من العيساويه أحييكم ..

مساء الخير أعزائى المدونات و المدونين ..

أعتذر لأنقطاعى المفاجىء عنكم و ذلك لظروف سفرى اللى بدأ من أول اٍمبارح و تطلب منى شوية تركيز قبل السفر لزوم ترتيبات الرحله و اللى نويت و النيه على الله أن أسجلها فى مجموعة بوستات و كلى أمل أن تنال اٍعجابكم ..

بصوا يا ساده يا كرام ..

أنا فى هذه اللحظات مقيم اٍقامه كامله فوق سطح النيل على ظهر الفندق العائم المهيب الرهيب سوبك بدعوه كريمه من أسرة اٍنتاج مسلسل الرحايه متمثل فى كبير عائلة الجابريه الحاج محمد الجابرى و اللى بتدور أحداثه فى أقصى صعيد مصر .. و حاليا يرسو هذا الفندق الأعجوبه و على ظهره أسرة العمل بالكامل من فنانين و فنيين و اٍداريين أمام قرية العيساويه على مسافة ساعه بالفندق العائم على سطح النيل جنوب أخميم بمحافظة سوهاج الساحره حيث غادرناها أول اٍمبارح ظهرا ..

مشهد النيل الساحر و جلاله و حيويته المتجانسه تماما مع مهابة الجبل على الضفه الشرقيه فى هذه البقعه من أرض الوطن شىء فوق مستوى التصور و تعجز الكلمات عن وصفه و هو هنا يختلف تمام الاٍختلاف عن نيل القاهره و وجه بحرى و الحقيقه أنا مبهور و مسحور بكل هذا الجمال اللى بيحيط بى من جميع النواحى !!

تابعونا فى البوستات القادمه تجدوا ما يدهشكم !! و ما يسركم :)

فدادين خمسه .. خمس فدادين :)

بسم الله ماشاء الله ..

اللهم صلى على حضرة سيدنا النبى عليه الصلاة و السلام ..

الحمد لك يا رب ألف حمد و ألف شكر :)

الزرعه نجحت يا ولاد .. شجر البرتقال البلدى و أبو صره اللى زرعته الشتويه اللى فاتت فى وسط الصحراء القاحله المخيفه نجح .. و رعرع و زهر :)

شايفين الزهور البيضا الصغنونه اللى بتزين فروعه الرقيقه دى ؟ أهى هى دى بقى زهر البرتقال اللى لما يفتح فى الوقت ده يقوم الأفلاحوكش مننا قلبه كمان يزهزه و يزهر و تبقى فرحة الدنيا مش سايعاه و يحس بالفخر أكمنه قدر بفضل المولى يعدى بالزرعه برد الشتاء القارص فى الصحراء و زعابيب أمشير اللى الود ودها تسقط الزهره دى من قبل ما تفتح مكايده فى الفلاح اللى لو مش صاحي لها و واعى لكيدها يبات سنته حزين و قلبه مكسور حزنا و كمدا على ضياع مجهود السنه بالكامل ..

أنا بقى بجد فرحان و منشكح آخر حاجه .. و فرحتى لا تقل طبعا عن فرحة النحل اللى ما أعرفش عرف منين سكة زهور برتقالى و هجم عليه أسرابا و أسرابا و هاتك يا هبر فى رحيق الزهور العبقريه علشان يخرج من بطونه عسل نمره واحد مافيش بعد كده و منتجى عسل النحل طبعا بيفخروا بعسل اٍنتاج زهر الموالح .. و ماله خللى الناس كلها تكسب و ترزق بالحلال و أهو ملك و مدبره سيدكم :)

بس طبعا حتما و لزما يبقى فيه عكيره كده تنغز الفرحه شويتين .. ما هى الدنيا كده ما بتديش الفرحه كامله لحكمه لا يعلمها غير الله ..

النغيزه بقى اللى ضايقتنى هى أن كل زرعات جيرانى من موالح و فواكه للأسف الشديد ما نجحتش .. و لا شجره واحده زهرت و لا حول و لا قوة اٍلا بالله .. لييييييييه ؟؟!!

لأن ربنا سبحانه و تعالى أدالنا عقل نفكر بيه و أدالنا فرصه أننا نستفيد من نصائح الآخرين أصحاب الخبره و المعرفه .. و لكن لعظيم الأسف البعض أستبدل العقل بربع كيلو بسطرمه و البعض أقتنع مش عارف ليه أن المثل اللى بيقول عدوك أبن كارك هو مثل صحيح و طبقوه فى حياتهم فأصابتهم الخيبه القويه و فشلوا فشلا ذريعا مريعا ..

اٍزاى ؟؟

لأنى ببساطه خلصت ضميرى قدام ربنا و نصحت جيرانى الأفنديه بعدم تسميد الأرض بالسباخ - عملا بنصيحة فلاحينهم اللى كانوا مربطين مع تجار السباخ - فى مثل هذا الجو السخن لأن ده حينشف الجذور بسبب الحراره المرتفعه للسباخ ذات نفسه و للتربه اللى أصلا بتعانى من قلة المياه .. و يكفى جدا التسميد بشوية يوريا بتاع شركة أبو قير للأسمده علشان التسميد الجذرى و رشة كلامنتوس يونانى علشان التسميد الورقى و كان الله بالسر عليم ..

بس للأسف كلهم رفضوا نصيحتى .. و أعتقدوا أنى عاوز أخرب لهم الزرعه أكمنى أبن كارهم :))

و الحقيقه أن العيب فى الزمن العبثى اللى خلا الناس ماعندهاش ثقه فى بعضهم و خلاهم يفتكروا أن كل نصيحه لوجه المولى ما هى اٍلا مكيده يراد بها سوء .. و لعلهم تعلموا الدرس ..

بسم الله ما شاء الله ..

اللهم صلى على حضرة سيدنا النبى عليه الصلاة و السلام ..

كمان عملت حاجه .. فكيره كده من فكيراتى الشرقاوى ماركة أبو سويلم :)

أستغليت جور الأشجار يا أخوانا و زرعت فيها بصل .. أيوه بصل ..

ما هى كد كده الميه بتسقى الشجر و الأرض الرمليه بتشربها فيبقى ليه ما نستغلش فائض الميه دى و نسقى بيها شتلات البصل بدل ما بتتهدر فى الرمل من غير فايده ؟؟

و فعلا .. نجحت الفكره نجاح فظيع ثلاثى الأبعاد زئبقى فتاك .. و شتلة البصل اللى كانت قد عقلة الصباع كبرت و تعملقت و بقت بصل أخضر محترم فى زمن قياسى بفضل الله .. و بصوا فى الصوره دى كده شوفوا البصله بقت تخن أيه ؟

و شويتين كده و حيبقى بصل أحمر يتباع بالشىء الفلانى اٍن شاء الله ..

عاوز أشكر البرنسيس شمس النهار .. عاوز أشكرها بجد من كل قلبى على تشجيعها ليا و اٍهتمامها بأحوال الزراعه اللى كانت متبعاها أول بأول من خلال الموبايل النوكيا n95 و تخفيفها عنى تعب الشغل المرهق للغايه فى الصحراء حيث لا قرطار و لا نافخ نار.. و كمان عاوز أشكرها على جركن مياه زمزم اللى أهدتهولى بعد ما اٍتقابلنا بالصدفه لأول مره فى فايد و بعد ما عرفت أن صنعتى هى الزراعه و لما أستغربت اٍزاى قدرت تشيل هذا الجركن العملاق و تيجى بيه من السعوديه بصت لى باٍستغراب برنسيساوى و قالت لى بلهجة الأميره اٍنجى فى فيلم رد قلبى : أمال الشيالين بيعملوا أيه ؟؟!!

و طلبت منى أسقى كل شجره بشوية مياه من الجركن الزمزماوى ده و كانت كلها ثقه أن ربنا حيبارك فى الزرعه و قد كان و لله الحمد و وشك حلو عليا يا برنسيس ربنا يجعلها سنه خضرا على الجميع يا رب :)

الأرض حلوه يا ولاد .. و رزقها حلو و واسع .. و ربنا بيبارك فى الزراعه خاصة لما يكون المتولى عليها بيحبها و بيخلص فى خدمتها و مش بيتعب من مكافحة الآفات و الخنافس الحمرا بنت اللئيمه اللى بتاكل الجذور أكلا نهما مفتريا .. و زى ما أنتم شايفين حتى الأرض الصحراويه الرمليه الخشنه المتجهمه بتبقى حلوه أوى لما بتخضر و مافيش حاجه اٍسمها مستحيل أبدا أبدا رغم المصاعب الجمه فى اٍستصلاح و زراعة الصحراء و أهمها عطل مواتير سحب المياه من الآبار زى اللى حاصل عندنا اليومين دول و اللى لهذا السبب تعطلت زراعة 3000 شتلة بتنجان و فلفل بأنواعهم ..

يا شباب .. يا بنات .. الصحرا وسيعه و مستنياكم .. مستنيه شبابكم و عافيتكم و علمكم و صبركم و صدقونى حتديكم من خيرها ما لايخطر على بالكم .. يالا بقى خشوا عليها كده بقلب جامد و خضروها أحسن ما نقعد نشتكى من البطاله و نقول يخرب بيت الحكومه :))

خفافاً و ثقالاً ..

Get this widget Track details eSnips Social DNA

مش لاقى عنوان !!!!!!!!!

يعنى هى بقت كده ؟؟!!

يعنى هى الحكايه وصلت لكده ؟؟!!

يعنى عاوز حد يقدر يقنعنى أنه ممكن يبقى فيه شعب فى الدنيا بهذا القدر من الهبل و اللامبالاه حتى يسمح بأن يكون علم وطنه مرسوم على شبشب حمام يباع على الأرصفه و يشتريه الناس عادى كده جدا !!

