسيحيين هل بتزعلوا يا مسيحيين لما بتلاقوا المسلمين بيصلوا 5 مرات فى المساجد و يوم الجمعه بنقفل المرور فى الشوارع و بنفرش علشان نصلى ؟
بصراحه ما أفتكرش أن المسلمين بيزعلوا لما المسيحيين يصلوا لأن ربنا أوصى بيهم و لأنهم أقرب للمسلمين موده بالنص القرآنى الصحيح .. و كمان الرسول عليه الصلاة و السلام .. زيدوه صلاه .. اللهم صلى عليك يا نبى تزوج منهم و أنجب ولد و أوصى هو و التابعون بالحفاظ على الكنائس و الأديره و البيع فى البلاد المفتوحه ..
و لا أعتقد برضو أن المسيحيين يزعلوا لما المسلمين يصلوا فى أى مكان يشاؤوا .. و لا فيه حد بيزعل من الطرفين ؟ قولوا بصراحه علشان ماتبقاش النفوس شايله و ملتهبه و على شعره ..
طيب لما هو كده يبقى مين اللى يوافق على ما يحدث و ما شاهدناه بالأمس من هتافات صبيانيه زى : مش عاوزين كنيسه مش عاوزين كنيسه !!
و ما تلبث أن تلتهب المشاعر لدى المتجمعين فيبدأون فى تبادل الطوب و الزجاجات الفاضيه و يتعور من دول و يتعور من دول و يتدخل الأمن لفرض النظام و يجرجر دول و دول على القسم و أنتم بقى عارفين الباقى ههههههه
يا ناس عيب عليكم .. يا عالم عيب شغل العيال اللى بينتهى بكارثه لا يدفع فاتورتها غير الوطن و غير أبناء الوطن .. و لا تعود بالخير اٍلا على المتربصين بمصر و أبناء مصر .. يعنى مطلوب شوية عقل من الطرفين لأن فى النهايه المصالح مشتركه و الهموم مشتركه .. و الحيطه لازقه فى الحيطه .. و جارى المسيحى أقرب لى من أبن عمى اللى ساكن فى مدينة نصر .. و جارك المسلم أقرب لك من أخوك اللى فى شبرا .. ربنا يهديكم يا يا خدكم و يريح البلد من عكننتكم ..
شايفك ياض يا مايكل يا اللى حاتحدف طوبه على اللى بيصلوا الجمعه من فوق السطح يا وله !!

هناك 14 تعليقًا:

TAFATEFO يقول...

يعنى مطلوب شوية عقل من الطرفين

يعني هو لو في عقل كان ده حصل أصلاً ؟؟!! ازاي تطالب الغبي بالتعقل؟؟؟!!!

عمرو يقول...

TAFATEFO
أهى محاوله يا مصطفى مجرد محاوله ..
أصل لو ما عقلوش من نفسهم حيتحطوا فى مواقف بايخخخخخخه أوى

Empress appy يقول...

عمرو مش كل الشعب كده فيه ناس عاقله متعممش تصرق واحد مجنون
ده مختل

عمرو يقول...

appy
لأ طبعا مش بأعمم
لكن المختلين كتروا أوى أوى اليومين دول و بقوا خطر على العاقلين لأنهم بيهددوا أمنهم و اٍستقرار مصالحهم ..
لأ مش بأعمم يا آبلى ..

مفكر يقول...

السلام عليكم::

يا سلاااااااااام

منور مدونتك من جديد

طبعاً كلامك كله سليم،،،الفتنة أضد من القتل،،،يا رب نبطل تقفيل مخ،،،

مفكر

رئيس جمهوريه نفسى يقول...

يا عمرو الفكرة فى فرق تسد ناس مش عايز غير المسلمين والنصارى وقفين على خط النار علشان يتلهو بكدة ويبطلوا يبصوا لمشاكلهم اليومية والقهر اللى هما الاتنين فية
وبعدين التجارة فى الدين وكل واحد يزايد على الدين وكانى النصارى لما يبقى ليهم كنيسة ولا المسلمين حيبقى ليهم جامع تانى حيبقى ليهم جامع زيادة الدين التانى حيبقى فى خطر

daktara يقول...

فعلا موضوعك جميل وتناولك وطرحك للقضية حلو وسلس
الفكرة نفسها كويسة
المفروض ان محدش يزعل لما يلاقي التاني بيصلي
طب ما احنا بنشوف الموظفين في قلب المصلحة الحكومية وبيصلوا وفي الشارع وفي كل مكان يبقي احنا كمان منزعلش لما نلاقي حد مسيحي بيصلي في غير الكنيسة
تحياتي علي المدونة اللذيذة والصغيرة برضه

انظر حولك
د. خالد عزب

daktara يقول...

تم حفظ تعليقاتك وستكون معروضة بعد موافقة مالك المدونة الإلكترونية

اغبي شيء ممكن اشوفه في مدونة
لما انت لاتعطي الحق للأخر في ابداء رأيه بحريه يبقي بتكتب ليه
ارجو الغي هذه الخاصية
ولا تتحجج بعبارات او تعليقات انت غير راضي عنها اخلاقيا مثلا,لأنه عذر اقبح من زنب

انظر حولك
د. خالد عزب

Ahmed Mohamed يقول...

