حبشتكنات فلسفية

دلع نفسك و أبدأ من جديد

2011-08-21T23:46:00.001+02:00

فاقد الشىء لا يعطيه .. و اٍن لم تشعر بالاٍشباع الداخلى تماما فلن تكون بقادر على أن تعطى الآخرين و لا حتى لأقرب المقربين اٍليك ..
أرى من الأهمية بمكان أن تولى نفسك قدرا هائلا من الرعاية و الاٍهتمام ( دلع نفسك ) اٍهتم ببهجتك الداخلية و بمظهرك الخارجى .. اٍحرص على النظافة و التأنق و أستعمل أرقى العطور و لا تبخل و أبتعد عن مسببات الغم بقدر اٍستطاعتك .. كل اٍنسان منا مسئول عن مسرات نفسه بما يرضيه و فى حدود المقولات و الأعراف الدينية و الاٍجتماعية تبعا لاٍلتزامات و معايير أخلاقية معينة ..
حين تصل لمرحلة أن تبهج نفسك و تشبعها بالمسرات ستكون مصدرا للبهجة و المسرات لكل من حولك .. تشع عليهم من فيض روحك المبتهجة بغير حساب .. عندها لن تشغل بالك كثيرا بمعادلات العطاء و التضحية فلسوف تتفجر بداخلك ينابيع الحق و الخير و الجمال و تفيض على حياتك بدون توقف ..

عقدة الرباط

2011-08-20T12:28:00.000+02:00

لو أردت أن تغير من ظروف حياتك للأحسن فعليك أولا أن تغير من منهاج تفكيرك .. فى كل مرة مثلا يرن فيها هاتفك تتوقع أن يكون الطالب أحد دائنيك حتى من قبل أن تنظر لترى الاٍسم .. و أتوقع بالفعل أن يصدق تخمينك فتجده دائنا يطالبك بماله .. فى كل يوم تتوقع أن يتكاثر عليك دائنوك مطالبينك بسداد ما فى ذمتك لهم ستجدهم أمامك و حولك يتربصون بك فى كل اٍتجاه !!
اٍذا ركزت جل تفكيرك فى الأمور السيئة ستجدها متمثلة أمامك تتجسد لك كاٍستجابة طبيعية لأفكارك التى تركز فيها بشدة .. أليس هذا ما يحدث ؟؟
البعض يصيبهم الجنون من تجسد مثل تلك الهواجس فى حياتهم على الدوام و قد نبعت أساسا من عقلهم هم و لا أحد غيرهم بقادر على التخلص منها .. و مع كل خطوة يخطونها فى يومهم مثلا يراودهم سؤال ملح يتعلق بوقوع شىء سىء فلا يلبث – و ياللعجب – أن يقع لهم بالفعل !!
على الاٍنسان أن يتوقع الخير حتى يفسح لقوانين الطبيعة الفرصة لتعمل عملها فى حياته .. فتوقع الخير هو بمثابة اٍعلان جديد من الشخص للذبذبات الكونية عن اٍستعداده لتلقى أخبارا سارة أو أحداثا مبهجة و العكس صحيح .. فالرغبة هى عقدة الرباط بينك و بين ما ترغب اٍن كان حسنا فهو حسن و اٍن كان سيئا فهو سىء ..

الحب و الاٍحترام

2011-08-18T18:00:00.001+02:00

هل تتوقع أن تستمتع بصحبة الحياة و أنت شخصيا لا تستمتع بصحبة نفسك ؟؟
بمعنى آخر : هل تتعامل مع ذاتك كما تحب أن يعاملك الآخرون ؟؟
عندما لا تتعامل مع نفسك بالشكل الذى تريد من الآخرين أن يعاملوك به فأنت لا تستطيع أبدا أن تغير من واقع حياتك لأن أفعالك نتاج لأفكارك .. فاٍن لم تتعامل مع نفسك بمنتهى الود و الاٍحترام فاٍنك تعلن للعالم أنك غير ذات أهمية فى الكون الفسيح أو انك لا تستحق أن يعاملك الآخرون كما ينبغى ..
هذا الاٍعلان منك سيستمر فى الاْنتشار و التوغل و سيعرف به كل من يتعامل معك حتى و اٍن كان يتعامل معك للمرة الأولى .. و ستمر عليك مواقف لا حصر لها يخيم عليها عدم الاٍحترام و كل هذا نتيجة فقط ليس اٍلا لعدم تعاملك بالاٍحترام الكافى مع نفسك ..
كى يحترمك الآخرون عليك أن تعامل نفسك بالحب و الاٍحترام اللائقين بك .. و تبث تلك المعلومة فى حياتك و المتعاملين معك .. عندها ستبدأ قوانين الطبيعة فى عملها و ستجد أن حياتك قد اٍمتلأت بمن تتبادل معهم مشاعر الحب و الاٍحترام .

ماض و أنطوى

2011-08-17T17:25:00.002+02:00

لما بنستعرض أحداث الماضى بكل ما فيه كتير بنركز على الأحداث المؤلمة و الظروف القاسية اللى واجهتنا .. الحقيقة أننا بالشكل ده بنستحضر المزيد من الأوجاع و برضو الظروف القاسية الصعبة لنفسنا فى الزمن الحاضر ..
بمعنى أننا مثلا لو ركزنا التفكير شويه فى شخص أو أشخاص مروا علينا فى حياتنا و سببوا لنا ألم بشكل ما أكيد حنشعر تجاههم بالضغينة و الكره الحقيقة أننا بنؤذى نفسنا بطريقة التفكير العقيمة دى مش بتؤذيهم هم ..
محدش بيقدر يرسم حياته اللى يستاهلها غير الشخص نفسه .. فلو ركزت تفكيرك شويه بشويه فى الجوانب الاٍيجابية فى الحاضر أؤكد لك أن الحياة اٍن شاء الله حتكون أجمل بكتير بشرط أن يكون عندك مشاعر طيبة تجاه الحياة نفسها .. متصالح معاها مش مخاصمها و منتظر منها أنها تبتسم لك ..
كل المطلوب للوصول للنتيجة دى هى محاولة البدء فى النظر للحياة بوجه جديد و عقلية جديدة تخلو من شوائب و عقد و أحقاد الماضى و النتيجة اٍن شاء الله مضمونة .. بس نبدأ .

العطاء و التضحية

2011-08-17T08:50:00.001+02:00

الفرق كبير بين العطاء و التضحية .. فالعطاء النابع من القلب عن طيب خاطر تجده يحمل فى طياته شعورا غامرا بالمشاعر الطيبة و المحبة .. و أما التضحية فلا تحمل مثل هذه المشاعر الحميمة .. فلا يجوز الخلط بينهما فى التعريف ..
العطاء و التضحية يتعارض أحدهما مع الآخر .. فالعطاء فيه تعبير عن محبتك للآخرين حتى و اٍن كانوا من غير القريبين منك و التضحية لا تحمل بذاتها كل هذه المشاعر اٍذ أنها فى نهاية الأمر ستؤدى طبقا لقانون التكرار للضيق و النقمة ..
العطاء النابع من قلب عامر بمحبة الكون و الآخرين هو سر بهجة الحياة و مفتاح سعادتها .. و قانون الجذب الكونى سيلتقط منك هذا الفعل الاٍنسانى المحبب و يرده لك أضعافا مضاعفة و عندها ستشعر بالفرق الكبير بين حياتك بغير عطاء و حياتك و أنت تعطى و تعطى بغير مقابل ..

أجساد و خلايا جديدة تماما

2011-08-16T19:54:00.001+02:00

فى حقيقة الأمر هناك أجزاء و خلايا من أجسادنا تستبدل كل يوم بأجزاء و خلايا جديدة .. منها ما يحتاج شهورا و منها ما يحتاج لأعوام و أعوام .. و لكن فى النهاية و بعد أمد طال أم قصر يكون لكل منا جسد مادى جديد ..
فاٍذا كانت أجسادنا بكاملها تتبدل بأجساد و خلايا جديدة كما أثبت العلماء ذلك اٍذن فكيف للوهن و المرض أن يسكن فى الأجساد لأعوام ؟؟ هذا غير منطقى أبدا !!
لا يمكن أن تبقى العلات و الأمراض تسكن الأجساد اٍلا من خلال الاٍستسلام لها و المبالغة فى التفكير فيها عن طريق الاٍنشغال فقط بالمرض و مراقبته و بتوجيه كافة وسائل الاٍنتباه له ..

الرضا و السخط

2011-08-16T03:29:00.001+02:00

الأشخاص الذين يعيشون مستمتعين بالرضا لا فرق بينهم و بين غيرهم اٍلا فى أمر واحد : و هو أن من يعيشون مستمتعين بسحر الحياة راضين مرضيين قد اٍكتسبوا عادات معينة و سلوكيات خاصة محددة للوجود تعينهم على مصاعب الحياة ..
لقد اٍكتسبوا عادة الاٍستمتاع بما هو متاح لهم .. هؤلاء الراضون تقع لهم أشياء يومية تشبه المعجزات يغبطها عليهم الساخطون على الدوام .. لأن الراضين يستخدمون رضاهم طوال الوقت و ليس أبداً لمرة واحدة على حسب الأحوال كما يفعل الساخطون ..

الأفكار تولد المشاعر

2011-08-15T23:21:00.003+02:00

لا أحد يستطيع أن يخبرك بحقيقة مشاعرك اٍن كانت طيبة أو سيئة اٍٍلا أنت نفسك فأنت الوحيد القادر على معرفة طبيعة مشاعرك الدفينة .. و اٍذا لم تكن واثقاً تمام الثقة من حقيقة مشاعرك فأطرح على نفسك السؤال التالى : ما طبيعة شعورى الأن ؟؟
هذا السؤال اٍن طرحته على نفسك مرات عديدة خلال اليوم سيصير عقلك أشد اٍدراكاً لطبيعة شعورك ..
الأهم من هذا هو أن تعلم أنه من رابع المستحيلات أن تكون مشاعرك سيئة فى نفس الوقت الذى تراودك فيه أفكار طيبة فهذا عكس قوانين الطبيعة .. لماذا ؟؟ لأن الأفكار هى التى تولد المشاعر .. فاٍن اٍنتابك شعور سىء ردىء فهذا يرجع لأفكارك السيئة الرديئة التى تولد لديك هذا الشعور البغيض .

البهجة و الشعور السىء

2011-08-15T02:18:00.003+02:00

عندما تشعر بشعور سىء حيال نفسك يبدو الأمر و كأنك أنت نفسك تستنفد طاقة الحياة بداخلك .. و هذا لأن كل ما فيه خير لك سواء على صعيد الصحة أو الثروة أو الحب يكون على تردد البهجة و الشعور الطيب و ليس على تردد الشعور السىء ..
شعور اٍمتلاك كمية هائلة من الرضا و الطاقة الاٍيجابية و هذا الاٍحساس المدهش بالقوة و العافية كلها أحاسيس تقع على تردد الشعور الطيب .. و عندما لا تشعر بالرضا عن نفسك أو تراودك مشاعر سيئة تجاهها فاٍنك تصبح على تردد يجذب لك المزيد من الأشخاص و المواقف و الظروف التى ستستمر فى دفعك اٍلى الشعور السىء تجاه نفسك و الآخرين ..

عدنا ......

2011-08-13T16:54:00.006+02:00

مساء الخير عليكم و كل سنة و أنتم طيبين
بدون مقدمات و كلام كتير وحشتونى و مدونتى وحشتنى
حوالى سنتين و أنا منقطع عنها تماما و شعرت النهارده برغبة و حنين جارف للتدوين فسميت بالله و دخلت
قبل كل شىء أود أن أشكر أصحاب مئات التعليقات اللى وجدتها بالمدونة و محتاجة للاٍشراف اللى بيسألوا عنى و بيطمنوا عليا خلال فترة اٍنقطاعى و بجد مكنتش بأدخل المدونة خالص و لم تتح لى الفرصة لشكرهم أو طمأنتهم و بأستميحهم عذرا أنى لن أنشرها فيكفى مشاعركم النبيلة نحوى
و كمان بأشكر كل من أرسل لى تعليق كتعزية فى الراحلة أمى رحمة الله عليها و أخص بالشكر العميق الأستاذة ندا الياسمين اللى عملت بوست مخصوص لتعزيتى و برضو معرفتش غير النهارده و بأشكر أيضا كل اللى دخلوا البوست ده و قدموا لى العزاء و لم أشكرهم من أعماق قلبى على مشاعرهم الطيبة لآ أراكم الله مكروها فى حبيب لديكم

أشعر بسعادة و فرحة غامرة لكونى أعود اٍليكم و أعود لمدونتى
و نبدأ على بركة الله التدوين
ده أنا حأصدعكم بوستات بس صبركم عليا :)

السيكوباثيه سلوك فردى ربما ينقلب لسلوك مجتمع بكاااااامله

2009-10-10T20:02:00.009+02:00

مساء الخير ..
حأدخل فى الموضوع على طول علشان أعزائى اللى بيشتكوا من طول بوستاتى مايتضايقوش .. مع أن الحكى يحب كتر الكلام و الكلام يحب السلام و السلام طاير حمام و ما يحلى الحكى اٍلا بذكر سيدنا النبى عليه أفضل الصلاة و السلام ..
دلوقتى أنا ملاحظ أنه بقى فيه اٍتجاه جماعى ناحية السلوك السيكوباثى بعد ما كان فيما مضى سلوك فردى و شخصى ليس بالندره يعنى و أيضا لم يكن بالكثره اللى بنشوفها اليومين دول و ده مؤشر خطير يدعو للقلق بجد ..
للاسف لم يعد من النادر أن نقابل فى حياتنا اليوميه أشخاص يتسم سلوكهم بالسيكوباثيه .. بل و لم يعد من العسير أن نتفاجىء بشخص ما يفتخر بغير قصد منه و لا علم بخصائص هذه الشخصيه شديدة التعقيد و الوعوره أنه سيكوباثى بكل ما تحمل الكلمه من دلاله ..
طيب .. ما هى خصائص هذه الشخصيه الغير سويه و الخطره جدا على الآخرين ؟؟