عاوز أعرف مين المسئول اللى يستحق الحرق حيا اللى تفتق ذهنه القذر المريض عن صنع هذه الشباشب اللى بدأت فى الاٍنتشار على فرشات الباعه الجائلين فى منطقة وسط البلد و الموسكى و العتبه ؟؟

عاوز أعرف مين القذر الحقير اللى لا أجد غضاضه فى وصفه بالخائن لوطنه و اللى فى رأيى حيكون مسئول عن اٍستهتار جيل بكامله بعلم بلاده اللى هو رمز اٍنتماءه و وطنيته اللى صنع هذه البضاعه الفاسده لتباع هكذا علنا بدون أن يقدم صانعيها و بائعيها للمحاكمه العاجله بتهمة الخيانه و اللى لو ده حصل فى أى بلد من اللى بنتقرنن عليهم بحضارة السبعتلاف سنه لقامت الدنيا و ما قعدت و لنال المجرمون جزائهم على خير وجه ؟؟!!

و لكن حأقول أيه ؟؟ ما هو أصلا العيب فى الناس اللى بتتفرج على هذه المهزله بدم بارد و بتشتريها بدم بارد و بتلبسها بدم بارد و لا دم الصراصير و نرجع نقول ليه ربنا عامل فينا كده ؟؟

ليه ؟؟ علشان اٍحنا بصراحه نستاهل كل ما يجرى علينا من مجريات الزمان لأننا بصراحه وصلنا للدرجه اللى بنلبس فيها علم بلادنا شبشب فى رجلينا !! طيب يبقى خلاص بقى زعلانين ليه ؟؟ زعلانين من أيه ؟؟ و لا أحنا عايشين ليه أصلا ؟؟ و لا أحنا عايشين فى هذا الوطن و تحت سماه ليه ؟؟

مكسوف أوى منكم يا أرواح شهدائنا .. حقكم عليا .. بصراحه مانستهلش تضحياتكم !!

الكلام ده كبييير !!

مساء الخير أعزائى المدونات و المدونين ..

حيث أن الواحد نفسيته تعبانه و روحه المعدنيه فى الحديد ( يعنى الروح المعنويه فى الحضيض ) على رأى سيد زيان - ربنا ياخد بيده - و بما أن العمليه فى النمليه و الفانله فى الجونله و العقل عايم فى البالوظه من اللى حصل اٍمبارح من أحداث كوميديه هزليه لا تصدر اٍلا من الشعب المصرى اللى أتشرف باٍنتمائى له و اللى أثبت شىء أزعم أنه أنفرد به دونا عن شعوب الدنيا و هو أنه من الممكن أن الاٍنسان يعمل اٍضراب فى سره يعنى بالنيه كده .. و طبعا الأعمال بالنيات و لكل اٍمرىء ما نوى و أنا بقى نويت أهيس النهارده و رزقى و رزقكم على الله و أهو يوم و عدا و اللى يمشى ورا العيال صحيح ما يخلاش من التقريص و بالروح و الدم نفديكى يا كوستاريكا ..

المشهد العبثى الأول :

- عارفين هايبر وان اللى فى مدخل مدينة الشيخ زايد ؟؟ طيب كويس ..

أول ما تدخلوه كده حتلاقوا شاب وجيه بيصطاد اللى داخلين و بيعرض عليهم الاٍشتراك فى مسابقه ما أعرف و لا أيه حاجه كده يعنى للفوز برحلة العمره ربنا يكتبها لنا تانى و تالت يا رب ..

المهم فى يوم من ذات الأيام و أنا داخل أتسوق كان الزحام شديد و ماشى جنبى بالصدفه رجل دين مسيحى يعنى قسيس و لابس لبس القساوسه و معلق صليب قد كده على صدره و اٍذا بيا أتفاجىء بالشاب بتاع العمره يسيب كل اللى داخلين و يقع على أبونا القسيس و يعترض طريقه و يدور هذا الحوار العبثى بينه و بين أبونا اللى أوقعه حظه فى هذا الشاب الغبى غباء مسوجر لم أجد له مثيلا فى حياتى :

- الشاب الغبى : السلام عليكم ..

- أبونا القسيس : و عليكم السلام ..

- الشاب الغبى و على وشه اٍبتسامه غبيه زيه : فيه فرصه لحضرتك تشترك معانا و تفوز برحلة عمره و زيارة قبر الرسول عليه الصلاة و السلام ..

- أبونا القسيس و قد فنجل عينيه من الدهشه : أيه أيوه حاضر آه !!

- الشاب الغبى و قد اٍزدادت اٍبتسامته اٍتساعا : طيب أتفضل حضرتك معايا علشان تشترك فى المسابقه ..

القسيس وقف محتار مش عارف يتصرف اٍزاى مع كتلة الغباء دى و قد اٍزدادت عيونه اٍتساعا و كأنه غير مصدق لما يسمع !!

هنا بقى ماقدرتش أمسك نفسى عن اٍطلاق ضحكه مجلجله لا تصدر منى غير لما بأتفرج على مارى منيب رحمة الله عليها و هى بتقول لعادل خيرى رحمة الله عليه برضو : أنتى جايه أشتغلى أيه ؟؟

و رحت موجه كلامى للشاب الغبى و قلت له :

- يعنى أنت مش شايف لبس أبونا القسيس ؟؟ جايز !! لكن كمان مش شايف الصليب اللى على صدره ؟؟!!

هنا بقى الجدع يا قلب أمه بانت عليه الحيره و تأمل فى أبونا اللى وقف ساكت ينظر اٍلى لا شىء و تهته و قالى بصوت خفيض :

- يعنى أيه ؟؟

هع هع هع هع

- المشهد العبثى التانى :

فى هايبر وان برضو .. صدفه يعنى :)

من ييجى سنتين كده كنت بأتسوق فيه و فجأة ألاقى قدامى الكابتن حسن شحاته و كان وقتها لسه الفريق القومى المصرى - أدام الله وقائه - حاصل على بطوله كبيره ناسى أيه هى حيث أنى ماليش فى الكوره لكن ليا فى الفرحه بفوز أى شىء مصرى .. و كان الفوز ده شاكح قلوب كل المصريين - أدام الله اٍنشكاحهم - فمن فرحتى بيه حيث أنه قاد الفريق للنصر كمدرب محترف و معلم بيخللى الكوره تتكلم توجهت اٍليه مباشرة و سلمت عليه بحراره و الحقيقه أن الراجل كان ذوق جدا و بادلنى السلام بحراره أشد و أبتسم و أنا بأصوره بالموبايل علشان أغيظ الواد أبنى الكبير اللى هو أهلاوى متعصب و بيجيله تخلف نصفى و أحيانا رباعى لما الأهلى بيتغلب :))

المهم بقى أسمعوا الحوار العبثى ده بينى و بين المعلم حسن شحاته و صدق من سماه معلم :

أنا :

- تشرفت بمقابلة حضرتك يا كابتن و على فكره دى تانى مره أسلم فيها عليك ..

الكابتن حسن شحاته مجاملا :

- أبوه طبعا فاكرك ..

قلت له و أنا بأضحك :

- ما أفتكرش يا كابتن لأن أول مره سلمت فيها عليك كان من حوالى 30 سنه :))

سألنى بود و هو بيبتسم و بيتأملنى بعيونه الملونه الحاده اللى زى عيون الصقر :

- يااااااه !! و ده كان فين بقى ؟؟

- فى الجزائر و كنت حضرتك بتتمشى حوالين المدينه الأوليمبيه و كان معاك الكابتن محمود الخطيب و الكابتن اٍكرامى قبل مباراة مصر و الجزائر بيوم و كنت أنا و معايا أتنين صحابى و عرفناكم بنفسنا أننا مصريين و فرحنا أوى أوى أننا قابلناكم و وقعتوا لنا على الكوره اللى كانت معانا و قلتوا لنا حنغلب الجزائر 2 صفر ..

توضيح : الكلام ده حصل فى منتصف السبعينيات و كنت وقتها فى أولى ثانوى و كان معايا الواد هشام بديع اللى هو دلوقتى مدير عام شركة أليكس تورز و الواد سامى كمال اللى هو دلوقتى برضو صاحب أكبر مصنع للأثاث فى الجزائر اللى أستمر فى الحياه فيها و تزوج جزائريه و أنجب منها زوربة عيال .. و قابلنا الكباتن بيتمشوا خارج القريه الأوليمبيه اللى كانت حاجه فريده من نوعها فى وقتها يعنى و كانت مفخرة الجزائر فى منطقه اٍسمها بن عكنون ..

بعد ما فكرت الكابتن حسن شحاته بأول مقابله من 30 سنه سرح شويه كده .. و أكتمل الموقف العبثى لما قال و هو بيبتسم ببساطه :

- أيوه أيوه بأمارة ما كان معاكم كوره صفرا ..

و ده حقيقى !! الكوره اللى معانا فعلا كانت صفرا !!!!

يا خبر زى بعضو !! معقول يا كابتن فاكر موقف صغنون زى ده حصل من 30 سنه ؟؟؟!!!!!

طيب أحلف بسماها و بترابها أنا ما فاكر أتعشيت أيه اٍمبارح ..

و

هع هع هع هااااااع

الموقف العبثى التالت :

- لما حبيت أركب جهاز تكييف فى أوضة نومى كلمت صاحبى المهندس ياسر و سألته النصيحه .. فالراجل الحقيقه نصحنى أركب جهاز تكييف شباك مش عارف كام حصان ماركة أيه بما يتماشى مع مساحة الأوضه .. و أتفقنا على السعر و ميعاد التركيب ..

و فى الميعاد المحدد لاقيت 2 شباب و معاهم باشمهندز كبير فى السن عنهم شويه جايين و جايبين جهاز التكييف المنتظر و شوية خراطيم كده و كابلات و هيلتى و حاجات كده يعنى ..

- أهلا و سهلا أتفضلوا نورتوا و شرفتوا ..