تفسر بأيه وجود امام كل كنيسه مسجد عملاق دا حتي لو مفيش مسجد في مكان في كنيسه لازم يتبني مسجد اكبر من الكنيسه
طبعا مش عشان نسمع صوت التكبير مع جرس الكنيسه دليل علي الوحده الوطنيه
مين الي قرر يبني مسجد رغم وجود مية مسجد في البلده وايه السر من كده

عمرو يقول...

مفكر
منوره بيك يا صديقى .. حنعمل أيه بقى من فات قديمه تاه
بس برضو مش عارف أرجع البوستات القديمه أبدا !!

عمرو يقول...

رئيس جمهورية نفسى
جبت المفيد يا ميتر و الله
فرق تسد
الموضوع فى رأيى أنه شغل مصالح لأعداء البلد و بيستغلوا ضيق عقل الطرفين لخدمة مصالحهم
حاجه تحزن

عمرو يقول...

daktara
فكرة التعايش مع الآخر لو غرست فى النفس و كبرت مع الشخص مش حنشوف بعد كده اللى بيحصل دلوقتى
لكن لما تلاقى الكبار بيضحكوا لما يشوفوا عيالهم عاملين فريق المسلمين و بيلاعبوا فريق المسيحيين كوره يبقى ده التخلف العقلى بعينه
أشكرك للمرور و ده رابط المدونه الأصلى اللى كانت موجوده هنا قبل ما بلوجر يقفلها و الحمد لله أنى كنت ناقل نسخه .. حأبقى سعيد لو زرتها برضو
http://amrbadr.wordpress.com/
بالنسبه لوضع المودريشن على التعليقات هو فى الحقيقه مش أغبى حاجه زى ما أنت بتقول و لكنه فىالحقيقه حمايه للمدونه من الأغبياء اللى بيوضعوا تعليقات لا تليق خاصة أن فيه نسبه كبيره من البنات بيزوروا المدونه و لا يجوز خدش حيائهم بهذا الشكل مش علشان التحكم فى تعليقات القراء اللى بيخالفونى الرأى ..

عمرو يقول...

أحمد علام
ما هى الاٍباحه أصل الأمور
لا مشكله أبدا أن تكتر المساجد و تكتر الكنائس كل ده كويس
لكن بشرط أن تكون مبنيه أصلا بغرض العباده و بغرض خدمة الأهالى فى مختلف النواحى الحياتيه لكن أن تكون بغرض المباهاه و المكايده فده الخطأ بعينه

غير معرف يقول...

...........سَمِعْتُمْ أَنَّهُ قِيلَ: عَيْنٌ بِعَيْنٍ وَسِنٌّ بِسِنٍّ. وَأَمَّا أَنَا فَأَقُولُ لَكُمْ: لاَ تُقَاوِمُوا الشَّرَّ بَلْ مَنْ لَطَمَكَ عَلَى خَدِّكَ الأَيْمَنِ فَحَوِّلْ لَهُ الآخَرَ أَيْضاً. وَمَنْ أَرَادَ أَنْ يُخَاصِمَكَ وَيَأْخُذَ ثَوْبَكَ فَاتْرُكْ لَهُ الرِّدَاءَ أَيْضاً. وَمَنْ سَخَّرَكَ مِيلاً وَاحِداً فَاذْهَبْ مَعَهُ اثْنَيْنِ. مَنْ سَأَلَكَ فَأَعْطِهِ وَمَنْ أَرَادَ أَنْ يَقْتَرِضَ مِنْكَ فَلاَ تَرُدَّهُ. «سَمِعْتُمْ أَنَّهُ قِيلَ: تُحِبُّ قَرِيبَكَ وَتُبْغِضُ عَدُوَّكَ. وَأَمَّا أَنَا فَأَقُولُ لَكُمْ: أَحِبُّوا أَعْدَاءَكُمْ. بَارِكُوا لاَعِنِيكُمْ. أَحْسِنُوا إِلَى مُبْغِضِيكُمْ وَصَلُّوا لأَجْلِ الَّذِينَ يُسِيئُونَ إِلَيْكُمْ وَيَطْرُدُونَكُمْ لِكَيْ تَكُونُوا أَبْنَاءَ أَبِيكُمُ الَّذِي فِي السَّمَاوَاتِ فَإِنَّهُ يُشْرِقُ شَمْسَهُ عَلَى الأَشْرَارِ وَالصَّالِحِينَ وَيُمْطِرُ عَلَى الأَبْرَارِ وَالظَّالِمِينَ. لأَنَّهُ إِنْ أَحْبَبْتُمُ الَّذِينَ يُحِبُّونَكُمْ فَأَيُّ أَجْرٍ لَكُمْ؟ أَلَيْسَ الْعَشَّارُونَ أَيْضاً يَفْعَلُونَ ذَلِكَ؟ وَإِنْ سَلَّمْتُمْ عَلَى إِخْوَتِكُمْ فَقَطْ فَأَيَّ فَضْلٍ تَصْنَعُونَ؟ أَلَيْسَ الْعَشَّارُونَ أَيْضاً يَفْعَلُونَ هَكَذَا؟ فَكُونُوا أَنْتُمْ كَامِلِينَ كَمَا أَنَّ أَبَاكُمُ الَّذِي فِي السَّمَاوَاتِ هُوَ كَامِلٌ. متى 5