السلوك السيكوباثى عرفه علماء التحليل النفسى بأنه سلوك بيسير دوما فى اٍتجاه واحد و هو سلوك الضرر بالمجتمع و اللى فيه نتيجة لسعان مستمر فى فيوزات عقل الشخص بيولد كم عنف مهول و شرير حتى لأقرب الناس له و فيما نشاهد من جرائم مستحدثه على المجتمع شديدة القسوه و الدمويه خير شاهد على هذا .. لأن السيكوباثى بيكون مندفع متهور .. متبلد الحس .. عمره ما يشعر بالندم و لا بالذنب .. اٍنسان أنانى و صعب يتعرف سبب أنانيته ..
الشخص السيكوباثى بيبقى غير ناضج عاطفيا .. فاقد للقدره على عمل كونترول على دوافع و محفزات سلوكه الشخصى .. فاقد الرادع لضميره و لا يشعر بالندم على تصرفاته المشينه تجاه المجتمع و قيمه العليا ..
علاقته بالآخرين علاقات كلها سطحيه و أى كلام مايقدرش يحافظ على علاقات دائمه و لا حتى صداقات طويلة الأمد .. و ده برضو بينطبق على علاقته بزوجته و أولاده اللى بيستغلهم طول الوقت زى ما بيحاول يستغل كل المحيطين به بمختلف الطرق المشروعه و الغير مشروعه ..
السيكوباثيك اٍنسان وصولى متطفل يسعى للتقرب من أصحاب السلطه و يتمسح بهم و يعملهم أراجوز علشان يظل فى ركابهم و لا يجد أى غضاضه فى أن يستعمل أحقر الطرق و أدناها للوصول لهدفه ..
مش بيكون عنده خجل و لا اٍحساس بالعيب و لا شهامه و لا نخوه و لا اٍحترام للآخرين .. كمان بيمتاز السيكوباثى بفقدان شعور الرحمه و التعاطف مع الآخر .. بيفقد شويه بشويه ملكة التفكير المنطقى اللى بيتماشى مع عادات و تقاليد مجتمعه ..
السرقات الصغيره التافهه سلوك لدى السيكوباثى و غالبا بيكون مش محتاج لهذه السرقات اللى ممكن تكون مجرد قلم أو ولاعه من أم جنيه و نص المهم أن يشعر بالرضا الداخلى حال اٍيذائه للمسروق ..
بتحصل له اٍثاره جنسيه مفاجئه ربما بدون سبب واضح و بينساق برضو فجأه خلف نزواته بدون تفكير عقلانى لا فى الدوافع و لا فى العواقب و ده بيفسر بوضوح جانب خفى من حوادث التحرش الجنسى الفردى و الجماعى زى ما رأينا مؤخرا ..
لما بيصل الأمر للقتل بيكون عنيف جدا و بيتعمد تعذيب ضحيته أولا قبل الاٍجهاز عليها و قد يغتصب جثة ضحيته بوحشيه و قد يمزقها أشلاءا للتخلص منها بقسوه و بقلب ميت و عين لا ترمش ..
السيكوباثى اللى غالبا بيمتاز ببنيه قويه و جسد رياضى بيبقى كييف يأذى الأخرين بأى شكل و لو حتى اٍيذاء نفسى و بيشعر بمتعه فائقه لما بيقدر يفلت من العداله مستعملا حيله و طرقه و أساليبه الملتويه لكن لما بيقع بيولول و يقول تعالى لى يا امه و يبكى و يبوس الشوز طلبا للرحمه ..

الجماعه النفسنجيه ( يعنى بتوع علم النفس ) قالوا اٍن السيكوباثيه بتبدأ فى التكوين داخل النفس البشريه بعد سن المراهقه بشويتين .. و أنا لى رأى مختلف برضو شويتين ..
فى رأيى المتواضع أرى أن السيكوباثيه بتتكون لدى الشخص فى سن مبكره غالبا فى السن ال 13 .. لييييه؟؟
لأن ده السن اللى بتتطور فيه السلوكيات الغير مقبوله نوعا لسلوكيات منحرفه تماما و أهم علامه له هى الكذب عمال على بطال .. يعنى المراهق يبدأ الكذب فى الصغيره و الكبيره بدون سبب منطقى و يبقى الكذب فى حنكه زى اللبانه حتى فى الأمور اللى لا تحتمل الكذب و لا تستحقها ..
نضيف على الكذب اٍهتمام المراهق المبالغ فيه بالأمور الجنسية و السعى لفهم جوانبها الخفيه بغض النظر عن مصادر معلوماته اللى غالبا كلها تخاريف و كلام غير مقبول ..
السيكوباثى الصغنون اللى لسه بيتكون ممكن كمان يجرب التدخين و المخدرات و الكحوليات و يقلد الكبار فى كل شىء بما فى ذلك العنف و الدمويه و القسوه و اٍيذاء الآخرين ..
أزعم و بقلب جامد أن السلوك السيكوباثى بينشأ لدى الأشخاص اللى أتربوا فى طفولتهم على الطاعه العمياء اللى لا مناقشه فيها على يد أبوين قساه طول الوقت بيدوا أوامر لا جدال فيها بغير حتى ما يغلفوا هذه الأوامر بشىء من الرحمه و الحنان .. بالاٍضافه للعامل الاٍقتصادى و الاٍجتماعى اللى نشأ فيه الشخص المريض و كمان السمات الشخصيه و الخصائص الوراثيه ..
و لذلك نجد أن السلوك السيكوباثي بيبدو واضح و جلى فى المجتمعات اللى رزحت سنين طويله تحت حكم ديكتاتوريه مطلقه عودت شعوبها على الخضوع و العبوديه و ليس لهم أى حق فى المطالبه بالعدل و المساواه و حتى لو طلبوا فيبقوا كلاب و بتهوهو و ماحدش حيعبرهم ..
آدى خصائص السلوك السيكوباثى .. و آدى أسباب تكونه و ظهوره .. و آدى الشخص السيكوباثى فأجتنبوه .. و آدى البيضه و آدى اللى قشرها و آدى اللى قال هات حته حته حته ..
تقبلوا تحياتى و سامحونى على شوية التهييس فى هذا البوست الخريفى أبو صفين زراير على جنب و غالبا ده بسبب المسكنات الأمريكانى اللى خلتنى مش عارف وش الرغيف من قفاه ..

الذل !!

2009-10-06T21:58:00.002+02:00

الهلاوس ..

2009-09-30T20:47:00.004+02:00

أسعد الله مساءكم بالخير أعزائى المدونات و المدونين ..
عاوز أتكلم النهارده عن موضوع أتكلم عنه عمنا سيجموند فرويد مؤسس علم التحليل النفسى و أزعم أنه يستحق هذا اللقب عن جداره رغم ما أثير من شبهات حول منهجه المرفوض من قبل الكثيرين ..
عمنا فرويد أبدى اٍهتمام شديد بموضوع (الهلاوس) و هو جمع هلوسة .. يعنى هلوسايه على هلوسايه يعملوا هلاوس و يبقى قائلها لغويا مهلوس و فى قول آخر مهيس و الله و رسوله أعلم ..
فرويد أطلق تعريف بسيط خالص و صغنون و لطيف على الهلاوس و عرفها بأنها ببساطه شديده اٍدراك حسى فى عقل المهلوس بدون موضوع خارجى حقيقى !!
تعريف بسيط جدا لكن فى حال تأمله سنجده موضوع على جانب خطير من الأهميه القصوى لما له من اٍرتباط وثيق بالصحه النفسيه و العقليه للفرد و علاقاته بالمحيطين به بل و بكل العالم الخارجى من حوله ..
اٍزاى ؟؟
صلوا بينا على حضرة النبى المصطفى خير الأنام ..
لما بتشتد الضغوط النفسيه على الشخص و بيتعرض لمواقف حياتيه صعبه نوعا ما بيمر غصب عنه بأزمات نفسيه بتختلف فى حدتها و قساوتها .. و فى نفس الوقت بتختلف معاييرها العقليه و القياسيه من شخص لآخر على حسب الفروقات الفرديه الموجوده لدى الجميع .. و اٍذا صادفت هذه الأزمات ضعفا نفسيا طبيعيا أو اٍستعدادا أصليا لعدم القدره على تجاوزها و هضمها بتتحول هذه الضغوط لأفكار يتحدث بها الفرد مع نفسه داخل عقله أولا ثم لا تلبث هذه المحاورات العقليه الداخليه بسبب عدم وجود متلقى لها أن تتحول لهلاوس تخرج بصوت مسموع قد يتخذ أشكالا متعدده كالحديث مع النفس أو كتابة خواطر و أفكار أو حتى على شكل مقطوعات موسيقيه يغلب على كل هذه الأشكال الطابع الهلوسى ..
عتاولة التحليل النفسى أدلوا بدلوهم فى هذا الموضوع و وقفوا عند نقطه مهمه فيه و قالوا اٍن الهلاوس اٍذا أقتصرت على مواضيع مبهمه ليس لها ملامح محدده زى أن يتحدث الشخص عن رؤيته فلاش سريع الاٍضاءه أو زنه كده فى الودان قصيرة الأمد فده بيسموه هلاوس أوليه ..
و لو أهملها الشخص و أستسلم لها بتقلب لمرحلة الهلاوس المركبه و فيها بيخيل للمريض أنه بيقابل أشخاص معينين و بياخد و يدى معاهم فى الكلام .. و كمان ممكن يقابل فى طريقه حيوانات و أشياء لا وجود لها .. و بيتخيل فى ذهنه وقائع و أحداث لم تحدث أصلا و بيقيم عليها اٍفتراضات بيتعامل معها على أنها واقع لا شك فيه و بيرفض تماما محاولات الآخرين تصحيح ما يراه حقيقه واضحه كالشمس فى ذهنه .. نيجى بقى للسؤال اللى حير المحلل النفسى : أيه اللى بيوصل الشخص لمثل هذه الحاله اللى مش بيقدر فيها يسيطر على حواره العقلى الداخلى و بيحوله لهلاوس على شكل كلمات مسموعه أو مكتوبه خاصة لما بيكون لوحده بدون وجود أشخاص آخرين من حوله ؟؟
فيه هنا اٍجابتين : تفسير بيقول أن هذه الهلاوس تفريغ لكم هائل من الهموم الداخليه لدى الفرد .. و تفسير تانى بيقول أنه من لوازم الاٍبداع فى مختلف أفرع الفنون ..
أنا شايف و الله أعلم أن الاٍنسان على طول مسيرة حياته بيقابل صعوبات جمه تبدو لكل واحد منا أنها الأقسى على الاٍطلاق .. و فى سبيل التغلب على هذه الصعوبات بيدخل فى حروب و مواجهات لا نهاية لها قد يخرج منها منتصرا أو مهزوما أو بين بين و لكنه على كل الأحوال بيفقد أثناء صراعه الحياتى هذا الكثير من السيطره على أجهزته الحسيه المسئوله عن السيطره على أفكاره فبتخرج منه بدون رقابه حقيقيه تماما زى الحلم بالنسبه للنائم .. لأن الحلم كما قال المحلل النفسى هو حارس النوم و به تستعين الأنا على خفض أسباب الاٍستيقاظ ..
هنا نبقى وصلنا لنقطه ممكن نربط بها بين الهلاوس و الأحلام .. لأن الأحلام بكل ما تحمل من رمزيه و تهويمات هى أصلا أفكار و مخاوف و رغبات موجوده بالأساس فى عقلية الحالم و قد وجدت طريقها للخروج و التعبير عن نفسها حال كون العقل الواعى المسيطر عليها فى حالة سبات عميق و قد فقد هيمنته و سيطرته عليها ..
أزعم وجود رباط وثيق بين الهلاوس بأنواعها و بين الهفوه .. الهفوه التى تخطر كوميض على عقل الفرد ثم لا يلبث سريعا أن يتداركها بالقمع أو التجاهل .. الفرق بين الأثنتين أن الهفوه مدتها قصيره للغايه و أما الهلاوس فطويلة الأمد ممتدة المفعول يسمعها الآخرون و يطلعون عليها أو يقرأوها و عندها ندرك أن الشخص يتحدث مع نفسه بصوت مسموع و علنى أو يهلوس مع نفسه و نبدأ فى تحذيره و لفت اٍنتباهه باٍخلاص أن أفكاره الغير مسيطر عليها قد بدأت فى الخروج للوجود و يقينا ستبدأ بشكل تدريجى يمر على الكثيرين بدون تأمل منهم و ربما صفقوا له اٍعجابا بأفكاره و لكن الحقيقه أن هذا بداية المرض العقلى .. بداية مرض الفصام اللى هو عباره عن أفكار و أحاسيس داخليه حصل لها بعض التحولات لظروف حياتيه معينه و أصبحت بتعكس شعور الشخص لنفسه و للمحيطين به بل و للعالم الخارجى كله .. بمعنى أوضح فالتحولات اللى حصلت لأفكار الشخص الداخليه أصبحت مدركات حسيه مسموعه أو مرئيه أو مقروءه و فى بعض الحالات بتمر هذه التحولات بمرحله وسيطه بيسمع فيها الشخص أفكاره و بيعتقد أن المحيطين به بيسمعوها معاه ..و لو أستمر الوضع على هذا المنوال دون أن يتدارك الشخص حالته .. و دون أن يستمع لنصائح المحيطين به بضرورة الخضوع للعلاج النفسى بتتحول حالته لحاله من الهلاوس القويه و الهذاءات المرضيه و قد تظهر أعراض ذلك فى كل مناطق الاٍدراك الحسى و بيبقى لديه هلاوس بصريه و هلاوس سمعيه و هلاوس شميه و هلاوس ذوقيه و هلاوس حركيه و هلاوس تتعلق بالألم و هلاوس جنسيه و من الجائز أن يكون لدى الشخص اللى أصبح مريض حقيقى هلاوس تتعلق بأكثر من حاسه ..
طيب أيه الحل ؟؟
اٍزاى نقدر نحافظ على صحتنا النفسيه و بالتالى العقليه من الوقوع فى مستنقع الهلاوس اللى أصلا بيبدأ بسيط و غير ملحوظ اٍلى أن يصل لحالة المرض العقلى و اللى أحيانا بيبقى لا رجوع منه ؟؟
أزعم و الله و رسوله أعلم أننا بداية كده يجب أن نضع أيدينا على أسباب مشاكلنا فى الحياه .. نحاول جاهدين أن لا نقنع أنفسنا بأننا كده حلوين و ميت فل و أربعتاشر لأنه بمرور الوقت و التعرض للاٍشكاليات المختلفه فى مسيرة حياتنا ستسقط هذه المشاعر الاٍيجابيه الزائفه شيئا فشيئا و يبدأ الفرد فى التحول من صاحب أفكار داخليه غير مسموعه لصاحب أفكار مسموعه أو مقروءه على شكل هلوسات أو هذاءات و حوارات مع واقع غير حقيقى أو أشخاص غير موجودين و ده فى رأيى الشخصى بسبب الاٍحباطات الطبيعيه فى الحياه و التوترات و الصراعات الداخليه بين شد و جذب و دى زى ما قلت مقدمه للأمراض العقليه اٍن لم تتدارك ..
موضوع الهلاوس موضع عنكبوتى متشعب و له أوجه كثيره ..
لكن عن صدق أطمئن أن النفس البشريه واحده سواء كان ما يصدر عنها هلاوس و هذيان أو حاله من الاٍبداع الفنى .. يعنى الهلوسه الناتجه عن ضغوط الحياه و مشاكلها و سخافاتها و مواقفها الصعبه و ضرباتها القدريه أكيد بتختلف عن الهلوسه التى بتبدع اٍنتاج فكرى معقول أو روايه بيعيش كاتبها كفرد من شخوص روايته و بينتج هلوسة الاٍنتاج الفنى المنطقى أو الاٍبداعى حتى و اٍن توحد الجميع تحت مسمى المهلوسين بما فيهم المرضى العقليين أصحاب الهذيان التخيلى ..يعنى الرسام أو الموسيقى أو الكاتب بتكون الهلوسه عندهم تعبير عن اٍنفعالات وجدانيه بشكل يحافظ على اِتزانه النفسى و ده حقه فى الحياه بغير شك بيختلفوا عن الآخرين اللى بياخد عندهم المرض النفسى الشكل التدريجى حتى يصلوا لمرحلة المرض العقلى و ده غالبا بيكون مصيرهم لو تمادوا فى الاٍستسلام للهلاوس بأنواعها ..
وقانا الله و اٍياكم شر الهلاوس و توابعها ..
و أسألكم قراءة الفاتحه على روح أخونا الفنان التشكيلى محمد على صفى َ الشيخ اٍمام رحمهما الله و كل أموات المسلمين ..
و لكم خالص تحياتى ..