ده أنا اللى بأقول ..

و بحسن نيه شاورت لهم على أوضة نومى و فهمتهم أنى عاوز جهاز التكييف يركب هنا بس بعيد عن السرير علشان هواه الساقع ما يبردش اللى نايم و ده من حقى بصفتى مواطن صالح و ماليش فى اللبط ..

الباشمهندز اللى معاهم طمنى باٍبتسامه واثقه كده و أبتدوا يطلعوا العده علشان يشتغلوا .. أنا الحقيقه صوت الهيلتى و الشنيور و الدق و الحاجات دى بتعمل لى حاله اٍرتجاجيه فى المخيخ الأوسط و بتسمع فى فى القولون المستعرض و بأبقى زى الغرقان فى بحر العسل و الطحينه ففضلت أنى أغادرهم لشئونى و أسيبهم يشتغلوا ..

طيخ طاخ طوخ طيخ برررررررررررررر طوخ طيخ طوخ زربو زربو طاخ طاخ طاخ طيخ طوخ طوخ طوخ !!!

و اٍذا فجأة تصمت كل هذه الأزعرينه بعد حوالى نص ساعه كده من الهبد المتواصل و يسود هدوء تاااااااام و لا الهدوء بين المتزوجين اللى ناويين يعملوا فى بعض عمله سوده !!!

قلت فى عقل بالى يا واد قوم اٍستطلع و شوف أيه الأخبار ..

و دخلت عليهم .. لاقيتهم فتحوا فعلا فتحه مربعه فى الحيطه على قد جهاز التكييف .. و لكن و ياللعجب العجاب أن الفتحه دى كانت مظلمه تماما رغم أننا لسه الظهر !! بصيت للفتحه و بصيت لهم لاقيتهم مطرطرين وشهم فى الأرض و لسان حالهم بيقول اٍنشقى يا أرض و أبلعينا !!

ليييييييه ؟؟

لأنهم بذكاوتهم اللى ليس لها مثيل سوى ذكاء الشاب الغبى اللى عاوز القسيس يطلع رحلة عمره و يزور المسجد النبوى فتحوا الفتحه العجيبه دى فى الحيطه المشتركه بين أوضتى و أوضة نوم الواد الكبير بدل ما يفتحوها على الشارع !!!!

مش كده و بس .. الموقف العبثى الحقيقى اٍكتمل لما الشاب اللى كان بيخرم الحيطه و بيكسرها قال بندم و هو بيلطم و الدموع قى عينيه :

- و أنا لما خرمت الحيطه بالهيلتى خرم صغير و بصيت منه و لاقيت الدنيا ضلمه قلت فى بالى هى الدنيا لحقت ليلت ؟؟!! أنا عاوز أولع فى نفسى و ربنا المعبود اٍهىء اٍهىء

و

هع هع هع هاااااااااع

يا جماعه بصدق و الله من كتر ما فهمت مدى عبثية الدنيا خلاص مابقتش لا أزعل و لا أحزن و لا أتنرفز و لا أجعر لكن بقيت أضحك من قلبى حتى فى أشد المواقف عبثيه ..

عارفين ليه ؟؟

علشان مافيش حاجه تستاهل الزعل :)

قوم يا مصرى ..

Get this widget Track details eSnips Social DNA

اٍتكلمى ..

Get this widget Track details eSnips Social DNA

تاج ..

بنتى الدكتوره عاشقه و غلبانه أهدتنى هذا التاج الظريف و هو فعلا عجبنى :) فلاقيت من واجبى أنى أجاوب عليه بصدر رحب و عقل منفتح و بأشكرك يا دكتوره و نسأل المولى التوفيق ..

- اٍسمك ؟

عمرو بدر ( ده اٍسمى الحقيقى )..

- المشهور بيه وسط اصحابك..؟؟؟؟

هو برضو عمرو بدر من و أنا طفل تفريقا بينى و بين زميل الدراسه و صديق الطفوله عمرو عباس .. بس بأنبسط أوى لما بأتنده بأبو على :)

- سنك..؟؟؟

السن مش بيتحسب بالسنين و لكن بكم الخبرات المتراكمه و المختزنه فى البعد البؤرى للاٍنسان الأنوى النادر الوجود :))

- مجال دراستك...؟؟؟

ليسانس آداب لغة عربية و لغات شرقية و آدابها دفعة 1985 تخصص لغة فارسية + دبلوم موسيقى من كونسيرفتوار دى أليكسندرى تخصص صولفيج و بيانو دفعة 1983 + 4 سنين دراسات حره بكلية فنون جميله قسم تصوير .. و كفايه كده :)

- اسم مدونتك....؟؟؟

حبشتكنات فلسفية ..

- صورتك الرمزيه بتعبر عن ايه...؟؟؟؟

بتعبر عنى لأن دى صورتى الحقيقيه .. و مش قادر أفهم أيه المانع أن المدونين مش بيحطوا صورهم الحقيقيه اٍلا فيما ندر يعنى طالما أن التدوين بيعبر عن شخصية المدون يبقى ليه نخفى وجوهنا عن بعض مادام بنعرض أفكارنا على بعض ؟؟!!

- هل فكرت في اغلاق مدونتك....؟؟؟؟

خالص عمرى نهائى .. و بأستغرب من اللى بيعلنوا عن غلق مدوناتهم و غالبا بيتراجعوا بعد شوية هدوء !! يعنى غلق المدونه هو اللى حيعدل المايله ؟؟ بالعكس التدوين هو اللى ممكن يزيح عن صاحبه هموم و أفكار بتتلاطم جواه و بعدها حيشعر بتحسن و صفاء نفسى ..

- ايه رد فعلك لو حد قل ادبه عليك في تعليق...؟؟؟

ببساطه متناهيه مش حأنشر تعليقه لأنى عامل مودريشن بسبب شخص كان مدبأنى فتره من الفترات و كان بيبعتلى يوميا حوالى 200 تعليق على كل البوستات كلهم شتيمه عجيبه من نوعها و أنا لحد دلوقتى مش عارف ليه كان بيعمل كده ؟؟!! و كان بيجيب وقت منين علشان يكتب كل هذه الشتائم اللى لم أر لها مثيلا فى حياتى من حيث غرابة التراكيب !! و للعلم ماكنش بينى و بينه أى خصومه و لا أى خلاف من أى نوع بس بقاله فتره كبيره ناسينى !! يمكن مات ؟؟

- اسوأ مدونه...؟؟؟

السؤال ده ماينفعش و مالوش اٍجابه لأن كل مدونه بتعبر عن رأى صاحبها و أسلوب تفكيره فماينفعش نقول على شخص أن تفكيره ردىء و لكن ممكن نقول أن تفكيره فيه وجهات نظر بنختلف فيها معاه .. لأن الفكر كائن حر يحلق فى الأفق كما يحلو له و لا حجر عليه .. لأ مافيش مدونات رديئه و لكن أحيانا بتبقى بالنسبه ليا غير مفهومه لأنها شديدة الخصوصيه و يصعب فهم ما يدور بعقل صاحبها ..

- هايحصل ايه لايميلاتك بعد ماتموت....؟؟؟

حتروح للورثه :))

- اديت الباس ورد لحد قبل كده...؟؟؟

لاٍنسانه غاليه عندى وهى عرفت كل باسورداتى بذكاء تحسد عليه و برضا منى يعنى :)

- السفر بالنسبه ليك ايه...؟؟؟؟

عشت أغلب عمرى مسافر من بلد لبلد و حتى يمكن جوه نفسى كمان !! لكن دلوقتى مش بأفضل أسافر كتير اٍلا للبحر فقط .. السفر و تجربة الاٍغتراب مهمين فى تكوين الشخصيه و ليهم فوائد عديده أهمها بلا شك الاٍعتماد على الذات فى كل كبيره و صغيره لأن حياة الغربه لا فيها بابا و لا ماما و لا سلفنى 3 جنيه .. من الآخر بأنصح الشباب بتجربة السفر بس بشرط تكون على أساس سليم مش بهدله يعنى و خلاص ..

- المود بتاعك ايه...؟؟؟؟

متسامح .. متفائل .. صبور لأقصى حد .. أكره النكد و النكديين و المتنكدين و المكان اللى فيه نكد ..

- بتعمل ايه في وقت فراغك...؟؟؟؟

ماعنديش وقت فراغ لأنى بأعتبر كل شىء بنعمله فى يومنا حتى لو بدا للآخرين أنه تافه و مالوش لازمه هو فى الحقيقه مهم بس بشرط نعمله باٍتقان و بحب ..

- اكلتك المفضله ايه....؟؟؟؟

أيام الشراهه و الفجعه و شغل التخن اللى على أصله كان الرقاق باللحمه المفرومه و السمن البلدى مع البط المتحمر برضو بالسمن البلدى و طماطم بالخل و التوم و الحلو بقى نص دستة جاتوه كده بجد بدون مبالغه .. بس دلوقتى أكلتى المفضله شريحة سمك فيليه مشويه و ربع رغيف و طبق سلاطه و لا حول و لا قوة اٍلا بالله (وش بيعيط و بيلطم )

- الصفات اللي اخدتها من والدك......؟؟؟؟؟

الله يرحمه كان راجل محترم .. أرجو أنى أكون فعلا أخدت منه صفات الكرم و العدل فى التعامل و الحنان الشديد و الشده فى الحق و الجرأه و البساطه .. بس الحمد لله حمدا كثيرا أنى ما آخدتش منه عصبيته المفرطه :)

- الصفات الللي اخدتها من والدتك....؟؟؟

ربنا يديها طولة العمر .. مش بأحب الحال المايل و لا التردد زيها .. يعنى يا أبيض يا أسود مافيش رمادى ..

- اكتر ست حاجات بتحبهم...؟؟؟

رضا الله .. شعور الأمان .. اٍسعاد من حولى .. تلقى السعاده ممن أسعدتهم .. صدق المشاعر .. الفلوس ..

- اكتر ست حاجات بتكرههم...؟؟؟

نكران الجميل .. اللؤم و اللوع .. الغدر .. فقدان صديق .. الفلس .. البرد ..

- شخصيتك نوعها ايه...؟؟؟

هادىء لأقصى حد ممكن تخيله :) لأن عندى ثقه فى الله لا حدود لها ..

- لماذا دخلت عالم التدوين من الاساس...؟؟؟؟؟؟؟؟؟

كنت أشعر بالوحده الشديده و كنت عاوز حد يشاركنى أى شىء و لو حتى قراءة أفكارى .. و الحمد لله عملت كنز من الأصدقاء و الأهم أنى لاقيت هدية ربنا ليا اللى كان محوشهالى بعد ما قارب المشوار على نهايته و لله فى أمره شئون لا ندركها بعقولنا القاصره عن تجليات حكمته ..

- اجمل كلمه اتقالت في وصف مدونتك...؟؟؟

مش فاكر مين فى مره اللى علق عندى و قال لى مدونتك دمها خفيف :)

- اهميه التعليقات بالنسبه ليك...؟؟؟؟

طبعا التعليقات بتعمل تواصل بين المدونين و ده شىء مطلوب لأن لما حد بيعلق عند حد فالحد التانى بالتالى بيروح يعلق عند الحد الأولانى و هكذا بتتنشر الأفكار و بيتوجد جو من الحوار الهادف و أكيد بنتعلم من بعض على الأقل بحكم كثرة وجهات النظر و اٍختلافها ..

- احلي بوست كتبته وضع اللينك واذكر السبب...؟؟؟

سؤال صعب جدا .. أنا سايب الاٍجابه ليكم أنتم :)

- افضل مدونه قرأتها...؟؟؟؟

كل مدونه و لها طعم و لون و رائحه تختلف عن التانيه .. و كل مدونه بأتعلم منها حاجه ما .. حتى المدونات الأجنبيه المكتوبه بالاٍنجليزى و الفرنسى برضو بأتابعها و بأستفيد منها .. لكن المدونات اللى بتحمل أفكار متعصبه أو اللى بتدعو لكره فئه و تفضيل فئه مش مفضله عندى أبدا ..

- افضل بوست قرأته..؟؟؟

كتير أوى البوستات اللى عجبتنى فالحقيقه صعب أنى أذكر واحد فقط لأن ده حيبقى فيه ظلم لباقى البوستات ..

- الشغل بالنسبه ليك...؟؟؟؟

هو الحياه نفسها .. و مش شرط الشغل يكون عمل الشخص بيرتزق منه و لكن كل شىء ممكن نعمله هو فى الحقيقه شغل بشرط اٍتقانه .. أذكر أنى كنت بأقول أنا رايح أشتغل مش رايح أذاكر ..

- الانترنت بالنسبه ليك...؟؟؟

نافذه على العالم .. منه بأطل على الدنيا الرحيبه الواسعه و منه اٍتعلمت حاجات ما أتعلمتهاش طوال عمرى المديد السعيد لاٍختلاف الثقافات و طريقة التفكير .. الأنترنت مهم جدا بس لما يبقى مش واقع أو بطىء لأنى فى الحاله دى بيصيبنى اليأس و بأفكر وقتها فى الهجره لساحل العاج حيث النت سريع و الناس هناك لابسين قمصان مشجره و بيغنوا و بيرقصوا على البحر ليل و نهار و بيقزقزوا أناناس و عيشتهم آخر روقان :)

- تمرر التاج ده لمين...؟؟؟؟؟

لكل من يقراه و مايكونش جاوب عليه .. و له منى كل تحيه :)

روُحى عشقتك ..

كل الكلام مش كفايه .. شكرا !!

Get this widget Track details eSnips Social DNA

نينتنا فُن !!

مساء الخير يا أهل البلوجر و أسعد الله أوقاتكم ..

أبشركم اٍن بكره اٍن شاء الله السبت ستغرق القاهره و الجيزه و الاٍسكندريه فى ظلام دامس من الساعه 8 و نص للساعه 9 و نص بالليل و ذلك بمناسبة مشاركة مصر فى اليوم العالمى لترشيد الطاقه !!

عجبت لك يا زمن على رأى المعلم محمد رضا !!

طيب ..

المهم يعنى اٍن وزارة الاٍعلام أصدرت بيان دعت فيه الخلق لطفى الأنوار فى هذا الوقت فى المنازل و المحلات تضامنا مع هذه الحمله وارد أستراليا الشقيقه اللى هى أصلا دعوه لمواجهة خطر الاٍحتباس الحرارى اللى حيشعلل الدنيا حريقه لو أستمر على هذا الحال ..

محافظة القاهره كمان طلعت بيان قالت فيه أنه بكره حتطفى الأنوار فى الساعه دى على أغلب الطرق السريعه كطريق المطار و الكورنيش و الكبارى و طريق المليون شجره الشهير و اللى محتاج أصلا نقطة بوليس آداب فما بالكم بقى لما يبقى ضلمه كحل :)) يا خبر أسود و منيل ..

و كمان الأهرامات و البرج و مجمع التحرير و مكتبة الاٍسكندريه و منطقة وسط البلد و مبنى الأهرام و الشوارع الرئيسيه و كده يعنى ..

أتعشم من كل أعماق تلافيف فؤادى أن تتخذ السلطات المختصه اٍجراءات فعاله و صارمه للحفاظ على الأمن أثناء هذه الساعه الضلمه لأنى أتوقع أن تحاول طيور الظلام العمل فى مثل هذا الظرف النادر ..

و آمل من كل قلبى أن لا تزيد المواليد بشكل مبالغ فيه بعد 9 شهور من بكره رحمة بالحكومه اللى خلاص أستجارت من زيادة البيبيهات ..

و أتمنى أن تكون هذه الساعه الكحل فرصه لاٍعادة الرومانسيه المطلوبه و المفتقده بين الناس .. يعنى شمعايه كده و كلمتين حلوين فى الهداوه و بلاش عتاب يا حبيبى بلاش العتاب ..

و أما أنتم أيها العزاب فلنا رب اٍسمه الكريم و كل ليله ضلمه و أنتم طيبين :)

بوست صادم !!

صباح الخير ..

مش عارف ليه كلما ظننت اٍن الحياه بدأت تبتسم لى و تورينى شويه من حلاوتها كلما طلعت لى حاجه من تحت الأرض تنكد عليا و تفتح باب لحزن شفاف و لكنه عميق و مؤلم ..

هى الدنيا كده على طول و لا أيه ؟؟!!

التعليق اللى بأنشره كبوست اليوم جالى على البوست ده و ترددت كثيرا اٍنى أنشره كتعليق لما فيه من وقائع صادمه و مخزيه و قد لا تكون لائقه فى نظر البعض .. و تشاورت مع عزيزتى شمس النهار فى أمره و تناقشنا فيه كثيرا و كانت متخوفه اٍنه يكون اٍشتغاله من حد لديه رغبه فى لفت الأنظار .. و لكن راعنى أسلوب كاتبته اللى بيقطر ألم و وجع اٍضافة للب الموضوع الخطير اللى بنحاول كمجتمع شرقى محافظ التغطيه عليه ما وسعنا لذلك سبيلا ..

و أخيرا اٍستقر رأيى على نشره ليس كتعليق و لكن كبوست قائم لحاله كما جاء بالنص و بغير تغيير حرف فيه بغض النظر عن مدى مصداقيته و دى نقطه أنا سايبها لكم أنتم اللى تحكموا عليها علما بأن صاحبة التعليق أعطتنى تصريحا لنشره و هذا يظهر فى تعليقها الأول ..