مشهد عبقرى !!

2009-09-28T03:24:00.000+02:00

الرجل الحلوف و لغز الغشاء اللاصق !!

2009-09-14T23:00:00.003+02:00

مساء الخير أعزائى المدونات و المدونين و أسعد الله مساءكم بالمباهج و السرور ..

سامحونى يا أعزائى النهارده عاوز أكتب عن موضوعين بايخين شويه .. صادمين رخمين .. و عارف أنه ربما سيمتنع الكثيرون عن التعليق على البوست ده لحساسية موضوعه و ألتمس لهم العذر ..

لكن بصراحه أنا مقدرتش أمنع نفسى عن الكتابه عن الموضوعين دول كنوع من تفريغ شحنة الغضب اللى أصابتنى و كنوع من ردة الفعل اللى ألجمتنى و فى نفس الوقت أثارت بداخلى حزنا من نوع خاص .. فعذرا لكم ..

الموضوع الأول :

صدمت و فزعت لخبر جاء فى الجرايد من يومين كده ..

ملخصه أن رجلا ( مجازا يعنى ) فى منتصف الثلاثينات من عمره ( اللى يا رب ينقصف بدرى ) متزوج من فتاه عندها عشرين سنه .. و بعد 3 سنين من الجواز قبت و نطت و طقت فى دماغه أنه يعملها عملية ختان !!!

ليه و أيه السبب ؟؟ الله و رسوله أعلم ..

فيقوم المجرم السافل يتفق مع أخته و جوزها أنهم يساعدوه فى اٍتمام هذه الجريمه النكراء !! على أن يتولى النطع التانى جوز أخته الحلاق ختان البنت !! اللى أصيبت طبعا بنزيف حاد يا قلب أمها و بلاوى زرقا و أتشلفطت بعد ما أنهارت مقاومتها أمام عنفهم الوحشى و أتشالت مرابعه على المستشفى فى حاله سيئه للغايه .. و تم اٍلقاء القبض على النطع زوجها الفران و أخته و جوزها ..

أيه ده ؟؟

طيب اٍزاى يعنى ؟؟

أيه كم الجرائم المرعب فى القصه دى ؟؟

الجريمه بدأت من مجرد تفكير الزوج و رغبته فى تشويه جسد زوجته و حرمانها من أحد مظاهر الأنوثه ربما لاٍحساسه بالنقص و الله أعلم و هى البنت اللى لسه بتتفتح للدنيا ..

و الجريمه التانيه أنه أستعان بزوج أخته للقيام بهذه الفعله النكراء .. يعنى لا أتصور أن راجل بمعنى راجل يمسك مراته و يكتفها لجوز أخته علشان يطاهرها !!!

مش عارف أقول أيه و الله بس أنا متنكد آخر نكد و بسبب الموضوع حاولت أفش غلى فى عيالى الكبار و الصغار و نكدت عليهم كتقليد طبيعى و متبع لدى كل الأبهات المصريين لما بيتنكدوا ..

أيه اللى حصل للرجاله ؟؟

و أيه اللى حصل للبنى آدمين ؟؟

عمرنا ما سمعنا عن حلوف مسك حلوفته للحلوف جوز أخته الحلوفه علشان يعتدى على كرامتها و حلوفيتها و أنوثتها !!

مش حأسأل بقى فين خشية الله و لا فين القيم و فين النخوه و الرجوله لا سمح الله لأنه واضح أنه أصبح من العسير الحصول على اٍجابه مقنعه فى زمن مفهوم الرجوله فيه بقى أنه كلمه سقط حجر بنطلونك أكتر كلما أحبتك البنات أكتر و أكتر ..

لو أنا من ولى الأمر و الله لحكمت على هذا الزوج النعجه بأنه يتعمل فيه زى ما عمل بالظبط لا أكثر و لا أقل جزاءا وفاقا لجريمته النكراء خليه بقى يفرح برجولته المزعومه الراجل الوضيع العره اللى حرام يتحسب على جنس الرجال ظلما و بهتانا ..

الموضوع التانى :

الصين و آه من اللى بييجى لنا من الصين !!

يعنى بعد ما الصينين ولاد العفاريت الزرق صنعوا كل شىء بمعنى كل شىء لاقوا أن لسه فيه حاجه لم ينتجوها و لم يقتحموا بها أسواق الشرق فأنتجوها و قالوا رزق الصين على الشرقيين و زى ما تيجى ..

الصين أم العجايب يا ساده أقتحمت سوق العفه !! و هى اٍسمها كده و بتدل على العفه فعلا رغم رفض الرافضين لهذا التقليد ..

نعم ؟؟!!

اٍزاى ؟؟

الصين أنتجت غشاء بكاره صناعى زى ما أنتجت كل حاجه صناعى .. و المنتج الجديد له سوق رائجه لدى بعض الدول العربيه الشقيقه و قد أثبت نجاحا باهرا و اٍقبالا شديدا من المستهلكات للسهوله الشديده فى اٍستعماله حيث أنه لا يحتاج فى تركيبه سوى ثوانى من غير طبيب و لا بنج و لا عياده و لا وجع قلب و لا يحزنون يعنى زى العدسات اللاصقه كده و ترجع السيده بكر بالغ رشيد بفضل هونج وانج يونج كومبانى ليمتد!!

أهوه :

و عليه فقد بدأ هذا الغشاء الصناعى يعرف طريقه لتجار الشنطه و القادمين من الخارج بكميات هائله و كذلك مراكز السبا و المصيبه أنه بدأ يعرف طريقه كمان لبعض الصيدليات بالمناطق الشعبيه و الراقيه على السواء و المصيبه الأكبر فى زعمى أن بعض المستوردين قد عقدوا صفقات مع الشركه الصينيه المنتجه لها لأستيراده بالطريق الرسمى و توزيعه فى مصر المحروسه بأسعار تناسب الجميع مع التحدى أن يوجد أى فرق بينه و بين الغشاء الطبيعى !!!

يعنى مش عارف ..

أتوقع أن يوجد تحرك ما من جهة ما لوقف هذه المهزله المسخره النص كم و لحقها فى أولها ..

أتوقع أنه من الأصوب و الأصح منع هذا المنتج الجهنمى من دخول الوطن أصلا بل و تجريم تهريبه و تغليظ العقوبه على من يدخله خلسه و ده لأسباب كتيره يطول شرحها ..

أرحموا الناس بقى يرحمكم ربنا و فتحوا عينيكم على الصغائر فمعظم النار من مستصغر الشرر ..

تقبلوا تحياتى و سامحونى على العكننه ..

على شارع فيصل و اللى فيه !!

2009-09-11T22:15:00.003+02:00

دلوقتى فيه سؤال محيرنى و عاوز أعرضه على حضراتكم لو تسمحوا لى ..
مين فين أيه بكام ليه اللى بيحصل فى شارع فيصل ؟؟
هو كده .. هو السؤال ماينغعش غير أنه يكون سؤال عبثى مالوش معنى محدد تماما زى اللى شفته بعينيا من 3 أيام أثناء مغامرة عبور شارع فيصل من أول الكوبرى لغاية أول الصحراوى ..
أولا كده مين سواقين الميكروباصات دول اللى بيتسببوا بسلوكياتهم فى تعطيل حركة المرور و بيتحدوا كل القوانين السماويه و الوضعيه و لا يتعاملوا مع باقى قائدى السيارات اٍلا بالشتيمه و البصق على الوجوه و سب الدين قبحهم الله ؟؟
مين دول ؟؟
مصريين دول و لا هكسوس و لا أيه موضوعهم و لا فيه أيه ؟؟
مين مئات العمال الريفيين الى سايبين غيطانهم و جايين يقعدوا على الجزيره الوسطانيه مستنيين حد يجود عليهم بشغلانه أو بسبوبه و اللى فى نفس الوقت بيعانى فيه الوطن من نقص العماله الزراعيه حتى أنه قد بدأ بالفعل عصر اٍستقدام الفلاحين النيجيريين للعمل فى الأراضى المستصلحه !!
مين اللى سمح لهم باٍحتلال الشارع بهذا الشكل العره حتى وصل بهم الحال لقضاء حاجتهم كده على العلن و اٍظهار عوراتهم للماره من نساء و أطفال و كبار ؟؟!!
مين دول ؟؟ عاوز أعرف أنا مين دول ؟؟
و أيه جبال الزباله المتعفنه اللى بتغطى كل شبر من أرض شارع فيصل دى ؟؟
اٍزاى كده ؟؟
بقى ينفع كده يعنى ؟؟ يعنى أحفاد الفراعنه الجبارين اللى بنوا 3 أهرامات و قد عجز العالم عن بناء هرم واحد على رأى البهظ بيه أنهم يبقوا بهذا القدر من البلاده و القذاره و يحتاسوا لما الشركه الطليانى المكلفه برفع القمامه تحرن و ترفض تشوف شغلها فيكون الحل أننا نرمى الزباله كده فى الشوارع و نسيبها تتراكم و تتعاظم حتى يظن الرائى أنه ماشى فى فيلم من أفلام الخيال الوهمى بعد فناء العالم و خاصة فى هذه المرحله الحرجه من مراحل اٍنتشار الأمراض و الأوبئه و يأتى على رأسهم أنفلونزا الحلاليف ..
و ليه أصلا نجيب شركه طليانى تشيل زبالتنا ؟؟
طيب ده كده ممكن نوصل لحاجات مش كويسه و ييجى اليوم اللى نستورد فيه حد يمسح لنا ... ودننا ..
و أيه بقى هذا الكم المهول من التلوث الضوئى اللى على واجهات المحلات و اللى بعضها بيحمل أسماء لها مدلولات أبيحه و قليلة الأدب بتصدم العين و الذوق العام ..
يعنى ليه كل الأضواء الباهره دى اللى بتستهلك الطاقه بدون مبرر و بنزيد الأحمال على المحولات و هل هذا التلوث الضوئى و ما يصاحبه من تلوث سمعى جنونى هيستيرى صادر عن أجهزة التسجيل المتداخله أصواتها و اللى بتذيع أغانى أقل ما يقال عنها أنها قذره سيكون السبب الحقيقى لجذب الزبون ؟؟
لا أظن ..
و مين دول أصلا أصحاب محلات اللانجيريهات النسائيه اللى بيعرضوا هذه القطع النونو على أجساد المانيكانات العريانه فى الفتارين بشكل فج و قبيح شبيه لحد كبير بفتارين الدعاره فى حى بيجال بباريس مع فارق أن مانيكانات باريس بشر من لحم و دم لكن ممنوع تماما أن تقع عين طفل أو طفله على هذه الفتارين المداريه على عكس ما يحدث فى شارع فيصل !!
يعنى ماحدش قالهم أن ده عيب و بيتنافى مع قيم الدين و الذوق و الرحمه بالشباب المكبوت اللى لا طايل لا سما و لا أرض و واقف يبحلق فى المعروضات بعينين تكاد تنط من خلقته ثم لا يلبث أن يطلع هذا الكبت و الغيظ فى شكل كلمات أبيحه و قلة أدب بيلقيها على أسماع البنات و السيدات الماشيين ده فى حالة أنه لو أكتفى بالكلمات و لم يتعداها للتحرش الفعلى ..
شارع فيصل يا جماعه أصبح غير محتمل .. بجد غير محتمل ..
يعنى تقطع شارع فيصل فى ساعتين و نص تقريبا بسبب الزحام المستعر فيه ليل و نهار ؟؟
يعنى أيه ألوف السيارات تهدر بنزين و وقت و صحه و أعصاب لمجرد فقط أن تعبر شارع فى ساعتين و نص ؟؟
حضراتكم متخيلين أنا بأتكلم عن أيه ؟؟
بأتكلم عن بؤرة تلوث و ماينفعش نطلق على هذا الشارع الكئيب غير أنه بؤرة تلوث فى ثوب الوطن رغم حيويته و أهميته و بهاءه الظاهرى ..
بلاش نقول أنه بيعتبر شارع سياحى و قوافل السياح بتمر فيه ليلا و نهارا و التصوير شغال على ودنه لحسن تقولوا لى بطلوا بقى عقدة الخواجه .. بلاش السياح مش حنتكلم عنهم ..
لكن الحقيقه أنه برضو أحفاد الفراعنه الجبارين لا يجوز لهم أن يعانوا مثل هذه المعاناه القاسيه و المستحيله بكافة المقاييس ..
و أرجوكم كمان بلاش حد يقوللى طيب أنت عرضت المشكله من غير ما تعرض حلول !!
الحقيقه اٍن الحلول مش شغلتى ., لأنى مش متخصص فى هندسة المدن أو مش عارف ده بيقع تحت أى بند من بنود التخصص العمرانى .. لكن أنصح نصيحه مخلصه لوجه رب العزه أن يتفضل المسئول عن اٍيجاد حل لمشكلة شارع الملك فيصل أنه يقعد مع السيد رئيس جهاز مدينة الشيخ زايد ( رضى الله عنه ) و يفهم منه عمل أيه علشان يعيد الاٍنضباط و النظافه و النظام للمدينه الجميله رغم اٍختلاف مستويات سكانها الثقافى و الاٍجتماعى حتى صارت مدينتنا العسوله آيه فى الجمال و الحلاوه يضرب بها المثل رغم كونها لا تبعد سوى دقائق من شارع الملك فيصل و العياذ بالله ..
اٍلحقوا شارع الملك فيصل قبل أن يحدث فيه و منه ما لا يحمد عقباه ..
ألا هل بلغت اللهم فاشهد ..
تقبلوا تحياتى ..

التوحد ..

2009-09-06T14:40:00.000+02:00

مساء الخير أعزائى المدونات و المدونين ..
أولا أحب أطمنكم على موضوع الجمعيه الخيريه .. بحمد الله و فضله فأسماء الأعضاء المؤسسين قد اٍكتملت .. و هم مجموعه طيبه يفخر بهم الوطن من خيرة الشخصيات العامه و مهندسين و أطباء و أساتذة جامعات و فقهاء قانونيين و غيرهم .. فجزاهم الله كل خير على روحهم الطيبه .. و الخطوات تسير على قدم و ساق لتجهيز المقر لحين الاٍنتهاء من الاٍجراءات القانونيه اللازمه للاٍشهار فلا تنسونا من طيب دعاءكم ..

************************************

ثانيا عاوز أتكلم النهارده عن موضوع التوحد النفسى ..
أيه التوحد النفسى اللى لفت نظرى مؤخرا كسلوك لدى الكثيرين ؟؟
مبدئيا لازم نفرق بين التوحد و بين المحاكاه ..
طيب خلونا الأول نقول اٍن المحاكاه هى عمليه شعوريه مقصوده من الشخص و بتتم باٍرادته و غالبا لفتره زمنيه محدوده .. فنلاقى الشخص المحاكى بيتخذ من شخص آخر نموذج يحتذى به فى طريقة كلامه و لبسه و مشيته و مفرداته اللغويه ..
بس هنا المحاكاه مش بتغير فى جوهر شخصية الفرد المحاكى .. يعنى بيظل برضو محتفظ بملامح شخصيته الأصليه و مش بيبدلها بملامح شخصية المحاكى به ..
على العكس من المحاكاه بيكون التوحد .. التوحد اللى بيتم لدى الشخص بشكل لاشعورى .. و بيمتد لفتره زمنيه أطول بكثير من المحاكاه .. و بيكتسب بها الفرد خصائص سلوكيه و اٍنفعاليه لشخص آخر بيرتبط به اٍرتباط عاطفى وثيق ..
المحللين النفسيين بيحتاروا أشد الحيره لما بيصنفوا التوحد لصنفين و تحت أى صنف ممكن يدرجوا الحاله اللى بتخضع لعملية التحليل النفسى ..
- الصنف الأول بيحدث فى الشهور و السنوات المبكره فى حياة الطفل .. و به تتم بلورة و تكوين الشخصيه للطفل لما بيتوحد بأبوه و أمه أو أحدهما .. و ده سلوك فى غاية الأهميه و الخطوره لأنه النواه الأولى فى تكوين شخصية الاٍنسان الكبير فيما بعد .. و به تتحقق الأنا العليا لديه ..
و يجوز جدا أن يتوحد الطفل بشخص أكبر منه سنا زى معلمه أو معلمته أو حتى مربيته فى حال أن تتضاءل سطوة الأبوين عليه أو تتلاشى .. و الحقيقه أنى شايف الموضوع ده قد كثر و أنتشر من شوية سنين فاتوا و هو أمر جدير بالدراسه ..
- الصنف الثانى من التوحد هو اللى ممكن نسميه بالتوحد الثانوى ..
أيه التوحد الثانوى ؟؟
التوحد الثانوى له عواقب مدمره .. دى وجهة نظرى ..
فى هذا النوع من التوحد بيكون الدافع له فى الأغلب الأعم تجنب المواقف المؤلمه و صدها .. يعنى اٍستعمال التوحد كسلاح لمواجهة الخطر ..
مثلا .. لما بيتعرض الشخص لاٍعتداءات متكرره و حالات عنف من الآخرين نلاقيه بيتحول بعد فتره لشخص شرس و عنيف و مهاجم يبدأ هو بالعدوان لدرء الخطر عن نفسه و بيتوحد نفسيا بمن أعتدوا عليه .. و ممكن يصادقهم فيما بعد .. و هكذا يفعل ضحاياه أو بعضهم .. و هكذا يفعل ضحايا ضحاياه أو بعضهم .. و هكذا و هكذا حتى تتسع الدائره و يصبح المجتمع كله أو أغلبه عدوانى و شرس و لا يحتمل ..
فيه نوع تالت من التوحد لم يلتفت له المحللين النفسيين كثيرا .. ربما لم يلفت نظرهم و ربما يمل البعض من محاولة الاٍمساك به خلال الجلسات التحليليه الاٍستبصاريه بسبب براعة و حدة ذكاء أصحابه اللى عقلهم الباطن بيزوغ بمهاره من محاولات المحلل النفسى لكشفه ..
لاحظت أنا شخصيا هذا النوع من التوحد العبقرى عند الكثيرين .. و كنت سعيد بذلك لندرة اٍمكانية كشفه و بالتالى علاجه ..
هو التوحد بالحبيب أو الحبيبه !!
قد يظن البعض و يخلط بينه و بين مظاهر الحب الطبيعيه اللى كلنا عارفينها و لله الحمد ..
لكن فيما نحن بصدد الحديث عنه فالوضع مختلف ..
بمعنى : شويه بشويه يتحول الاٍندماج و التآلف الطبيعى بين المحبين لحاله من التوحد الكيانى النفسى و لدينا فى جملة بوسى الشهيره فى فيلم حبيبى دائما خير شاهد لما بتقول لحبيبها : مافيش فرق بينا أنا أنت و أنت أنا !!
جمله عبقريه ..
فعلا مافيش فروق بين المحبين .. و ده طبيعى و بتفرضه ظروف العشق اللى هو أعلى مرتبه من الحب و أقل مرتبه من الوله .. لكن أن يتحول الفردان لفرد واحد و تنمحى الفروق الشخصيه بل و تتشابه ملامح الوجوه فهنا يكمن الخطر ..
لأن الشخصيه الفرديه لا يجوز لها أن تندمج تمام الاٍندماج بشخصيه فرديه أخرى و اٍلا ستحدث لخبطه نفسيه هائله يعانى منها أحدهما أو كلاهما و تظهر آثارها المدمره فى حال تعرض العلاقه بينهما لطارىء ما ..
أزعم أن مسيرة الحياه ستتوقف .. و أن حائط زجاجى سيخلق بين الشخص و بين الحياه ..
غالبا كما لاحظت تنتهى هذه الحالات بالوقوع فى دائرة الاٍكتئاب النفسى الحاد .. و الشعور بالضعف الداخلى بعد محاولات الفشل المتكرره لاٍسترجاع الشخصيه الفرديه اللى دابت خلاص و توحدت فى شخصية الطرف الآخر .. و ده بيؤدى لمضاعفات تصيب النفسيه بحاله من فقدان الرغبه فى الحياه نفسها و ده قمة المضاعفات فى النهايه ..
التوحد بأنواعه سلوك اٍنسانى يستلزم الحرص الشديد فى التعامل معه لأن أصحابه عادة بيكونوا شديدى الذكاء و الحيطه و بعضهم بيمتاز بنفس شفافه مرهفة الحساسيه ..
آه من النفس البشريه و ما تحمله بين طياتها !!
تقبلوا تحياتى ..

Swan lake

2009-09-06T07:29:00.002+02:00

اٍختلاف فى الرؤيه :)

2009-09-03T22:30:00.002+02:00

دى النسخه الاٍسرائيلى :

و دى النسخه المصرى :

المصرى يكسب طبعا

يا أنا يا أنتى يا دنيا

2009-08-29T22:14:00.002+02:00

صباح الخير أعزائى المدونات و المدونين و كل سنه و أنتم بخير ..

بأشكر من كل قلبى اللى سألوا عليا أثناء فترة غيابى عن البلوجر .. بجد فيكم الخير و نعم الأبناء و البنات و الأخوه و الأخوات ربنا يبارك فيكم ..

و بجد أنا بأحبكم كلكم

الحمد لله أنا كويس و تمام و فى نعمه بس كنت محتاج شوية عزله أراجع فيها نفسى و حساباتى و أصحح مسارات شوية حاجات كده .. و لله الحمد عدت على خير و بهذه المناسبه اللى مش بتتكرر فى العمر كتير أحب أهديكم الحكمه دى :

Get this widget

Track details

eSnips Social DNA

ما علينا ..

أنا بقى فى فترة العزله اللى فاتت دى فضلت أفكر و أفكر .. و أقلب دماغى و أفكر .. و أجيب القديم و الجديد و أفكر .. و تعالى يا فناجين القهوه أنتى و لوازمك ربنا يتوب علينا منها و روحى يا مجات النيسكافيه البلاك أنتى و لوازمك و أنا برضو بأفكر .. و رايح جاى فى صومعتى و أنا محتار حيرة البلجيكى :

و بأتأمل فى أحوال الحياه و الناس و عاوز أوصل لحاجه تصالحنى على الدنيا اللى كل ما الواحد يفتكر أنها زهزهت و أحلوت تطلع برضو زى ما هى و عمرها مابتدى كل حاجه ..

ما علينا ..

بعد بقى تفكير عميق و تقليب للأمور على مختلف الوجوه و تدوير و بحث و تمحيص فى دفاترى القديمه لاقيت شوية حاجات كده كنت بدأت فيهم من فتره و مكملتهمش لأسباب يطول شرحها ..و لاقيت فكره كنت مخطط لها على الورق بالأحرف الأولى وجدتها حاليا جديره بكل اٍهتمام و رعايه ..

بسسسسسس

هى دى ..

هى دى اللى أنا مسكت فيها و بدأت فى تنفيذها بالفعل بخطوات عمليه و سريعه لكى تخرج للنور ..

نويت خير و النيه على المولى باٍذن الله اٍنشاء و اٍشهار مؤسسه خيرية أتكفل من فضل الله بكل مصاريف تأسيسها و اٍشهارها و توفير مقر مناسب لها ..

بالذمه مش فكره كويسه ؟؟

مش لما تبقى مؤسسه و حاجه رسميه و لها غطاء و كيان قانونى مش أحسن من الطريقه اللى بنعملها دلوقتى اللى بتشوبها أشياء كتيره من اللخبطه و عدم التنظيم بل و نقص العداله فى أحيان كثيره ؟؟

مش كده أحسن من تشتيت جهود و تركيز الكثير من الناس اللى بيحبوا مجال العمل الخيرى و الاٍجتماعى و توفير غطاء شرعى و قانونى لكل من يريد أن ينضم لكتيبة العمل الخيرى المبارك باٍذن الله تعالى خاصة أننا داخلين على مرحله يعنى الله وحده أعلم بكيف ستكون صعوبتها على الناس .. يعنى الكلام و الخطب الرنانه لا حتأكلهم و حتشربهم و لا حتكسيهم و لا حتوفر لهم تمن العلاج

دلوقتى فيه نقطتين مهمين عاوز آخد رأيكم فيهم ..

النقطه الأولى هى أسماء الأعضاء المؤسسين للمؤسسه .. بجانب اٍسمى فأنا تكلمت مع أختين فاضلتين من المدونات المعروف عنهم حبهم لعمل الخير و نشاطهم و رجاحة عقلهم و قد تكرموا مشكورين بالموافقه على أن تكون أسمائهم من ضمن ال 10 أسماء المطلوبه لتأسيس و اٍشهار المؤسسه كما أخبرنى بذلك المحامى اللى بيتولى الموضوع .. و بأطلب من حضراتكم اللى يحب يتقدم باٍسمه يتفضل يراسلنى على الاٍميل amrbadr70@yahoo.com و سيتم اٍختيار 6 أسماء فقط ..

علما و ده شىء مهم برضو و يلزم التنويه عنه اٍن العمل فى المؤسسه خيرى و تطوعى و لا يوجد أى عائد مادى للعمل فيها بالنسبة للمؤسسين و لأعضاء مجلس الاٍدارة و للشباب اللى حيعملوا فى الحقل الميدانى اٍن شاء الله ..

النقطه التانيه هى أنى بأجهز حاليا قائمه بأهداف المؤسسه و أنواع نشاطتها للتقدم بها لجهة أمنية لأخذ الموافقات الأمنيه المطلوبه كما هو متبع يعنى ..

و الحقيقه فيه عندى اٍتجاهين فى هذه النقطه و محتار فيهم و عاوزكم لو تسمحوا تساعدونى في اٍختيار أحدهما ..

الاٍتجاه الأول أن تكون المؤسسه مختصه بنشاط واحد معين زى مثلا يعنى رعاية أبناء الشوارع اللى هم فى اٍحصائيه تعدوا المليون طفل و طفله و بيتعرضوا لأشنع الممارسات و فى أمس الحاجه لمن يأخذ بيدهم ..

أو زى مثلا مساعدة المقبلين على الزواج و اللى زواجاتهم قد تعطلت بسبب ضيق ذات اليد و هم فى أشد الحاجه برضو لمساعدتهم حتى يعفوا و يصانوا و يبعدوا عن الحرام ( مثلا يعنى ) ..

ده اٍتجاه ..

الاٍتجاه التانى أن يكون نشاط المؤسسه شامل و متعدد الغايات و ده برضو شىء كويس بس أخشى أنه يشتت التركيز و يبقى من كل فيلم أغنيه و لا نصل للهدف النهائى اللى بننشده ..

أيه رأيكم ؟؟

يا ريت اللى يعرض وجهة نظره تكون محدده و واضحه و بأسلوب سهل علشان أقدر أفهمه لو سمحتم ..

ربنا يقوينا و يساعدنا و يسهل لنا الأمور كلها فى هذه الدنيا العبثيه الصعبه أم دم يلطش و يجعلنا ممن يسارعون اٍلى الخيرات ببركة فيوضات الشهر الكريم الملىء بالرحمات و الغفران و مش زى ما بيقولوا عندينا فى البلد : رمضان 10 مرق و 10 حلق و 10 خرق ..

كل سنه و حضراتكم طيبين ..

بأودعك

2009-08-17T21:00:00.001+03:00

bwda3k Music Upload

تحيه كبيره لكفر الشيخ و اللى منها !! + تحديث

2009-08-17T09:53:00.004+03:00

تحديث : الأنباء بتؤكد وصول الصيادين المصريين لميناء الأتكه فى السويس يوم لخميس القادم اٍن شاء الله و معاهم 8 أسرى صوماليين مش 3 كما ورد بالبوست كما اٍنهم قتلوا منه 7 مش 2 كما جاء على لسان المتحدث الرسمى باٍسم القراصنه ..

هييييييييييه

واضح أن الصيادين المصريين اٍفتروا جامد على القراصنه :)

بأقترح يحطوا الأسرى دول فى اٍقفاص فى ميدان التحرير علشان نتفرج عليهم و النبى و نحدف لهم فول سودانى و موز و ممكن يعملوا الفرجه بتذاكر و أهى تبقى سبوبه برضو مش بطاله يمكن يخفوا عننا الضرايب شويه ..

*************************************

بسم الله ما شاء الله ..

اللهم صلى على حضرة سيدنا النبى ..

النهارده تكاد تصل فرحتى لحد الجنون بعدما تأكدت الأنباء الوارده من الصومال اٍن ال 34 جدع ولاد كفر الشيخ اللى كانواااااااااااا مخطوفين بواسطة القراصنه الصوماليين تمكنوا من تحرير أنفسهم و مراكبهم بدعم من جهاز المخابرات العامه و تغلبوا على ولاد ال....... الهبيشه الخطافين بعدما يئسوا من المفاوضات الديبلوماسيه اللى كانت بتديرها وزارة الخارجيه و دارت بينهم معركه دمويه رجوليه مايعملهاش غير ولاد الفلاحين بجد و مش بس كده دول كمان قتلوا منهم 2 و أسروا 3 و راجعين لمصر بيهم اٍن شاء الله بألف سلامه بحماية رجال القوات المسلحه ..

يا بركة رمضان هلى على المصريين و فرحنا يا رب كمان بخبر حلو كده ال 80 مليون مستنينه كرامه للنبى ..