شاركونى شوية حزن .. مش اٍحنا أصحاب ؟؟

********************

أستاذ عمرو
السلام عليكم و رحمة الله و بركاته
أعلم أنني لست الأولى ولن أكون الأخيرة أيضًا، وهذا ما يؤرقني دومًا، أنا لا أبحث عن حل لنفسي، وقد أوضحت هذا في تعليقى السابق على بوست حضرتك ، فقد انتهى أمري منذ الثامنة، لكن الآن أبحث عن حلول لغيري.
لا تعتقد أنني أقف في مكاني وأبكي على الماضي.. نعم تؤلمني الذكرى، أفقد صوابي تماما عندما أذكر استغاثتي بأخي من أبي فأصدم به أيضًا، لكنني لا أدعها تسيطر عليَّ وتُذهب الباقي من عمري.. فيكفيني ما ذهب هدرًا بسببها.
عدة أشهر قضيتها في تشوش ذهني رهيب، لا أميز ما أعمل ولا ما أكتب ولا من أصاحب بصورة تامة، لا أعلم كيف بدأ ولا كيف انتهى، كل ما أذكره هو تعرضي لبوادر اعتداء آخر وأنا في الثامنة عشرة بدأ بعدها كل شيء حتى أنى كنت أتوسل لمن يغتصبنى منهم أن يغتصبنى مرة ثانية و ثالتة و رابعة لأحس بالشبع.
حسنًا لا يهم كل ذلك الآن.. كل ما في الأمر أن لي مجموعة من الأصدقاء، استغرق الأمر منا أكثر من سنتين ونصف السنة حتى يثق أحدنا بالآخر ثقة تامة، ويأتمنه على أدق أسراره وأسوأ ذكرياته، جمعتهم بنفسي بعد تعرفي على كل منهم على حدة.
كان الجامع فيما بيننا، هو "التحرش"، أو لأكن أكثر دقة معك.. "الاغتصاب المتكرر منذ الصغر"؛ فأنا لا أحب تسمية الأمور بغير أسمائها.
مجموعة من 5 أفراد الآن بعد أن كنا 7، شابين وثلاث فتيات، موزعين على عدة بلدان عربية (السعودية ومصر واليمن) جميعنا مررنا بنفس التجربة، وبعضنا أسوأ من الآخر وفي عمر مبكر جدًا، أنا أقواهم، ومن يحفزهم، لنا هدف واحد.. هو حماية الأطفال مهما كانوا ومهما كلفنا الأمر، أنا مؤمنة إيمانًا تامًا بأننا لم نجتمع صدفة، وبلا هدف أسمى؛ لذلك يجب عليَّ أن أقوم بأمر ما لهم ولغيرهم.
لماذا أصبحنا 5 الآن يا أستاذ عمرو؟!
لسبب بسيط جدا، أحدنا انتحر قبل فترة بسيطة، والأخرى قُتلت غدرًا، وختمت القضية بـ"قضية قتل شرف".. ولم يعاقب الأخ (القاتل) وبقي حرًّا طليقًا ما دام الأب لم يطالب بشيء، وبالطبع هو لن يطالب ما دام شريكا في الجريمة.. أتعلم حضرتك لماذا حدث هذا الأمر؟!.
حدث ذلك بسبب مقاومتها وتهديدها لهم بالفضيحة، هذا ما أخبرتني به أختها بعد موتها، طبعا ستلتزم الصمت هي الأخرى، وللأبد حفاظا على حياتها.
لماذا يخبرني الكل هنا ويخبر غيري بأنني أستطيع الدفاع عن نفسي في حال تكرار الاعتداء؟!
إذا كان المعتدي خائفًا من الفضيحة فسيقوم بأي فعل حتى لا يُفتضح أمره.
دائمًا هذا الأمر لا يُؤخذ في الحسبان، وتتحول القضية من اعتداء إلى قتل.
ولا يحتاج الأمر إلا أن تكون في إحدى الدول العربية حتى تنتهي القضية بقضية شرف عادية؛ فالقتل جائز لأجلها في نصف الدول، وتغلق القضية بلا أي بحث عن أدلة قطعية.
التهديد ما زال قائما بالنسبة لي، ولا أستطيع أن أضحي بأمي مهما كان، فأي خبر من هذا النوع كفيل بإنهاء حياتها تماما، وهي عندي أهم من نفسي.. قلت -وأعيدها مرارًا-: أنا لا أبحث عن شيء لنفسي الآن.. بل حل لهم هم.
كانت هناك نية حقيقية في الحديث الجماعي مع أحدهم، والوقوف والبوح بكل ما حدث علانية مع صعوبة الأمر، أعدنا ما حدث مرارًا، وتكرارًا حتى ألفناه، لكن الآن الكل خائف، والكل يرفض القيام بأي حركة إضافية بعد فقدان شخصين.
لذلك كان عليَّ أن أتكلم وأن أبدأ، إن كان على أحدهم الموت الآن فأنا لا أبالي به كثيرًا، سيكون أفضل من الوحدة الغارقة بها الآن.
أستاذ عمرو..
عذرًا منك، فقد لا يبدو كلامي مترابطًا أو مفهومًا؛ لأنني باختصار مشوشة جدًا الآن، وأحاول ألا أقع مجددًا، قرأت كل ما كتبت حضرتك فى المدونه ، قرأته كاملا وأكثر بكثير، أنت في مواجهة قارئة نهمة للأسف، قد تكون القراءة هي ما ساعدتني في فهم ما حدث من الأساس، لكن أرهقت دواخلي كثيرًا، في كل مرة أفكر في مهانتي، وفي سهولة ما حدث، في استمرار كل شيء بلا تغيير، أكتشف أنني لا أمثل أي شيء لأحدهم، حياتي كمماتي تماما.
لكن لأجل ما حدث لم أسامح أحدًا بصورة تامة، لا أبي، ولا أمي، ولا أخي، ولا عمي، لم أستطع ذلك على الرغم من كل المحاولات.. فقد تغفر الزلة الأولى والثانية وتُنسى، لكن لا يمكن اغتفار الثالثة، ولا العاشرة والعشرين مهما حصل.
أشفق عليهم جميعًا، فهم مرضى وأسرى لغرائزهم ونزواتهم فقط، بالرغم من ذلك فإنه يوجد نوع غريب من الحب لهم، حب وتعلق طفولي نوعا ما.
دائما ما أقول، شكرًا أبي لأنك جعلتني ما أنا عليه الآن، شكرًا أمي لتجاهل شكواي وبكائي وكل ما كان واضحًا لك.. قد يكون في الأمر سخرية أو لوم، لكن السخرية أخف من الحقد والكره.
لا تقلق يا أستاذ عمرو، لا أفكر في الزواج أبدًا، لا اليوم ولا غدًا؛ فهو خارج اهتماماتي تماما، لسببين بسيطين جدًا.
أحدهما بالتأكيد تعلمه ، والآخر هو أنه لا ثقة لي في أحد، لن أثق في رجل، لن أثق في أب، ولن أستطيع ائتمانه على أولادي..لا ثقة، إذن لا حب، وإذن لا حياة، الأفضل أن أبقى كما أنا، حتى وإن حدث وتهورت وفكرت في ذلك، فلن أثق في نفسي، قد أؤذي أحدهم أيضًا، وأنا جاهلة لهذا ما دمت أجهل نصف أفعالي خلال عدة أشهر متتالية مع معرفة الكل بها، وقد يتكرر الأمر مجددًا.
قد تستغرب، لكنني لم أتأكد تماما من موضوع إرسال الميل إلا حين وردني تنبيه من حضرتك أنك سترد عليه.. الأفضل أن أبقى كما أنا، سأحتمل كل ما يحصل لي، لكن لن أتحمل إيذائي لأي شخص.
أستاذ عمرو.. ما كان عليك أن تهتم.. إن كنت احتملت جنون تعليقى على بوست حضرتك، فقد أتبعته كما يبدو بالثانية، وإن كنت أرسلت الأول بلا وعي فأنا أتمها بهذه بكامل وعيي الآن.. فعذرا منك، مع خالص تقديري واحترامي لشخصكم.
سارة

********************

اٍنتهت الرساله الموجعه و لا حول و لا قوة اْلا بالله !!

فيشنا الهوامش !! مع الأسف الشديد ..

صباح الخير ..

لا بجد حاجه تزعل ..

تزعل و تحزن و تخللى الواحد يتأسف من أعماق فؤاده على ما صار اٍليه الحال ..

بصراحه و من غير تطويل أنا بأتكلم عن اٍنتشار مخدر الحشيش ليس فقط بين الشباب و البنات صغار السن و لكن كمان بين كبار السن على اٍختلاف طبقاتهم و مستوياتهم الثقافيه و الفكريه بدون تمييز يذكر !!

كل شويه أتفاجىء بفلان أو فلانه اللى لا يبدو عليهم أبدا أنهم واقعين فى مصيدة المخدرات اللعينه أنهم بالفعل من أصحاب هذا الكيف المهبب اللى عاد تانى للطفو على سطح الحياه بعد ما كان أندثر و شبه اٍختفى عقب بزوغ نجمه فى الثمانينيات و ما صاحب هذه الحقبه من تغيرات هزت المجتمع بعنف و أفرزت ظواهر اٍجتماعيه لم تكن معروفه من قبل و لله فى أمره شئون !!

عاوزين نعرف أيه السبب الحقيقى لأنتشار تعاطى الحشيش بهذا الشكل المفزع بين الناس هذه الأيام ؟؟

ما أعتقدش اٍن الأجابه التقليديه اللى هى الضغوط النفسيه و الاٍجتماعيه هى السبب ستكون اٍجابه منطقيه مقنعه بدليل أنى بأشوف ناس لا عندهم مشاكل اٍجتماعيه و لا ماديه و لا من أى نوع و رغم كده غرقانين فى مستنقع الحشيش اللعين حتى آذانهم ..

خدوا بالكم أنى هنا بأتكلم عن الحشيش تحديدا و ليس أى نوع تانى من أنواع المخدرات لأنى فعلا لاحظت قوة اٍنتشاره بشكل مبالغ فيه اليومين دول ..

أيه الحشيش ده ؟؟ و مين له مصلحه فى تغييب أمة عن وعيها بشبابها ببناتها برجالها بنسائها و اللى بأعتبرها جريمه غير مسبوقه فى حق الوطن ..

الحشيش لمن لا يعلم من المخدرات اللى بيسبب الهلوسه و توجد علامات تظهر بوضوح على المتعاطى منها و أهمها اٍحمرار بياض العين اللى بيزول بعد زوال تأثير المخدر ..

و من الصعب للغايه كشف متعاطى الحشيش لو كان فرد من الأسره لا قدر الله لأن الحشيش لا يؤثر على سلوك الشخص لو كانت الجرعه المتعاطاه بسيطه يعنى مثلا ممكن المتعاطى يخدع اللى حواليه بأنه يمارس الأعمال اللى لا تحتاج للتركيز قدامهم بشكل طبيعى لكن بيسهل كشفه لو طلب منه القيام بأعمال تحتاج للتركيز الذهنى زى قيادة السيارات و حفظ الكلمات أو أى أشياء تتطلب وعى لحسابات الزمن و المسافه حتى لو كان قد تعاطى جرعه بسيطه من الحشيش ..

من الناحيه النفسيه بقى لاحظوا اٍن متعاطى الحشيش عادة ما يصف حالته بأنه فى حالة اٍسترخاء لذيذ و بيحس بنشوه وهميه هو صانعها و أن الدقائق بتمر عليه كالساعات و بيشوف الحاجات بعيده عنه جدا مهما كانت قريبه منه ..

لكن لو تعاطى جرعه كبيره فممكن أنه يشعر بالاٍكتئاب و الحزن العميقين و ذاكرته بتضطرب و بتروح فى الكازوزه و بيفقد ملكة الحكم الصحيح على الأمور .. و غالبا ما بتكون هلوساته ذات طابع جنسى و بيستمر الحال على كده من ساعه لست ساعات حسب كمية المخدر اللى طفحها ..