و اللى يزود الفرحه أننا حنرتاح من الشياطين أهو شهر بحاله و حيتجروا من قفاهم و يترموا فى اللومان الخاص بيهم مع أنى كنت أتمنى يترموا الشهر ده فى حجز قسم العمرانيه علشان يطلعوا منه ناسيين أساميهم أصلا ..

صباحك ورد و فل و مسك ليل مش قلت لك وشك حلو على مصر :)

The day before you came

2009-08-13T07:36:00.002+03:00

الناس فى سيناء ..

2009-08-10T23:40:00.000+03:00

دهب اٍسم على مسمى ..

2009-08-05T18:30:00.004+03:00

مساء الخير أعزائى المدونات و المدونين ..
مبدئيا كده عاوز أقول حاجه مهمه و هى اٍن سلسلة البوستات دى اللى عن منتجعات جنوب سيناء ليس الغرض منها اٍلا لفت الأنظار لهذه المناطق شديدة الحسن بارعة الجمال و اللى للأسف الشديد اٍختار المصريون باٍرادتهم أن يحرموا أنفسهم منها بحجج واهيه و غير صحيحه و تركوا متعة زيارتها للغرباء اللى بينهلوا منها بنهم و شغف لا يشبع .. و أكتفينا بالتصييف فى شارع خالد اٍبن الوليد فى اٍسكندريه اللى المشى فيه بيجيب خنقه من كتر الزحمه و قلة الأدب و بلطيم و راس البر و أحيانا عين الصيره و عين حلوان ..
آدى شاطىء دهب :

و آدى شاطىء اٍسكندريه :

و الاٍختيار لك أخى المصيف .. أختى المصيفه !!

و من أهم الحجج الواهيه اللى بنتعلل بيها للعزوف عن التصييف فى سيناء أن الرحله بتتكلف كتير !!

و الله أبدا .. و عن تجارب لا حصر لها فى كل أوقات السنه و ليس تجربه واحده بأؤكد لكم اٍن الرحله و الاٍقامه و الأكل و الشرب و التهييص هناك أوفر بكتير جدا من رحله تقوم بها أسره متوسطة العدد و الدخل لفتره مماثله فى أى مصيف آخر من اللى متعودين عليه ..

صدقونى جربوا و مش حتندموا و على مسئوليتى :)

النهارده بقى حأتكلم عن منتجع دهب ..

دهب و هى دهب .. و صدق اللى سماها دهب ..

البت المايصه الدلوعه دى اللى اٍسمها دهب بتقع جنوب نويبع بحوالى 100 كيلو على خليج العقبه ..
و كانت زماااااااااان مجرد قريه صغيره للصيادين .. قريه شويه بدائيه و لسه آثارها موجوده :

و أيام الاٍحتلال الاٍسرائيلى لسيناء كانت مدينة دهب هدفا للضباط الاٍسرائيليين لقضاء أجازاتهم فيها و خاصة الطيارين اللى لم يتبق من آثارهم فى المنطقه سوى هذه الطائره الخرده اللى عيال البدو بيستعملوها حاليا لعمل البي بى :

و طبعا المحتلين ماحاولوش أبدا أبدا لا يطوروا منها و لا يعملوا فيها أى خدمات لسكانها و لا مرافق و لا أى شىء لعلمهم أنهم حيخرجوا منها اٍن عاجلا أم آجلا .. و أكتفوا بالشماسى الخوص على الشاطىء و اللى لحد النهارده سمه مميزه لدهب ..

فى أوائل التسعينيات الحقيقه محافظة جنوب سيناء عملت تطويرات كثيره و مجهودات فعاله لتنمية المدينه و النهوض بها اٍلى أن صارت قبله لهواة الغطس :

و تسلق الجبال :

و السفارى :

و القفز بالمظلات

و التزحلق على الأمواج :

دهب مدينه سبحان الله ربنا وضع فيها الجمال فى كل شىء !!

فى البحر و تحت البحر و فى السماء و الجبال و فى الهواء و فى الوجوه و فى كل ما يحيط بك هناك ستجد الجمال !!

دهب المدينه نفسها بتنقسم لعدة أحياء بتضم فى مجملها مساكن حديثه بنتها الحكومه و أسكنت فيها البدو عوضا عن الخيام و المساكن البدائيه اللى كانوا فيها .. و مساكن أخرى بناها الأهالى المقتدرين نوعا ما .. و مناطق الفنادق و الموتيلات الشيك الخاصه بالسياح الشيك برضو .. و أشهر منطقه طبعا فى دهب هى منطقة المسبط حيث الممشى السياحى و حيث توجد عشرات المطاعم و الكافيهات و الكامبات الرخيصه و أشهرها كامب محمد على اللى بأنزل فيه دايما ( 25 جنيه الليله للغرفه و بتساع فردين ) .. و آدى النومه فيه كدهو :

و آدى المسبط بالليل .. تقولش حتة ألماظ يا جدع :

نوعية السياح فى دهب مختلفه حبتين عن نوعية سياح نويبع .. السياح فى دهب جنسياتهم متنوعه مش على طول اٍسرائيليين و لو أن السياحه الاٍسرائيليه برضو رائجه هناك بشكل كبير لكن السياحه الألمانى و الطليانى تكسب فى دهب .. لأن هواة الغطس الألمان و الطلاينه بتعجبهم دهب من حيث تنوع أغراضها السياحيه و تكلفة الغطس فيها بتقل جدا عن التكلفه فى الغردقه و شرم الشيخ .. ده غير أن طبعا وجود الثقب الأزرق اللى فى دهب و اللى له شهره عالميه رهيبه بيجذب له عناتيل الغطس من كل العالم .. و الثقب الأزرق ده له حكايه معايا حأحكيها لكم قدام شويه ..

يعنى الحقيقه السياح فى دهب بيبقوا مبهورين اٍنبهارا باللى شايفينه و عايشينه هناك ليل و نهار و بيحاولوا بشتى الطرق التمتع بكل ما فيها .. من أول مشاركة البدو لتفاصيل حياتهم اليوميه زى العجين و الخبز :

و السهر فى كافيهات المسبط للفجر :

و التمشيه بالليل و التسوق من محلات التذكارات السيناويه :

و التجول بالموتوسيكلات الرباعيه :

و التعامل مع بنات البدو العفاريت الزرق فى البيع و الشراء و اللى بيتكلموا عشرميت ألف لغه بطلاقه و الماهرات فى صنع عقود و أكسسوارات من الخرز و الرسم بالحناء و عمل حاجات كده للبنات :

و بالمناسبه فبنات البدو على فكره منتجين جدا و بيعرفوا يكسبوا و يطلعوا الجنيه من حنك العنتيل على عكس الفكره السائده أن بنات و نساء البدو عاله و لا يعملن .. و بعضهم بيعمل فى أعمال شاقه للغايه زى مثلا الاٍطعام و السقايه و السيطره على عدد كبير من الاٍبل العملاقه فى رحلات السفارى على الجمال .. زى البنوته ساره دى بالذمه مش قمر :

الغطس بقى فى دهب له طعم تانى خاااالص .. و له فلسفه مختلفه عن أى مكان يصلح للغطس فى العالم بأكمله .. ليه ؟؟

بصوا الأول على الخريطه دى :

دى خريطه لأماكن الغطس فى دهب شوفوا عددها الكبير و تنوعها اللى الموقع الواحد فيهم كفيل بأنه يعمل حركة سياحه قويه فى دوله من دول الكاريبى مثلا .. و لا يوجد غطاس محترف أو هاوى فى العالم اٍلا و يحفظها عن ظهر قلب و يحتفظ بنسخه منها فى جيبه على أمل واحد ..

واحد فقط ..

الأمل اللى بيراود كل الغطاسين من مشرق الأرض و مغربها و التحدى الأكبر فى حياته أنه يعمل غطسه واحده يتيمه فى أعماق الثقب الأزرق و يطلع منها و هو لايزال على قيد الحياه !! .. واللى حتلاقوا مكانه فى أعلى الخريطه من فوق خالص ..

الثقب الأزرق بيتحول شيئا شيئا لدى الغطاس لحاله من التحدى الشخصى خاصة لو كان بيعانى من أزمه نفسيه ما و لسه خارج من حالة اٍكتئاب حاده و اللى بيثبت بها لنفسه أولا أنه مش فاشل و أنه لو وصل لمنتهى عمق هذا الثقب المفزع و خرج حيا يبقى كده هو من أفضل الغطاسين فى العالم .. و حقق ما قد فشل فيه العشرات من قبله و كان الفشل بيتمثل اٍما فى الموت و اٍما فى عدم القدره على الوصول لنهايته و يكون الرجوع للخلف رجوعا مؤلما و حزينا لأى غطاس ..

الثقب الأزرق دى بوابته :

مكان يبدو عاديا جدا و لا ينم عما يوجد تحت هذه المياه الهادئه ..

لكن الفتحه اللى بتظهر بلون غامق شويه فى الصوره و اللى بتبدأ بعد متر واحد من سطح الماء بتؤدى لممر مائى مظلم طوله 60 متر بالتمام و الكمال .. و شويه شويه و كلما أوغل الغطاس فى العمق بيبدأ فى الاٍنفصال عن الواقع الحقيقى شيئا فشيئا مع خفوت ضوء الشمس تحت الماء و بداية الاٍظلام التام و أول تنبيه للغطاس ممنوع تماما النظر لأعلى حيث سطح الماء :

و بعده نفق ضيق للغايه من الصخور الحاده شديدة الصلابه المغطاه بالشعاب المرجانيه طوله 20 متر تانيه و النفق ده شديد الظلام فعلا و ده اللى بتحصل فيه حالات الوفاه المتكرره تقريبا بشكل أسبوعى بين الغطاسين بسبب ما يسميه الغواصين صدمة النيتروجين و اٍختلال الضغط فى تجاويف الجسم حيث يتطلب هذا العمق موازنة الضغط الخارجى الرهيب للماء مع الضغط الداخلى و ذلك بسد فتحتى الأنف و النفخ فيهم بشده و هى عمليه سهله و بسيطه و لكن تحتاج لتدريب و تنظيم .. ده بداية النفق :

بعد نهاية النفق المظلم بيوصل الغطاس للقاع حيث يرى بعينيه ما لا يخطر على بال :

قليلون من أستطاعوا أن يلمسوا بأيديهم ما ترونه فى الصور دى على هذا العمق المخيف ..

لا اٍله اٍلا أنت سبحانك اٍنى كنت من الظالمين .. تسبيح بيظل القلب يردده بدون اٍراده للخلاق العظيم حيث لا شىء يعصمه من الموت فى ثوانى اٍلا قدرته ..

مخلفات الغطاسين الغرقى اللى لم يجرفها التيار تتناثر على القاع و تذكر الغواص بمصيره لو فقد السيطره على أعصابه و أستسلم لمخاوفه و للهلاوس السمعيه و البصريه اللى بتصيب الاٍنسان فى العمق ده ..

الغريب فى الأمر اٍن الغطاس بيبقى عارف أنه على بداية فقدان للوعى كلما أوغل فى العمق و بيبتدى يسمع حاجات غريبه أصلا مش موجوده زى أصوات موسيقى و كلام مش مفهوم و صوت قطار سريع و حاجات من دى و لكن برضو بيستمر فى الغوص و كأن فيه حاجه مجهوله بتشده لهناك ..

أهم حاجه أن يحافظ الغطاس على توازنه العصبى و يتبع اٍرشادات المدرب أو المدربه اللى معاه بمنتهى الدقه و الثقه فيهم و خاصة أثناء الصعود للسطح حتى لا يصاب بالتسمم الرئوى أو اٍنفجار المخ و الأمعاء و لا يتسرع فى الاٍنتقال من عمق لآخر و اٍلا مش حيطلع تانى أبدا ..

و دول عتاولة الغطاسين الألمان و هم من القلائل المتخصصين فى مصاحبة من يريد اٍقتحام الثقب الأزرق بمبلغ و قدره و متخصصين أيضا فى اٍنتشال جثث الغرقى من هناك .. بالذات البنت الطليانيه النحيله الهزيله دى اللى تحت المياه بتبقى زى الحوت :

من أمتع النشاطات اللى ممكن أن تمارس هناك القيام برحلة سفارى فى عمق الصحراء المحيطه بدهب .. و للسفارى عدة أنواع منها ما يكون على ظهر جمل أو بالموتوسيكلات الرباعيه أو بواسطة السيارات الجيب .. و فى كل الأحوال فلابد من وجود أدلاء من البدو العارفين بدروب و مسالك الصحراء و اٍلا أنتهت الرحله بما لا يحمد عقباه ..
و أهداف رحلات السفارى كمان مختلفه و متنوعه .. فمنها ما يكون بهدف المكوث فى الصحراء للتأمل و لا لشىء آخر سوى ذلك فى خيام صغيره معده تتسع لفرد واحد و أنت بقى و حظك فقد يكون رفيقك فى الرحله و فى جلسات التأمل و الحوارات الشخصيه و الفلسفيه تحت قمر الصحراء البديع كده و لا حول و لا قوة اٍلا بالله :

أو كده بسم الله ما شاء الله :

و كل واحد بقى و نصيبه ..
طبعا الرحلات اللى من النوع ده مش بتزيد عن يومين أو تلاته و بتتكلف مش أكتر 250 جنيه أو 300 جنيه و ده بيشمل الاٍنتقالات من و اٍلى دهب بواسطة الأخ البدوى اللى بيوديك للمكان و بيسيبك هناك و بيرجع لك فى الموعد المحدد يرجعك و بيشمل كمان اٍيجار الخيمه و الطعام اللى عادة بيكون معلبات و خبز جاف .. و طبعا الماء شىء أساسى ..
رحلات التأمل الصحراويه بتبقى فرصه كويسه أوى للبحث عن الراحه النفسيه و الصفاء الذهنى المفتقدين وسط صخب و جنون المدينه .. و كمان فرصه برضو عظيمه للعوده للحياه البدائيه البسيطه و تنقية الروح من شوائب المدنيه ..
و أما بقى التعرف بالنهار على البيئه الصحراويه المحيطه بك فحدث و لا حرج .. و أيضا لا تدع الفرصه تفوتك للتعرف على جيرانك الجدد هناك بل و اٍحترامهم لأنها مخلوقات الله الضعيفه و لأنك ضيف عندهم زى الآنسه دى :

و الشاب الوسيم ده اللى كان بيدور على عروسه و طول الليل بينكش فى الكراتين :

أما العصافير الحمراء اللون الموجوده بكثره فى الصحراء فأمرها عجيب و الله لأنها جريئه جدا و لا تستحى أنها تشاركك الطعام من الطبق بتاعك بتباته متناهيه :

بس كله كوم و الأخوات التلاته الرخمين دول كوم تانى !!

التلات حمير دول أصلا هربانين من صاحبهم حميد اللى يأس من الاٍمساك بيهم لأنهم مستخبيين فى منطقه جبليه شديدة الوعوره و مطاردتهم فيها خطوره كبيره فكان يكتفى بسبهم و الدعاء عليهم أن يقعوا من أعلى الجبل و تنقطم رقبتهم من غيظه منهم و يحدفهم بالحجاره اللى كانوا بيتفادوها بمهاره فائقه و يردوا عليه الشتيمه بنهيق و تجعير يتردد صداه الرهيب بين الجبال فيخرج الواحد من هدوءه و تأمله و لا يسعه غير تحديفهم هو أيضا بالحجاره من الغيظ ..

و أثناء تجوالك بالنهار فى الصحراء المحيطه بالمخيم أكيد حتلاقى ما يلفت النظر و يستوقفك لتتأمل الحكمه الربانيه فى خلقه .. زى مثلا يعنى هذه النبته الخضراء وسط هذه الأمواج الرمليه الجافه !! سبحانك اللهم و بحمدك رزقتها الحياه فى وسط الأرض الموات :

و من أفضل ما يمكن أن تتفاجىء به أثناء تجوالك النهارى الدائره البيضاء الكبيره المرسومه بواسطة البدو على الرمال و اللى بتعنى أنه بيوجد بئر تصلح مياهه للشرب فى محيط هذه الدائره :

و ده طبعا كنز لا يقدر بمال الدنيا للجماعه اللى بيعملوا سفارى على ظهور الاٍبل و اللى بتستغرق مسيرتها عدة أيام وسط الصحراء القاحله حتى الوصول لواحة عين خضرا المذهله بنخيلها و عيون ماءها المثلجه و بأهلها شديدى الكرم و خفة الظل و بالزراعات العجيبه اللى رائحة زهرتها لما بتعبق هواء الواحه فى الربيع بتسطل اللى دماغه خفيفه زى حالاتى :

نيجى بقى للمغامره الحقيقيه ..

يا سلام على رحله لزيارة منطقة التلال البيضاء و الحمراء و اللى بتعتبر برضو داخله ضمن نطاق رحلات السفارى ..

اللى بيقوم بالرحله دى بيحمل معه حقيبه صغيره يسهل حملها على الكتف بتحتوى على بعض الأطعمه الخفيفه و زجاجتين ماء و شوية تجهيزات بسيطه للاٍسعاف فى حالة حدوث اٍلتواءات أو جروح ..

و كلما طبعا صغرت الحقيبه و خفت الحموله كلما كان ذلك أفضل لأن ده سيساعد كثيرا فى السير و التسلق .. يعنى بلاش تعملوا زى البنت الألمانيه دى و تشيلوا هذا الكم من الشنط المليئه بأصناف الطعام و الحلويات و اللى فكرتنى بالسيدات المصريات اللى بياخوا معاهم فى الجنينه و لا فى النادى كميات أكل تكفى عزومه :

و نصيحه تانيه مهمه أن لا يقوم بهذه الرحله الشاقه اٍلا الواثق من لياقته البدنيه أو على الأقل يستعد لها قبل القيام بها بشوية تمارين لتنشيط العضلات حتى لا يضطر كل شويه لطلب المساعده من السائحين اللى بيتنططوا زى الغزلان بمنتهى اللياقه و هم بيبتسموا كمان ( وش متغاظ أوى )
و أيضا اٍرتداء ملابس واسعه لتسهيل الحركه .. و أحذيه خفيفه .. وربط أنكل القدم برباط ضاغط علشان ما يلتويش أثناء السير و التسلق ..

باٍختصار كده و من الآخر المشوار ده صعب جدا و لا يقدر عليه بجد اٍلا الشباب العفى اللائق جسديا ..

الرحله للمنطقه بتستغرق حوالى يومين و هناك فيه أدلاء مخصوصين بيستلموا أبن آدم من زميله اللى جايبه من دهب .. و بالتأكيد الدليل ده حافظ كل الممرات اللى بداخل التلال كما يحفظ كف يده خاصة أنها تماما كبيت جحا و التائه فيها قولوا عليه يا رحمن يا رحيم و متهيألى كده أن متاهة بنى اٍسرائيل كانت وسط هذه التلال العجيبه :

و فيه مناطق فى هذه التلال وعره جدا و يصعب تسلقها و تحتاج لقوه بدنيه و لياقه هائله .. و حتلاقوا فى بعض المناطق سلالم خشبيه عاملينها البدو بطريقه بدائيه لكن جيده لاٍستعمالها .. و من ضمن المهام الوظيفيه للدليل البدوى صالح اللى على راسه كوفيه حمرا اللى فى الصوره دى أنه يسند السائحات اللى مش بيعرفوا يتسلقوا كويس :شغلانه لطيفه و مش بطاله برضو و ممكن يتحسد عليها ..

تكوينات الصخور و تدرج ألوانها بجد شىء يفوق الوصف !!

من الأبيض الناصع للأسود اللامع مرورا بكل الألوان المعروفه و الغير معروفه و بعضها طبقات فوق بعض و بعضها يتداخل فى دوائر خلابه و تدور فى الأذهان أسئله كثيره محيره عن الحكمه الاٍلهيه من هذه التشكيلات البديعه و دائما تتردد فى النهايه كلمة : سبحان الله !!

يعنى شوفوا التكوين البديع ده !!

شوفوا تدرج الألوان و تداخلها !!

سبحان الله ..

أهم ملحوظه بقى فى المشوار ده اٍن الجماعه الأجانب دول عندهم مبدأين محترمين جدا و عجبونى أوى .. أول حاجه أنهم بيعملوا كل حاجه بحب .. مافيش حاجه مفروضه عليهم .. و بيخلصوا فى حبهم للأشياء لدرجة العشق و الوله .. فتلاقوا أى حاجه بيعملوها بتطلع منهم متقنه ..
الحاجه التانيه أنهم بيحترموا الأشياء .. أى أشياء .. ماشفتش واد و لا بت خوجايه بيحفروا على الصخر الجميل ده قلب و جواه سهم و حرفين أساميهم .. ماشفتش حد منهم بيرمى عود كبريت على أرض الصحراء الشاسعه و لا بيقضى حاجته ورا صخره و يقولك أمال أعمل أيه يعنى أعملها على نفسى ؟؟يا جماعه دول بيحافظوا على التراث اللى ربنا خالقه متعه للعين كمحافظتهم على نظافة بيوتهم ..

و أنقهرت و ربنا لما أفتكرت المناظر و الحركات المؤذيه من طلبة المدارس بتوعنا فى رحلاتهم للمتحف المصرى و لا لمنطقة الأهرامات و أبو الهول .. و الرسومات و الكلام القذر المكتوب بأيدين الأحفاد على قواعد التماثيل و المسلات اللى تركوها الأجداد فى الأقصر ..

بس برضو اٍحنا أحسن منهم ..

نعم ؟؟ بأمارة أيه ؟؟

مش عارف و الله بأمارة أيه .. بس اٍحنا أحسن منهم و خلاص ..

و نرجع مرجوعنا تانى لدهب :)

دهب المدينه اللطيفه الظريفه الحلوه بناسها و اللى بيشتغلوا فيها بمنتهى الجديه و الجدعنه و تقريبا لا المطاعم و لا الكافيهات و لا المحلات بتقفل على مدار ال 24 ساعه ..

بأستمتع أوى فى دهب بصحبة حبيبى و صديق السنين زينهم الشهير بزينهم بامبولينو و هو اللى أطلق على نفسه هذا الأسم الطليانى حبا فى زعيم عصابة المافيا فى نابولى ..

و هو رجل أعمال ناجح و عنده مطعم شيك أوى فى دهب بيطل على البحر مباشرة .. و هو أصلا أبن بلد من العباسيه القديمه و دمه خفيف أوى أوى و له من النوادر ما يملأ مجلدات :)

منها مثلا أنه لما أراد أن يفتتح كافيتريا فى المسبط ملحقه بمطعمه طلب منى أقترح عليه اٍسم يجذب السياح الاٍسرائيليين !!

أتغظت أنا بصراحه و كعادة الفلاحين لم أبين غيظى و كتمته جوايا .. فكرت شويه و فى لحظة تجلى و كأنى لاقيت التايهه قلت له :

- نيوهولوكوست .. هو ده أحسن اٍسم يا زينهم !!

الراجل فكر شويه كده و سألنى فى حيره :

- يعنى معناته أيه بالعربى ده ؟؟

جاوبته :

- نيو يعنى جديد يا زينهم .. و هول يعنى ثقب .. و كوست يعنى شاطىء .. يبقى الاٍسم معناه أييييييه ؟؟

فكر شويه كده و قال فى شك :

- يعنى ثقب الشاطىء الجديد ؟؟ هو فين الثقب ده ؟؟
كتمت ضحكى بالعافيه و شاورت له فى اٍتجاه الثقب الأزرق فى مياه الخليج :

- بالظبط كده يا زينهم الثقب الأزرق هناك أهو و كافيتريتك بقى هى الثقب الجديد ..

اٍقتنع زينهم بكلامى و فرح بالاٍسم اللى كتبه بحروف اٍنجليزى من اٍملائى فى ورقه علشان ماينسهوش و عارفين طبعا الهولوكوست ماذا يعنى لليهود .. و شرع فى تجهيز الكافيتريا و فرشها و لما بدأ فى كتابة اليافطه عند الخطاط اللى فى المدينه كان السياح اليهود بيمروا فى الشارع و يوجهوا نظرات ناريه كلها كراهيه للخطاط اللى بيكتبها ظنا منهم أنه شعارمش يافطة كافيتريا و كان بعضهم بيصور اليافطه و زينهم بيضحك فرحان و فاهم أن اليافطه عجباهم .. و لاحظ زينهم بعد شويه تجمعهم قدام اليافطه بالعشرات و نظرات الحقد و الغضب فى عينيهم بل و بدأ بعضهم فى الاٍتيان بحركات يعاقب عليها القانون بأيديهم لزينهم فخاف منهم و سألهم هو فيه أيه يا جدعان ؟؟

و لما فهم الحقيقه أستشاط غضبا و زعل منى بصراحه و كدنا أن نفقد صداقتنا أثناء العتاب لولا مرور سائحه أوكرانيه قدامنا طيرت عقله ( و ما طيرتش عقلى ) و خلته يسيب القهوه اللى كنا قاعدين عليها و طار وراها ..

السائحه الأوكرانيه دى عملت عنده فيما بعد فى المطعم .. و كان جمالها الأخاذ سببا فى اٍكتظاظ المطعم بالرواد .. و كانت نهاية جيتا - و هذا اٍسمها - مأساويا على يد زوجة زينهم اللى ضربتها بكوبايه فى وشها و خدت فيه 6 غرز بعد أن يئست من زوجها و أيقنت أنه فعلا بيميل لهذه الأوكرانيه الحسناء .. و كانت مشكله كبيره للغايه و خلصت بقرشين تعويض للبنت الأوكرانيه اللى لسه موجوده فى دهب لحد النهارده ..

دهب كمان بتعتبر نقطة اٍنطلاق لسانت كاترين حيث زيارة الدير الأثرى و المسجد اللى بناه عمرو ابن العاص هناك .. و حيث و هذا الأهم زيارة جبل موسى القريب من جبل سانت كاترين ..

زيارتى لجبل موسى و وقوفى فى البقعه المباركه اللى تلقى عليها كليم الله موسى عليه و على نبينا الهادى الأمين أفضل الصلاة و السلام الوحى تجربه روحيه اٍنسانيه جديره بالحكى ..

فأنتظروا البوست القادم ..

مع تحياتى ..

نويبع مدينة الألف وجه !!

2009-07-31T10:30:00.007+03:00

صباح الخير أعزائى المدونات و المدونين ..

علاقتى بجنوب سيناء علاقه قديمه ترجع لعام 1992 لما رحتها لأول مره فى مهمة عمل خاصه و من اللحظه الأولى سقطت فى هواها !!
طبعا من نافلة القول التكلم عن جمال الطبيعه هناك و عن روعة خليج العقبه اللى بيحتوى على غابات ليس لها مثيل من الشعاب المرجانيه و الأسماك الملونه فى أى بحر من بحار العالم ..
لى فى كل مدينه فى جنوب سيناء ذكريات و أصدقاء و ناس بينى و بينهم عيش و ملح و اٍرتباطات عاطفيه من الصعب شرحها و لكنها محسوسه ..

أقرب مدينه لقلبى هى نويبع ..
نويبع البلد الجميله الوديعه اللى بجد ليس لها أخت و لا حتى بنت عم فى أى مدينه فى العالم من مشرق الأرض لمغربها .. آدى البحر للى عايز .. شوفوا الجمال :

و آدى السفارى للى عايز :

نويبع بتقع على خليج العقبه مباشرة و بها ميناء كبير بيزدهر و بيزهزه المدينه فى موسم الحج و العمره و عودة العاملين المصريين من الأردن و دول الخليج .. و بتواجهها من الناحيه الشرقيه للخليج مدينه و ميناء صغير فى المملكه العربيه السعوديه و من السهل جدا لما بيكون الجو صافى أن ترى بسهوله السيارات بل و البشر اللى بيتحركوا هناك .. و لو ضربت بعينك شمال شويه حتشوف مدينة العقبه الأردنيه بوضوح شديد برضو لكن بتكون واضحه جدا و أنت فى طابا و فى نفس الوقت برضو بتقدر تشوف بسهوله ميناء اٍيلات فى اٍسرائيل .. و من الناحيه الغربيه بتحدها سلسله من الجبال شاهقة العلو مليئه بالظبيان و الغزلان و المعيز الجبليه و اللى بالليل بتتقافز قدام السيارات فى الطريق المؤدى لصحراء النقب فى مشهد ممتع للغايه .. أما لحظة شروق الشمس على جبال نويبع الغربيه فشىء لا يمكن وصفه و لا يكف القلب لحظتها عن تسبيح الخالق الجليل خاصة مع صوت هدير جوف الأرض المخيف اللى بيتسمع بوضوح فى هذا السكون المهيب .. أهوه :

آل أيه و الاٍنسان بغباوته و هبله لما تاخده العزه بالاٍثم يقول : ده أنا فيا صحه تهد جبل :))

طيب أهو الجبل قدامك أتفضل هده !! ده أنت يا عم لما ضرسك بيوجعك بتقعد تولول و تقول تعالى لى يامه !!

أستغفر الله العظيم و لا حول و لا قوة اٍلا بالله تباركت يا رب يا من جعلت الجبال أوتادا ..

يعنى نويبع بتتمتع بموقع فريد عجيب لا تتمتع به أى مدينه أخرى فى العالم حيث أنها بتطل على مملكتين عربيتين و فى نفس الوقت بعتبر على حدود اٍسرائيل و ده أدالها طابع مميز برضو من حيث اللهجه و طبيعة الحياه و أهلها البدو الأصليين بيرتبطوا بصلات نسب و مصاهره مع قبائل فى الدول التلاته و بيتنقلوا بينهم بمنتهى السهوله و بدون أى تعقيدات .. أو هكذا كان الوضع فيما سبق ..
ده مدخل مدينة نويبع من الطريق الأوسط مش من ناحية طابا :

الجبل اللى هناااااااك ده فى السعوديه و خليج العقبه بيفصل بينه و بين نويبع ..
سكان نويبع الأصليين بينتمى أغلبهم لقبيلة الترابين و هى كبرى قبائل عرب جنوب سيناء و بتوازى فى قوتها و سطوتها قبيلة الفواخريه فى شمال سيناء .. و أفرادها منتشرين فى مصر و الأردن و السعوديه و اٍسرائيل و بيعملوا فى التجاره و السياحه و الزراعه بالتنقيط و مش ضرورى برضو تعرفوا بيزرعوا أيه !!