اللى غالبا لا يعلمه الحشاشين اٍن للحشيش تأثير ضار جدا على القدره الجنسيه للرجل على عكس الاٍعتقاد الشائع و هو اٍعتقاد خاطىء و خايب .. لأن الحشيش بيهبط من مستوى التستوستيرون فى الدم و هو هرمون ذكرى .. و كلما زادت الجرعه أو طال أمد التعاطى كلما هبط أكثر و أكثر هذا الهرمون عند الرجل اللى كلما أوغل فى التعاطى بغرض الوصول لقمة الفحوله كلما زادت خيبته القويه و حيوصل فى الآخر أنه ما ينفعش ببصله و يتخمد جنب زوجته زيه زيها و يمكن هى تكون أرجل منه شويه ..

عارفين لما الرجل بيوصل لهذه المرحله و يقول أنا غاده بيضطر من جهله و غباءه يدخل بقى فى مرحلة المخدرات التانيه اللى هى أشد فتكا من الحشيش لتنشيط ما قد همد فيه .. يعنى كده خلاص عليه العوض فيه من كل النواحى .. يعنى الحشيش اللى الناس مستهتره بيه و بيقولوا عليه بيفتح النفس و بيضحك ليس اٍلا فى الحقيقه هو ممكن يكون تمهيد لما هو أسوء بل ممكن تكون سيجارة الحشيش هى أول سلمه للقبر و لا دايم اٍلا وجهه سبحانه و تعالى ..

الشخص الحشاش اللى بيعيش وسطنا و مش عارفينه عادة بيكون غلبان و فى حاله و ماشى جنب الحيطه و مش بيعمل خروقات للقانون بسبب ما أصاب شخصيته من ضعف و جبن و اٍهتزاز .. ده طبعا بخلاف اٍن حيازة المخدرات مجرمه قانونا ..

لاحظت للأسف الشديد اٍن أغلب زوجات الحشاشين أصبحن حشاشات هن كمان !!

من وجهة نظرهن أن ده شىء فرض عليهن لمسايرة الأزواج و على حد قولهم : علشان الكيف يجمع !!

هنا بقى علاقة الحشاش بزوجته بتاخد منحنى آخر تماما .. الزوج المتعاطى دائما ما يكون أنانيا فى علاقته الخاصه يعنى لا يهتم اٍن كانت زوجته قد سعدت بالفعل أو لا .. المهم هو و كيف يمارس هذه العلاقه بطريقته الخاصه اللى ماكنش يقدر يعملها أو يكشفها لزوجته لو لم يكن تحت تأثير المخدرات اٍما بسبب الخوف أو الخجل أو الخلل النفسانى أو بسبب الوازع الدينى و النواهى الربانيه ..

و الزوجه أيضا ثبت أنها بتصاب ببرود و قلة اٍكتراث بالفعل الحميمي مع زوجها و غالبا ما تتمنى أن ينتهى هذا اللقاء المنفر بسبب ما هو ممكن أن يحدث من زوجها اللى تعلم و أكتسب عادات سيئه من جلسات تدخين الحشيش اللى هى أصلا بتلم الحثاله و الضايعين و كمان ممكن تكون بتنفر من رائحته اللى تغيرت بفعل المخدر اللى بيسرى فى دمه ..

التحاليل المعمليه أثبتت اٍن الحشيش اللى الناس مستهتره بخطورته تأثيره المدمر على خلايا المخ اللى لا يمكن أن تتجدد أقوى من تأثير الماريجوانا بخمس أو ست مرات .. و الماده الفعاله فى الأتنين هى مادة THC اللى بتختزن فى دهون الجسم و بتوصل لدرجة التشبع منها فبالتالى بيقل تأثيرها على المتعاطى فبيلجأ لزيادة الجرعه أو بيلجأ لأنواع أقوى من الحشيش لتعويض هذا النقص و هكذا من سىء لأسوء حتى تمام الضياع ..

قولوا لأ للمخدرات بكل أنواعها ..

اٍشرحوا مساوىء و أضرار الحشيش للى مش عارفها و قولوا اٍنه بيؤدى لأضرار جسيمه صحيه و اٍجتماعيه لا قبل لأحد بمواجهتها خاصة بعد غشه بمواد كيماويه و منشطات ضاره للغايه ..

قاطعوا الأفلام اللى بتعرض جلسات الحشيش على اٍنها جلسات حلوه و آخر فرفشه و اللى بتظهر الحشاش على اٍنه شخص لطيف و دم أمه خفيف و بيقول نكت و قفشات بتضحك و حاولوا قدر المستطاع منع الصغار من مشاهدتها ..

بينوا لمن تعرفوا اٍن الحشيش من المسكرات زيه زى الخمر اللى ربنا نهى عن تعاطيها و حملها و شرائها و مجالسة شاربها و وضحوا لهم اٍن المجنون لا يقذف باٍبنه من الشباك و لكن متعاطى المخدرات قد يفعلها ..

و أما أنتم أيها الحشاشين و الحشاشات فربنا يا يتوب عليكم يا ياخدكم و يريحنا من خلقتكم العكره ..

أحن اٍلى خبز أمى ..

سلام عليك يا أمى ..

و سلام على كل أمهات الدنيا ..

كل سنه و كل أم و كل بنت حتبقى أم فى يوم من الأيام بألف صحه و خير ..

يعنى من الآخر كده كل سنه و كل بنات أمنا حواء طيبيين :)

و آدينى نبهت يا بنات :)

مساء الخير يا بنات :)

اٍزيكم ؟؟

يعنى الحقيقه من الآخر كده أنا شايف اٍن الظروف و الجوابات تكالبت عليكن تكالب اللئام على قصعة الأيتام !!

لييييه ؟؟

صبركن عليا حالا حتعرفن لماذا و كيف و حيثما و رب ضارة نافعه ..

كلكن عارفين طبعا ظروف الشباب و اللى هم فيه من ضيق لذات اليد و ندرة فى الوظائف و الأعمال و بطاله أخذت بناصية الكل و أحلام الشقه و السياره و الشبكه و الجهاز و المهر و الفرح و فستان العروسه و ما اٍلى آخر تلكم الأحلام المتكسره كقارب قد تدشدش و راح فى الكازوزه على صخرة الواقع المر مرارة العلقم و على رأى الست سومه علجم و الله علجم ..

فصار حال الشباب عيضه ما بعدها عيضه بعدما فقدوا الأمل فى بناء حياه و مستقبل مع بنات الحلال المهذبات المحترمات بنات الناس المتعلمات اللى هن زيكن كده .. و أصبح الشباب اليائس اٍما فاسد أو منحرف أو مرتشى على قولة المرحوم السادات فى بيان ثورة يوليو المرحومه برضو ..

يقوم كمان يظهر فى الأفق موضوع كده لا كان على البال و لا على الخاطر يقضى على ما تبقى من أحلام الزواج لدى بناتنا المصونات اللى كان لسه عندهن أمل و لو واهى و تيجى وزارة الهجره النيوزلنديه و تقلبها دندره على دماغ الكل !!

اْزاااااى ؟؟

دلوقتى يا بنات نيوزلندا دى دوله بتعانى من نقص شديد فى صنف الرجال .. و الدراسات بتقول اٍن فيها 35 ألف فتاه فى سن الزواج يعنى من سن 25 ل 45 مش لاقيين رجاله يتجوزوهم علشان الرجاله اللى لسه عايشين عمرهم بيتراوح من 75 سنه ل 82 سنه !!

فبالتالى البنات هناك طبعا بيفضلوا حياة العنوسه على الزواج من رجال بيقولوا للدنيا باى باى يا حلوه ..

الحقيقه الغريبه كمان اللى قالتها الدراسات اٍن عدد النساء النيوزلانديات بيزيد عن عدد الرجال بنسبة 1 : 4 !!

يعنى كل 4 بنات بيتولدوا بيتولد فى مقابلهم ولد واحد و حتى الولد ده غالبا بيهاجر لدبى أو أستراليا و بيسيب بنات بلده عوانس ليس لهن اٍلا الفرجه على فيلم الوساده الخاليه (بس النسخه النيوزلندى) ..

تقوم بقى تيجى الحكومه النيوزلنديه الرشيده و يصعب عليها حال بنات البلد و يتفتق ذهنها عن فكره زئبقيه فتاكه ثلاثية الأبعاد و تقرر أن تستورد رجاله ليتزوجوا من هؤلاء البنات المناحيس النيوزلنديات .. و قررت أن تقدم كل معونه و مساعده ممكنه للشباب المستورد و توفر له بيت مجهز من ما أدراكن .. و سياره آخر موديل .. و وظيفه محترمه أو مزرعه صغيره لمن يرغب و مرتب ممتاز لحين التأقلم على العمل الجديد و الحياه الجديده .. و كمان الجنسيه النيوزلندى لمن ينجب .. و فوق كل ده بقى عروسه و قالوا زمان يرزق الهاجع و الناجع و النايم على صرصور ودنه ..

طبعا كانت أول بلد جاتها وزيرة الخارجيه النيوزلنديه لاٍستيراد رجاله هى مصر أم الدنيا .. و أبرمت اٍتفاقيه لتوريد الأصناف المطلوبه و هى عباره عن شباب مصرى زى الورد من حملة المؤهلات و الفنيين الماهرين و كمان اللى معاه قرشين و عاوز يستثمرهم هناك فطبعا أهلا به و سهلا و أفتحى الباب يا وزارة الهجره النيوزلنديه و زغرطوا يا بنات نيوزلندا جايلكن شباب وادى النيل اللى أجدادهم بنوا 3 أهرامات حد فى الدنيا عرف يبنى هرم واحد ؟؟

بعدها بقى حاولوا مع اٍيطاليا لزوم اٍستيراد شباب طليانى علشان برضو يسند شويه مع الشباب المصرى لكن أسمع اٍن محاولاتهم باءت بالفشل لأن الطلاينه قالوا لا و كلا نحن لا نتحمل نتيجة هذا لكن لو الشباب عاوزين يهاجروا لكم على مسئوليتهم الشخصيه فلا مانع ..