بدو سيناء بصفه عامه و خاصة أفراد قبيلتى الترابين فى الجنوب و الفواخريه فى الشمال عايشين فى سلام و وئام و بينهم مصاهره و نسب و مصالح مشتركه .. و حقيقى ناس محترمين و يعرفوا العيب و لا يقربوه .. و الكرامه عندهم تساوى الحياه و الويل لمن يهين كرامة بدوى أو يعتدى على شرفه أو يستخف به .. و أفراد القبيلتين بعضهم بيشغل مناصب عليا و مراكز مرموقه .. و لو حصلت مشكله بينهم فبيلجئوا لكبار قبائلهم و بيحلوا الموضوع ودى بدون تدخل حكومى فيما يعرف هناك بالمجالس العرفيه اللى أحكامها واجبة النفاذ فورا بدون اٍستئناف و لا نقض و لا حيل و ألاعيب و اٍلا تعرض المحكوم عليه للنفى من القبيله و دى مصيبه لا علاج لها بالنسبه للبدوى .. و على مدى سنوات طويله لم تسجل فى أقسام الشرطه هناك سوى حالات سرقه تعد على الأصابع و كان أبطالها من غير البدو يعنى من محافظات أخرى ..
و لو حصلت مشكله بين بدوى و بين ضيف من أى مكان فيكفى أن ينبه الضيف أنه سيلجأ لكبير القبيله علشان يجيب له حقه فتلاقوا البدوى على طول لان و بقى طيب أوى أوى و يسارع لحل المشكله حتى لا يقف أمام شيخ قبيلته متهما بالعيب مع ضيف ..

أقدر أقول بقلب جامد أوى اٍن السياحه هناك سياحه اٍسرائيليه بنسبة 99% .. و ال 1% الباقيه سياحه مصريه متمثله فى أنا شخصيا و فى الأجانب اللى بيفدوا عليها فى طريقهم من و اٍلى طابا .. و ده الحقيقه شىء مؤلم للغايه أن المصريين لسه لم ينتبهوا لجمال و روعة السياحه و التصييف فى مدن جنوب سيناء و سايبينها للى بجد عرفوا قيمتها و عرفوا اٍزاى يتمتعوا بها حتى الثماله .. و أكتفينا بالمصايف المعتاده التقليديه اللى بقت زحمه و خنقه و مش لطيفه أبدا !!

السياح الاٍسرائيليين بالمئات و أحيانا بالألوف أعتادوا على قضاء أجازاتهم الأسبوعيه صيفا و شتاءا يومى الجمعه بعد الضهر و السبت فى نويبع اللى بيدخلوها بدون تأشيره ( و مسموح أيضا للمصريين دخول مدينة اٍيلات بدون تأشيره كما نصت على ذلك اٍتفاقية السلام ) من منفذ طابا البرى اللى بيبعد عن نويبع مسافة حوالى 50 كم بسياراتهم أو بدون و بيركبوا أتوبيسات عامه أو سيارات نصف نقل و ميكروباصات تنقلهم من طابا لنويبع و دهب و سانت كاترين و نادرا شرم الشيخ لأنهم أصلا لا يقدروا على مصاريف الحياه فى الشرم .. و غالبا بيقضوا اليومين دول فى كامبات لطيفه ظريفه على الشاطىء و أشهرها كامبات بساطه و أصاله و هلا و ترابين برادايس و عبد النبى اٍن و بيفضلوا يناموا على كليمات مفروشه على الرمال على بعد خطوتين من مياه الخليج على الطريقه البدويه فى العراء و بجد الناس دول معندهمش حياء أبدا خالص !! ( وش بيلطم )

يومى الجمعه و السبت و فى الأعياد اليهوديه زى الفصح و كيبور و عيد خروج اليهود من مصر و عيد المسخره ( هو أسمه كده ) و عيد الفطير ( مش الفطر ) بتعتبر أيام رواج كبيره أوى فى نويبع بالنسبه للفنادق و الكامبات الرخيصه اللى سعر البيات فيها لا يتعدى 20 جنيه للفرد و دورات المياه فيها مشتركه للرجال و النساء و أيضا للمطاعم و الكافيهات اللى أغلب أصحابها و العاملين فيها من منطقة نزلة السمان فى الهرم و بيتكلموا عبرى زى العفاريت الزرق و التعامل بيكون اٍما بالدولار أو الجنيه المصرى أو الشيكل الاٍسرائيلى اللى بيساوى هناك جنيه برضو .. و بيبقى شاطىء الترابين صاحى ليل و نهار و اٍحتفالات عجيبه و حالات جموح من البنات اليهود مقاصيف الرقبه باهرات الوحاشه ( علشان محدش يزعل ) و الله يرحمك يا عم رأفت يا هجان لو كنت عايش كنت طحنت العالم دى :

و الحقيقه حالات الجموح دى بتواجه بكل حزم من رجال الشرطه اللى ظهورهم على الشاطىء بيسبب حاله من الاٍنضباط الشديد لأن اليهود يخافوا جدا جدا من المشاكل و خاصة مع الشرطه و عنده يتعمل بسطرمه و لا يدخلش الكراكون و يبدو اٍن رجال الشرطه الاٍسرائيليين شاوينهم على الجنبين و مربيين لهم الرعب برضو زيهم زى بقية الشعوب اللى الحمد لله اٍحنا مش منهم .. و ده شاطىء الترابين :

تعرفت فى نويبع فى واحده من زياراتى على شاب بدوى بعد أن غرزت عربيتى فى الرمال فى المنطقه المنعزله من الشاطىء اللى دايما بأعسكر فيها بعيد عن دوشة السياح .. أهيه :

و شدها هو بسيارته النصف نقل و قد تطوع لمساعدتى من غير حتى ما أطلب منه بعد أن شاهد الورطه اللى كنت فيها .. الشاب ده عرفنى على نفسه بعد كده اٍن أسمه عياد و أبوه هو الشيخ زايد – رحمة الله عليه – كبير قبيلة

الترابين فى نويبع و اللى كان مصر اٍصرار لا يلين أن الله سبحانه و تعالى كان يقصد بقسمه (( و هذا البلد الأمين )) مدينة نويبع و لا شىء آخر !!

- طيب ليه يا عم الشيخ زايد ؟؟

فكان رده غريب شويه لما سألته لأنه شايف أن هذا القسم جاء بعد (( و طور سينين )) و نويبع بتقع بعد مدينة الطور يبقى بالعقل كده نويبع هى المقصوده بالقسم .. ده من وجهة نظره طبعا متناسيا أو متجاهلا أن مدينة شرم الشيخ هى اللى بتقع بعد مدينة الطور :))

و تصادقنا بسرعه أنا و عياد خاصة لما عرف أنى من القاهره و رفض بتاتا تناول أى أجر عن شهامته بل و دعانى للغداء عنده فى البيت بعد يومين ليعرفنى على أخوته و أبوه و أتفقنا أنه سيأتى ليأخذنى بعد أن يحضر الدب على حد قوله .. و تساءلت بينى و بين نفسى اٍن كان سيصطاد دبا و يدبحه للغداء و لا أيه ؟؟؟!!!! و شعرت بالرعب من الفكره و الريبه فى أمره خاصة أن نويبع تخلو من الدببه و لكن سرعان ما أكتشفت أنه يقصد بالدب السياره الجيب بتاعته ..

بيته كان عباره عن مبنى كبير من الحجر السيناوى الملون بيطل مباشرة على خليج العقبه .. و المنظر من هناك رائع رائع فوق ما العقل يتصور .. جلسنا سويا نتحدث بعد أن طلب من اٍخوته اللى جاؤوا للغداء معنا أن يحضروا الطعام و قد رحبوا بى كثيرا حتى شعرت بالخجل و الله و كل واحد فيهم أخرج من جيوبه ما يعتبرونه واجب الضيف و لكنى رفضت بشده و طلبت منهم أن يشيلوا من أمامى هذا الواجب المهبب اللى أمقته مقتا شديدا ..

و كان بصحبة واحد فيهم فتاه اٍسرائيليه وعيال أختها و كانت عاوزه تروح العمود .. عمود سليمان كما يسمونه بدو نويبع و بيقولوا اٍن سيدنا موسى عبر خليج العقبه للسعوديه من هذه النقطه قبل أن يتوجه لفلسطين حيث يقابلها من الجهه السعوديه فى جبل اللوز عمود مثله تماما و بيقولوا اٍن نبى الله سليمان عليه و على نبينا أفضل الصلاة و السلام وضع بيده هذا العمود كعلامه .. و العمود ده بيعتبر مزار يهودى مقدس خاصة للبنات اللى عاوزين يتجوزوا حيث بيتباركوا بيه لأن فى زعمهم تمت زيجات كثيره جدا بين شباب و بنات بنى اٍسرائيل فى هذه البقعه قبل أن يعبروا للضفه التانيه من الخليج ( أمال لو كانوا شافو عمدان الصعيد بقى اللى بحق و حقيقى كانوا عملوا أيه ؟؟ ) .. و آدى مسمار جحا الخايب بتاعهم خيبهم الله :

و فوجئت بعد قليل بسيده أجنبيه شقراء ترتدى الملابس البدويه و لكن مش مغطيه وجهها كما النساء البدويات تحضر صينيه كبيره عليها الطعام و الخبز البدوى الشبيه بالرقاق !!

و ياله من طعام .. كان عباره عن خروف مقطع لأجزاء كبيره و مطهو داخل قدرتين فخار بطريقه عجيبه سأشرحها فى آخر البوست و مخليه اللحم زى الزبده بصراحه ..

حيتنى بالاٍنجليزيه و رحبت بى بالعربيه قائلة : يا هلا و مرحبتين !!

و أفترشت الأرض بجانب عياد .. سألته مين دى يا عياد ؟؟

قال : زوجتى يا أبو على .. هى هولنديه و متزوجين من 3 سنين ..

أستغربت من الموقف فحكوا لى القصه من أولها ..

مارجريت أو مارجا كما كانوا ينادوها وفدت لنويبع من هولندا من بلد اٍسمها شيدام عن طريق شرم الشيخ و كانت متوجهه لمدينة اٍيلات فى اٍسرائيل بغرض السياحه .. و فى نويبع تعرفت على عياد و بهرت ببساطة حياة البدو و الطبيعه الخلابه فى الخليج .. فطلبت منه أن يساعدها على البقاء فى نويبع فتره من الوقت .. فأسكنها مع اٍخواته البنات اللى كانوا بيخرجوا يوميا للتنزه و جلب الماء من النبع القريب فعشقت الحياه هناك .. و ده النبع :

و لما ملت من حياة الراحه و البطاله طلبت منه أن يهيىء لها عملا تشغل به وقتها و تكسب منه مالا فأفهمها أن هذا عيب و أنه لا يجوز لضيف البدوى أن يعمل أو يصرف على نفسه .. فأصرت فلم يجد أمامه حتى يرضيها و يدفعها للبقاء فى نويبع لأن الحب قد بدأ يربط بينهما سوى أن يسلمها 3 جمال صغيره و 6 معيز لترعى بهم كام ساعه فى اليوم و يعطيها على ذلك أجرا بشرط أن يرسل معها أخاه ليراقبها من بعيد لبعيد حتى يكون بجانبها لو طرأ طارىء ..

تضحك مارجا من قلبها و تكمل بلهجه عربيه بدويه قريبه من لهجة كوكا فى فيلم عنتره :

- كان الأروام ( يعنى السياح ) يستعجبون من هادى البدويه الشجرا اللى بترعى لابل و لمعيز و كانوا يظنون البدو خاطفين اٍياى و يعرضون يساعدون و أجولهن كونوا بحالكن :)

شويه شويه بدأ الحب الحقيقى تظهر أعراضه على عياد و مارجا اللى بتكبره بحوالى 10 سنين على حسب تقديرى !! .. و كانوا بيتفاهموا مع بعض بشويه اٍنجليزى من اللى أتعلمهم عياد من السياح و طبعا أكتر تفاهمهم كان بالنظرات و الهمسات ( ده أكيد يعنى ) ..

لحد ما عياد أتشجع و طلب يتجوزها بعد سنه من اٍقامتها فى نويبع .. مارجا وافقت على طول و قد عشقت حياة البدو و هامت حبا بالشاب البدوى الوسيم بس المشكله كانت فى عرض هذا الأمر على أبوه الشيخ زايد الرجل المسن العتيد اللى كانت كلمته سيف على رقاب أفراد القبيله اللى بيدينوا له بالطاعه و الولاء ..

أتشجع عياد و جاب أخوه سلامه و أخوه حسن الأشعث و ده اٍسم الدلع بتاعو لأن اٍسمه الحقيقى حسن همبكه و راحوا على أبوهم و فاتحوه فى الموضوع ..

بيحكى عياد و هو بيصب دور الشاى الحبر المغلى مع السكر على نار الراكيه للمره العشرتلاف :

- كنت متوجع بوى ينفينى من الجبيله لكن فوجيت بيه بعد ما حاكينا وياه كتير كتير يبسم و بيجول لى : على بركة الله يا ولدى عل نسل جبيلتنا يتحسن و لو كانت خيوتها متلها مزيونه أرسلون جيبوها لنزوجوها لخيوك هادا التيس الأشعث عله يتمدن !!
يعنى قاله على بركة الله يا أبنى يا عياد يمكن نسل قبيلتنا يتصلح على أيدك و لو كانت ليها أخت حلوه كده زيها نبعت نجيبها من بلدها و نجوزها أخوك التيس ده حسن الأشعث يمكن يتمدن و يبقى بنى آدم ..

مارجا أسلمت و الله وحده يعلم خائنة الأعين و ما تخفى الصدور .. و قبل الزفاف فوجىء عياد بها تطلب منه المهر !!

و يبدو أن من طول عشرتها للبدو و مما كانت تسمعه من اٍخوات عياد البنات صارت مثلهم فى كل شىء :)

فوجىء عياد بهذا الطلب اللى لم يكن على باله .. و ما عاد يملك مالا بعد ما أنفق ما لديه على بناء بيت الزوجيه و فرشه و تهيئته بكل وسائل الراحه الحديثه لدرجة أنه عامل الحمام بورسلين .. فركبه الهم بعد أن أصرت مارجا على موقفها و تمسكت بالمهر .. فما كان من أبيه و أخوته ألا أنهم جمعوا من بعضهم مالا وفيرا و سلموه لعياد ليشترى به ذهبا للعروس و يدفع لها مهرا فرفضت مارجا هذا العرض رفضا تاما !!