هع هع هع ..

نفسى بقى تتفرجوا على كم طوابير الشباب المصرى اللى يا عين أمهم بيقفوا بالساعات الطويييييييييييييله قدام سفارة نيوزلندا علشان تقديم الطلبات للهجره !! و هم لا حول و لا قوة اٍلا بالله لا يملكوا خبره و لا حرفه و لا مال و لا نيله على عين اللى جابوهم و لكن بيملكوا مجرد مؤهل دراسى يعنى حبر على ورق يمسحوا بيه لامؤاخذه وشهم .. يعنى رايحين الطرف الجنوبى من الكره الأرضيه مش شايلين أى حاجه سوى أنهم شايلين فى أيدهم سلاح ألا و هو شبابهم و صحتهم و عافيتهم اللى حتهدر على أرض نيوزلندا الشقيقه بعدما ضاقت بهم سبل الحياه و تقطعت بهم الأسباب و ضاع منهم حلم الزواج تحت وطأة الظروف المهببه ..

طيب و بعدين يا بنات ؟؟

اللى المفروض يبقوا عرسانكم نيوزلندا بتسرقهم !!

ينفع الكلام ده يعنى ؟؟

خيبكى الله يا حكومة نيوزلندا يعنى مش كفايه الشرط الرخم اللى أنتى حطاه ؟؟

آل أيه آل لا يزيد سن المتقدم للهجره و الزواج عن 28 سنه !!

ده باين عليهم ما يعرفوش المصريين :))

فتوة الاٍبره و الفتله !!

فى بوست مساء الحلاوه يا دنيا الفتاوى كان بيتهيألى كده اٍن فتوى تطليق الجيران لجيرانهم لو بيتناقروا و بيعملوا مشاكل هى فتوى مسخره و تهريجه مصريه كده من اللى أشتهر بيها المصريين :))

بس بجد بقى فتوة النهارده هى اللى ليها العجب بصحيح و هى اللى خلتنى أصدق اٍن صاحب الفتوى الأولانيه سيد العاقلين مقارنة بصاحبة فتوة النهارده .. أصلها بصراحه كده فتوى لوز أوى :))

بصوا يا أخوانا ..

حضرة الدكتوره صاحبة الوجه المألوف على الفضائيات و أستاذة الفقه المقارن بجامعة الأزهر و المعروفه اٍعلاميا باٍسم مفتية النساء أفتت فى برنامج عما يتسائلون اللى بينذاع على قناة دريم الفضائيه أنه يجوز شرعا التصدق من مال الزكاه على البنات لعمل عمليات ترقيع لغشاء البكاره قبل الزواج !!!!!!!

و أوصت بعدم اٍخبار الزوج لأنه لو عرف حتبقى مصيبه على دماغ البنت لاٍن مين اللى يقبل يتجوز واحده ذات تجربه و يمكن تجارب !!

و شرحت فضيلتها اٍن العمليه يجب أن تكون قبل ليلة الزفاف ب 24 ساعه حتى لا تفسد !!

و كمان قالت اٍنها عمليه سهله و مش جراحه بل هى غرزتين كده فى لامؤاخذه علبة اللولى و ينفع تكرر مره و أتنين و تلاته بشرط التوبه !!

و قالت اٍن لو كيس الجوافه اللى هو العريس اٍكتشف الملعوب يبقى حظ البنت كده و ليها رب اٍسمه الكريم !!

و النبى يا أبله اٍحنا اللى لينا رب اٍسمه الكريم .. رب اٍسمه العظيم .. رب اٍسمه العدل حنقف قدامه و حنقول لأ ما عملناش و لأ ما قلناش لكن حتشهد علينا أعضائنا .. يعنى أيدينا حتتكلم و تقول أنا عملت كذا و رجلينا حتتكلم و تقول أنا عملت كذا و كل حاجه بقى حتتكلم و حتقول أنا عملت كذا و كذا و كذا.. و ألسنتنا كمان حتشهد علينا و حتقول أيوه أصحابنا قالوا كده و كده و كده و خلونا ننطق كلام فارغ كان السبب فى قرطسة شباب زى الورد شربوا المقلب المظبوط و هم لا يعلمون !!

و النبى يا أبله سيبى البنات فى حالهم و ما تطلعيش فتاوى تشجع صاحبات النفوس الضعيفه على المضى قدما فى مشروع الترقيع لحسن الحكايه مش ناقصه و الشباب و البنات مكبوتين و طالعه روحهم طبيعى من ضيق ذات اليد و قلة الجواز يعنى الحياه أصلا مترقعه علشان المركب تمشى..

كله كوم و أموال الزكاه اللى حتنصرف على عش البلبل دى كوم تانى :))

يا أبله عيييييييييييييييب !!!!

أيه اٍنكتب لى ؟

Get this widget Track details eSnips Social DNA

مساء الحلاوه يا دنيا الفتاوى !!

مساء الخير ..

يعنى بجد صدق اللى قال اٍن المصريين ليهم كل يوم حاجه عجبه ..

أيوه ..

دى الحقيقه بصراحه .. خلينا ما نضحكش على نفسنا ..

تأملوا كده شويه بحبتين تأمل الأخبار اللى طالعه من مصر تلاقوا فعلا كل يوم فيه خبر و لا خبرين من أعجب ما يمكن أن تسمعه فى يومك ..

و آخر ما لقطته عيناى خبر عجيب غريب مثير للضحك و البكاء فى آن واحد .. أيه هو بقى ؟؟

شوفوا يا أخوانا ..

دلوقتى فضيلة الشيخ جمال قطب رئيس لجنة الفتوى بالأزهر سابقا طلع فتوى قالك فيها أيه ؟؟!!

قالك فيها اٍن من حق الجيران يروحوا يرفعوا دعوى على جيرانهم المتجوزين علشان يطلقوهم من بعض و يفرقوا بينهم لو كانوا دائمى الشجار و النقار !!

عجيبه دى و الله !!

و أنت مالك و مالهم يا حشرى يا رخم يا جارهم يا للى تستاهل قطع لسانك ؟؟

عاوز أفهم أنا بقى و أنت مالك ؟؟

يعنى واحد و مراته مثلا مزاجهم يتناقروا فى بيتهم علشان هو راجل نكدى و هى كمان بوز فقر و أم سحلول و بتحب المهابره زى عينيها أنت مالك و مالهم بقى ؟؟ أيه اللى حشرك بينهم علشان تروح المحكمه و ترفع عليهم دعوى الطلاق و تحرمهم من بوز بعض و تشرد عيالهم ثمرة النكد العائلى و أشبال نكد المستقبل ؟؟!!

يا فضيلة الشيخ ده لو صحت فتوتك حتبقى بيوت مصر العامره كلها ناس مطلقين و رجاله مخروب بيوتها و ستات قاعدين على الكنبه ناكشين شعورهم و دموعهم بتسح على خدودهم .. دى الفتوى مسئوليه يا مولانا الواحد بيتسأل عنها فى الدنيا و حيتسأل عنها فى الآخره يوم الموقف العظيم يوم لا ينفع مال و لا بنون اْلا من أتى الله بقلب سليم .. قلب سليم .. قلب سليم .. قلب سليم خالى من الذنوب و من الهبل اللى بيوقع الناس فى بعضها بسبب الاٍستهتار و الاٍستخفاف بعقول الناس البسيطه الغير مدركه لعواقب الأمور غير لما بتطربق على دماغهم ..

و أحمد الله حمد الشاكرين العارفين بفضله و اٍحسانه أن جارى اللئيم أبن اللئيمه اللى ساكن فى الدور الفوقانى لن يجد فى بيتى أى مناقره سوى المناقره بينى و بين الواد أبنى الكبير اللى على طول رامى ودنه معايا كل ما أتكلم فى الموبايل زى ما يكون هو اللى أبويا !! و لا يمكن جارى الرخم ده حيروح يرفع عليا قضية تفريق بينى و بين الواد أبنى !! ما هو زمن العجايب بصحيح ..

بجد يا مصر كم فيكى من مضحكات و لكنه ضحك كالبكاء ..

ربنا يشفى كل مجنون ..

الأشجار لا تموت واقفه و لكن مقطوعه ..

شاءت المقادير أول اٍمبارح أن أخلص النيه و أتوجه عن بكرة أبى - رحمة الله عليه - لورشة الأسطى طاطا اٍستشارى تصليح الرادياتيرات و ذلك للحام الثقب اللى أصاب ردياتير سيارتى المصونه و اللى أشك أنه ممكن ثقب الأوزون يتصلح و لكن لا ينصلح حال ثقب ردياتيرى اللى دوخنى و لففنى السبع دوخات و اللى كان السبب فى مشاكل جمه يطول هنا شرحها ..

و من شارع عمومى لشارع أضيق حبتين لحاره لزقاق زغنون لا يصل اٍليه اٍلا العارفين بخبايا حوارى الكوم الأخضر حتى وصلت لورشة الأسطى طاطا اللى كان لسه بيعمل اٍصطباحة الشاى الحبر و بيحبس بحجرين بعد الفطاره المصريه الصميمه اللى كلكم عارفينها و اللى بجد بتربس الدماغ و بتخللى اٍبن آدم مش فاهم شماله من يمينه و لا حول و لا قوة اٍلا بالله ..

و أتحل الردياتير .. و بدأت العمليه .. و بان التوتر على خلقة الأسطى طاطا و هو بيعاين الثقب الجهنمى اللى أكتشفه بعد جهد جهيد .. و بانت علائم هذا التوتر خاصة لما بدأ ينادى على الصبيه من مساعديه ليناولوه القصدير و مسدس اللحام بأسماء و كنيات تتصل اٍتصالا مباشرا بعلم التشريح .. و فجأه !!

و فجأه ..

تناهى لأسماعى صوت ضجيج و خبط و رقع جاى من الشارع اللى بتتفرع منه الحاره اللى بيتفرع منه الزقاق اللى فيه الورشه .. فدفعنى الفضول دفعا أنى أروح أبص لى بصايه كده أستطلع بيها سر هذه الجلبه الجلباء ..

ففوجئت !!

بجد فوجئت ..

فوجئت بتلاته شحوط واحد فيهم ماسك سنجه و التانى ماسك بلطه و التالت ماسك منشار و هاتك يا دق فى شجره عملاقه غايه فى الجمال و الروعه و عاوزين يقطعوها من على وش الأرض !! الشجره يا قلب أمها و ال3 شحوط بيقطعوها

طبعا قطع الأشجار جريمه يعاقب عليها القانون المصرى بصريح العباره .. و أيضا نبينا الهادى صلى الله عليه و سلم أوصانا بأنه لو قامت القيامه و فى يد أحدنا فسيله يعنى شتله فليتمم غرسها فى الأرض يعنى شوفوا مدى الاٍحترام للأشجار ممكن يوصل لأيه ؟؟

و بعدين على المستوى الاٍنسانى فاٍحترام الخضره أمر واجب لا نقاش فيه .. و أما على المستوى الشخصى فبصفتى فلاح اٍبن فلاحين لا أحتمل أبدا أن تؤذى نبته خضراء فما بالكم بشجره عملاقه جميله تظلل فروعها الوارفه على ما يحيطها من بشر و حيطان ؟؟

ربكم و الحق أنا لسه بأفكر فى عقل بالى عن التصرف الواجب فى مثل تكلم الأمور اٍلا و ألاقى الموبايل بيرن تقوم تطلع البرنسيس شمس النهار بتقول لى بصوتها اللى من مقام دو صغير :

- صباح الخير أنت فين ؟!

و يبدو اٍنها سمعت الدوشه اللى جنبى ..

قلت لها :

- بأتفرج على جريمه !!

بان الفزع على صوتها و قالت بنبرة خضه برنسيساوى كده :

- جريمة أيه ؟؟ أنت فين ؟

رديت عليها و أنا أتابع الشحوطه التلاته و هم بيكملوا ذبح الشجره المسكينه :

- جريمة قطع شجره يا برنسيس .. تخيلى لسه فيه ناس بتقطع الشجر !!

قالت بدون تردد :

- أطلب لهم البوليس حالا ..

- بوليس أيه يا برنسيس ؟؟ ده أنا فى سوق فكيهه يعنى البوليس ما بيدخلش هنا اٍلا لو فيه جريمة قتل و بعد تفكير كمان !!

سألتنى :

- بتقول سوق مين ؟؟

شرحت لها أن سوق فكيهه دى منطقه يعنى خطره شويتن تلاته أربعه عشره كده و أنها فى شارع ترسا اللى بيمتد من ترعة المريوطيه لحد الطالبيه و أن المشاكل فيه بيحلها أصحابها بدون تدخل من الشرطه و غالبا بيكون الحل سهل خالص و بسيط بواسطة قانون الغابه اللى هو أن القوى بيطحن الضعيف و بيخرسه للأبد ..

هنا بقى البرنسيس شمس اٍستغربت من كلامى .. طبعا لازم تستغرب .. ما هى أيه عرفها بمثل هذه المناطق ؟؟

طيب . اٍستئذنت منها علشان أصور ما يحدث و لتكن الصور خير شاهد على مثل هذه الجريمه النكراء ..

الشحوط التلاته و هم بيزقوا الشجره علشان تقع بعد ما أتموا تكسير جذعها

توجهت لهم و حاولت أستفسر منهم عن سبب قطعهم للشجره .. ففوجئت بما لم يكن فى حسبانى أبدا !!فوجئت أنهم عمال من رئاسة الحى و أنهم مكلفين بهذا الفعل الاٍجرامى رسميا لأن الشارع حيتسفلت و أنهم حيقطعوا كمان 5 شجرات بتعوق أعمال الرصف !! اٍزاى يعنى مش عارف ؟؟ بس هو كده !! طبعا الحوار معاهم كان عقيم خاصة أن لا أحد من سكان الشارع تدخل لمنعهم بالعكس كانوا بيتفرجوا و هم ساكتين و كأنهم واكلين سد الحنك .. و مما زاد عجبى أن تكون الأشجار الخضراء العملاقه سبب لتعطيل أعمال رصف الطرق و دى حاجه أول مره أسمعها !! و بعدين لما هم مهتمين كده أوى بالمناطق العشوائيه طيب ما يحلوا الأول المشاكل الخاصه بهذه المناطق و أولها توصيل مياه الشرب النقيه بشكل منتظم مش ساعتين بس فى اليوم زى ما بنسمع ..

كاد الأمر أن يتطور لمشكله و مشاده عنيفه بينى و بين المجرمين التلاته خاصة بعد أن لوح لى كبيرهم بكارت منع موظف عمومى من أداء عمله فما كان منى اٍلا أن رديت عليه بما يستحق هو و زملاؤه و رئيسه المباشر اللى أصدر هذا القرار بذبح هذه المخلوقات الجميله اللى بتسبح ربنا و لكن لا نفقه تسبيحها ..

و تدخل الناس المتجمعين للفرجه على الجريمه لتهدئة النفوس و كانوا مستغربين من تصرفى رغم ضعفه و عدم اٍيجابيته فى رأيى و لكن عشمى فى الله أن يقضى فى المسؤول عن هذا الفعل الاٍجرامى بما يليق و يستحق ..

و أتم المجرمون فعلتهم .. و غادرت هذا المكان و الحزن يسيل من قلبى و أنا شايفهم بيسحبوا أشلاء الشجره الجميله بما عليها من أعشاش عصافير كانت تغرد عليها كل صباح ..

ربنا لا تؤاخذنا بما فعل السفهاء منا و أقض فيهم بعدلك يا أعدل العادلين ..

الشجره الغلبانه بعد ما دبحوها المجرمين التلاته

الاٍعدام علنا !!

تحية شكر و تقدير للسيد المستشار مختار مختار شلبى رئيس محكمة جنايات كفر الشيخ الذى قضى أمس بتنفيذ حكم الاٍعدام شنقا حتى الموت بعد أن صدق فضيلة مفتى الديار المصرية على الحكم فى حق المجرمين العشره اللى خطفوا سيده آمنه من بيتها و أنتزعوها بالقوه من وسط أطفالها الصغار و لم ترق قلوبهم لبكائهم و فزعهم و لا لبكائها و فزعها و أقتادوها وسط الزراعات و تناوبوا اٍغتصابها لمدة 3 ساعات متواصله حتى فقدت الوعى و عثر عليها الأهالى فى حالة يرثى لها ..

مبروك مسبقا على تنفيذ حكم الاٍعدام فى المجرمين العشره كما قضى الله على المفسدين فى الأرض ..

أتصور مدى ألم و معاناة السيده اللى وقع عليها هذا الفعل الشيطانى المؤلم و اللى أكيد لازالت تعانى منه و من آثاره النفسيه المدمره ..

أتصور أيضا مدى الفزع اللى أصاب أطفالها الصغار و هم شايفين بعينيهم أمهم و هى بتنتزع منهم و بتختطف من وسطهم بالقوه لينتهك شرفها و اٍنسانيتها و آدميتها بغير ذنب جنته غير اٍنها أنثى ليس أكثر .. هكذا خلقها الله بغير اٍراده منها .. يعنى لا هى مثلا كانت بتشتغل فى مكان مش ولابد يعنى و لا هى كانت ماشيه فى الشارع لابسه ملابس مثيره و لا يوجد أى سبب يدعونا للاٍعتقاد أنها حرضت مغتصبيها بشكل أو بآخر على خطفها و اٍغتصابها .. بالعكس دى أم لأورطة عيال و قاعده فى بيتها فى أمان الله لا بيها و لا عليها !!

لا حول و لا قوة اٍلا بالله ..

عندى اٍقتراح و مش عارف مدى صحة قانونيته من عدمه و ربما يفيدنا فيه أخونا المتر محمود صاحب مدونة قصر الرئاسه حيث أنه محامى متمكن و أثق فى فتاويه القانونيه ..

بأقترح يا جماعه أن يكون تنفيذ حكم الاٍعدام فى هؤلاء المجرمين العشره علنيا و بحضور الضحيه نفسها و بحضور جوزها و أقاربها أيضا لعل هذا يشفى شىء من غل صدورهم و أن يكون فى ميدان عام يحضره الناس و يشاهدوه ليكون عبره للمجرمين الآخرين اللى لو فكروا للحظه على الاٍقدام على مثل هذا الفعل القبيح اللى أصبح بيتكرر كثيرا لأرتدعوا فورا و لتمثلت فى أذهانهم المريضه صورة المجرمين العشره و هم بيتأرجحوا على حبال المشانق ..

عارف أنه اٍقتراح عنيف و قاسى و ربما لا يلاقى قبول لدى الكثيرين .. و لكن عندى قناعه تامه أن لا شىء يردع المجرم سوى خوفه الشديد من العقاب الشديد ..

للمره التانيه بأشكر قضاء مصر العادل النزيه و ربنا يحفظنا و يحفظكم من كل شر ..

الورد جميل جميل الورد :)

مساء الخير ..

الورده اللطيفه دى عجبتنى جدا و حبيت أشارك كل أصدقائى التمتع بيها و بعتها فى ميل لعدد كبير من اللى اٍعتادوا الدخول و التعليق عندى بس للأسف فيه برضو كتير منهم مش حاطين عنوان لأميلاتهم فمعرفتش أبعتها لهم ..

فأسمحوا لى أشاركهم بيها هنا و لتكن عربون موده و أخوه و صداقه ..