و لما وصل الحوار معها لطريق مسدود عرضت مارجا برضو على طريقة البدو أن يتعهد أمام أبيه و أعمامه و أخواته أنه سيدفع لها مهرا و يشترى لها ذهبا فى خلال مده معينه من حر ماله هو و ليس من أموال أهله و أن يتنازل لها حاليا عن الجمال و المعيز اللى كانت بترعاهم و اللى دلوقتى كبروا و بقوا حاجه محترمه لهم تمن و كمان يتنازل لها عن الجحشين اللى بينقلوا عليهم الماء من النبع و على رأى المثل من عاشر القوم أربعين يوم صار منهم !!

لما سمعت الحكايه كاد قلبى أن يتوقف من الضحك و سألت مارجا اٍن كان عياد أبر بوعده و أشترى ذهب و دفع لها مهر ؟؟ فقالت و على شفتيها اٍبتسامة رضا :

- و الله ما صار لهالحين بس عطيانى هالموى أتسبح فيه لحالى :)

و أشارت للخليج ..

نسيت أقول لكم أن مارجا و اٍخوات عياد البنات زينه و هب الريح عاملين زى مشروع صغير كده لصنع الكليم و السجاد البدوى على الأنوال و بيبيعوا للمحلات فى نويبع و دهب و شرم الشيخ و بيكسبوا ما شاء الله كويس جدا ..

ده غير أن معظم البدويات هناك بيتكسبن من حاجه غريبه جدا قد لا تخطر على البال .. و هى أنهم بيجمعوا من الخليج فى الصباح الباكر كائن بحرى أسود تماما اٍسطوانى الشكل و بيسموه .... البحر ( مكان النقط كلمه مش ولابد كده) و بيجففوه بطريقه معينه و بيطحنوه و بيتم تهريبه للخارج حيث بيستخلصوا منه الماده الفعاله و الأساسيه الداخله فى صناعة الفياجرا أو هكذا قيل حيث أن هذا الكائن البحرى غير موجود فى أى مكان آخر فى العالم غير فى خليج العقبه .. ولقد شهدت بعينى البدويات و هن يجمعنه و أيضا خطوات تجفيفه و طحنه ..

ده عياد اللى لابس جلابيه بيضا و سويتر أزرق و اللى وراه اللى لابسه نضاره دى مراته مارجا و اللى واقف وراها ده أخوه حسن الأشعث عازف السمسميه البارع اللى لا يشق له غبار و اللى قاعدين جنبه دول اٍخواته الأتنين التانيين .. أما البت الرخمه المنكوشه دى اللى فى آخر الصوره على الشمال فدى البت الاٍسرائيليه جنات و عيال أختها الشحاتين و تقريبا عندها فوبيا من الاٍستحمام و هى من حركة السلام الآن و بتؤيد الحق الفلسطينى و كانت مصره تورينى آثار ضربة خرزانه على .... ( مش مهم فين بقى ) من عسكرى أمن مركزى اٍسرائيلى أثناء مظاهره مشتركه مع العرب فى القدس ضد شارون و سياسته الاٍرهابيه و كانت ترفع العلم الفلسطينى على حسب حكايتها :

يا بنت الأيه يا مصر .. و الله الواحد كل ما يمشى فيكى خطوتين يتكعبل فى حكاوى تملا كتب .. و كل ما نزهق منك و من عمايلك نلاقينا بنحبك أكتر و أكتر و ياما فى قلبك شايله أسرار و ألغاز ما حد يعرف يفكها غير اللى يعيشك بجد و بحق و حقيقى مش اللى يعيشك فى الكافيهات و المولات و زحمة شوارع مدينة نصر و وسط البلد و يرجع بيتهم يكتب عنك و يلعن سنسفيلك و يبقى كده من وجهة نظره بيحبك و عمل اللى عليه ..
فهمتوا قصدى ؟؟

********************

طريقة عمل الخروف على الطريقه البدويه علشان عارف أنا فيه ناس هنا بتعشق اللحمه الضانى عشقا قد ملك الفؤاد و الروح :

- تجيبوا خروف متوسط و تقطعوه هوبر كبيره شويه و تستبعدوا الليه .. تخلطوا الأجزاء المقطعه ببصل ترنشات و ثوم صحيح و شوية جذور جنزبيل و طبعا ملح و فلفل و ورق لورى و مستكه و حبهان و مرمريه و حاجه اٍسمها السماق من عند العطار و جوزة الطيب و قرنفل و قرفه و أوراق ريحان خضراء و يتحط كل ده فى القدور الفخار المبطنه من الداخل بماده عازله لا تسمح بالترشيح و تقفل جيدا جدا و باٍحكام بالطين مع الحرص اٍن الطين ميقعش فى القدور و عمل ثقب صغير جدا يسمح بخروج البخار.. و تترك لتجف ..

تكونوا بقى محضرين من قبلها حفره فى الرمل بعمق متر و نص مثلا و مليانه حطب و تولعوا فيه و تسيبوه لما ينطفى و يصفى و يبقى جمر .. تدفنوا فيه هذه القدر الفخاريه باللى فيها و تردموا عليها كويس و تسيبوها يومين مع مراعاة عدم دفن بق القدره و ترك الثقب الخاص بخروج البخار غير مغطى و اٍلا أنفجرت القدور.. و لما تطلعوها بعد يومين حتلاقوها لسه بتغلى و اللحم بقى زى الزبده و تقريبا منفصل عن العضم .. و بألف هنا و شفا ..

أشوفكم على خير اٍن شاء الله البوست الجاى أحكى لكم شويه عن مدينة دهب و ثقبها الأزرق و صديقى زينهم بامبولينو اللى مراته خدت وش الوليه الأوكرانيه بقعر الكوبايه ضبه و مفتاح و جابت لها حول فى الشبكيه و بقت بتتكلم زى فؤاد المهندس لما كان بيغنى لهند رستم و يقول : يا حبيبى أفافا ..

و لكم التحيه ..

بوست عميق المغزى !!

2009-07-26T16:08:00.003+03:00

سيداتى آنساتى سادتى من راس سدر جنة الله على الأرض أحييكم و لسه قاعد و النبى مستنى التصاريح بتاعت السفارى و يبدو أن المسأله حتطول و لو طولت أكتر من كده حتبقى رخمه لأنى بقالى ييجى 10 أيام مستنى الفرج لما بقيت شكل النيجاتيف من الشمس الحاميه لأن يومى كله بأقضيه فى الصيد و الاٍلتقاط و الزراعه ..

صيد الكابوريا و شويها لما تشبعت أعضائى بالمغنسيوم و الفوسفور و خلاص حأطق من جنابى :

و اٍلتقاط التمر من على النخل :

و زراعة حدائق شاليهات جيرانى لوجه الله حبا فى الزراعه و الله :

و الحقيقه كده حاسس بعد ما أتقطعت هدومى من الصيد و الشعبطه على النخل و زراعة الجناين و دقنى طولت و بطلت أحلقها أنى بقيت زى توم هانكز فى فيلم Castaway لما الطياره وقعت بيه فى جزيره مهجوره عاش فيها 4 سنين و خلع ضرسه بالزحليقه و بقى عايش على الكابوريا المشويه لما أتجنن و بقى بيكلم الكوره .. أهو :

و اللى زود الرخامه كمان اٍنقطاع خدمة الأنترنت عن المودم اليو اٍس بى رغم أن مافيش أى مستحقات ماليه متأخره عليا و بعد محاولات عديده معاهم أستمرت لأيام و أتحرق فيهم كارتين شحن ب 100 جنيه الواحد و الله رجعت الخدمه آى نعم بطيئه بطء مضحك و لكنها فى النهايه شغاله و خلاص و الأمر لله ..
النهارده لو تسمحوا لى عاوز أعرفكم على أصحابى :

و اللى مؤنسنى فى وحدتى صيفا و شتاءا خاصة شتاءا لأن الشط كله بيبقى فاضى من المصيفين و مافيش غير أنا و هم .. بوزنا فى بوز بعض ليل و نهار .. و لكم أن تتخيلوا شاطىء فى جنوب سيناء طويل و عريض يخلو شتاءا من تاء التأنيث و مافيهوش غير شنبات شوفوا بقى يبقى دمه تقيل قد أيه !!
بس أيه شنبات مش أى شنبات :

دى شنبات رجال حرس الحدود المصريين .. ولاد الجيش المصرى المخلصين اللى بجد بيقدموا حياتهم فداءا لأداء واجبهم على أكمل وجه و بشكل يثير الاٍعجاب ..

الحقيقه أعتدت أثناء تجولهم على الساحل المنعزل المطل على خليج السويس أثناء دورياتهم أن أدعوهم للشاى أو الطعام أو حتى أناولهم زجاجة ماء مثلج .. و كانوا دائما يردوا بنفس الجمله و باٍبتسامه لا تخلو من الألاطه المصريه الأصيله اللى بالكم فيها :

- شكرا .. مابناخدش حاجه من حد حضرتك ..

كل مره كان ده بيبقى ردهم المعتاد .. و كنت فى الأول أظن أنها حاله فرديه لدى جنديين أو تلاته .. لكن مع تغير الوجوه السمراء اللى زى العسل دى و ثباتهم على نفس الرد و الرفض أيقنت أنها حاله عامه لدى رجال حرس الحدود .. فعلا مابياخدوش حاجه من حد حضراتكم .. و لا حتى كوباية شاى على سبيل التحيه و هم رايحين جايين على طول الساحل ليلا و نهارا بيحموه من تسرب أى ممنوعات منه و اٍليه و على أكتافهم سلاحهم و زمزمية مياه بتغلى من شدة الحر :

أنا بأحترم الشباب دول جدا جدا و بأحبهم أوى و اللى عينيهم لن تمسها النار باٍذن الله و قد باتت تحرس فى سبيل الله .. خاصة أنه كان ليا معاهم موقف قد لا يتكرر فى حياة الاٍنسان مرتين و ربما يعيش اٍبن آدم قد ما يعيش و يموت و لا يعيش الموقف اللى حصل لى معاهم و اللى مش عارف ينفع أحكيه و أعرض الكليب الخاص بيه و لا مينفعش ؟؟؟

حأحكيه و خلاص .. يعنى هو أنا بأقول حاجه وحشه ؟؟ و لا أنا بأتكلم عن حد غريب ؟؟

أنا بأتكلم عن ولادنا و أخواتنا أبطال حرس الحدود و زهرة شباب الجيش المصرى اللى هم خير أجناد الأرض و فى رباط اٍلى يوم الدين .. و لعل ما سأحكيه و أعرضه سيكون له فائده و مغزى و شىء جديد لمن يعتبر ..
صلوا على حضرة نبينا الأمين عليه الصلاة و السلام ..

المكان يا جماعه اللى بأقعد فيه فى راس سدر بعيد شويه عن العمران .. يعنى قبل المدينه نفسها بحوالى 10 كم .. و البيت نفسه لا يبعد عن مياه الخليج بأكثر من 30 متر .. و أما الشاطىء فهادىء للغايه لأن القريه نفسها مش زحمه خالص و عدد سكانها قليلين جدا ..

يوم 15 يونيو 2008 قبل منتصف الليل بقليل ..

كنت قاعد بأسمع الست سومه و هى بتغرد و بتقول : حيرت قلبى معاك و أنا بأدارى و أخبى ( حبيبة قلبى يا سومه ) .. و بتأمل فى النجوم و السما و صوت البحر عامل خلفيه رائعه مع هذا الجو الرومانسى و كمان مع أضواء و صفارات السفن العملاقه الراسيه فى عمق البحر مستنيه تعدى قناة السويس فى رحلتها الشماليه .. و عقلى صافى و نفسى هاديه و كله تمام التمام ..

فجأه تظهر من الناحيه اليمنى للشاطىء سياره مطفية الأنوار و ماشيه قريب جدا من مياه البحر و تقف قدامى مباشرة و لا يفصل بينى و بينها سوى المسافه اللى بين البيت و بين البحر ..
و فى ثوانى بينزل منها عدد من الأشباح و بيفتحوا شنطة العربيه و بيشيلوا حاجات تقيله على كتافهم و بيتوجهوا بيها للمياه !!

تبينت على الفور هدفهم و هو مركب راسيه بالقرب من الشاطىء ما أتبينتش حجمها و برضو كانت مظلمه تماما و فى حالة سكون تام لدرجة أنى لم أنتبه لوجودها أصلا ..

أدركت على الفور أن ثمة ما يريب فى الأمر .. و أن ما كنت أسمعه عن محاولات المهربين الدائمه اٍستعمال هذه النقطه المنعزله من الخليج لتهريب سمهم الهارى اللى اٍن شاء الله حيتهروا بيه يوم القيامه حقيقه و ها هو يحدث أمام عينى ..

طيب و بعدين ؟؟

تعمل أيه يا عبد الرحيم ؟؟ تعمل أيه يا عبد الرحيم ؟؟

و لسه بأشغل دماغى اٍلا و يشق صمت الليل صوت جهير كله ثقه و بيقول :

- اٍثبت محلك حأضرب فى المليان !!

و عينكم ما تشوف اٍلا النور !!

اٍلا النور فعلا ..

النور اللى أضاء سماء المنطقه من ضرب الرصاص الغزير الكثيف اللى أنطلق من المركب و من الرجال اللى نزلوا من العربيه و من قائد العربيه نفسه !!

مفاجأه غير متوقعه فى هذه الليله الرائعة الحسن :)

فى لمح البصر تصرفت بشكل غريزى طبيعى و أخدت ساتر خلف عمود خرسانى أتابع ما يحدث و قلبى يدق بعنف ..

كانت نيران المهربين غزيره و كثيفه و من أسلحه آليه لكنها عشوائيه صادره من ناس جبناء أصلا و اٍيديهم بتترعش و لا يهمهم سوى الفرار بعمرهم من أيدى رجال حرس الحدود اللى كان عندهم اٍصرار و عناد على توقيف المهربين ..

و أما رجال حرس الحدود فما شاء الله عليهم رغم أنهم كانوا أتنين فقط اْلا أنهم قدروا بدقة تصويبهم و شجاعتهم اللى أذهلتنى أنهم يتغلبوا على كل العصابه و يسكتوا كل النيران اللى على الشط و اللى على المركب بل و ينزلوا هم الأتنين لوحدهم للمياه ليطاردوا المركب اللى موتورها أشتغل فجأه و أستدارت تجاه الساحل الغربى و ظلوا يطلقون عليها النيران حتى سكت صوت موتورها هو الآخر ..

الموضوع كله لم يستغرق أكتر من 7 أو 8 دقائق على حسب تقديرى أستغرقتها فى متابعة الحدث الفريد و الدعاء لله بكل ما أحفظ من أدعيه أن يسترها ربنا مع الجدعان بتوع حرس الحدود و يحميهم من كل سوء و أن يسدد رميتهم .. و دعيت كمان و الله على المهربين أن ربنا يجعلهم عبره و يجعل من بين أيديهم سدا و من خلفهم سدا و يغشيهم فهم لا يبصرون ..

و الحمد لله أدركت أن دعائى قد أستجيب بعد ما توقف ضرب النار و أنقشعت رائحة البارود من الهواء و أصبح لا يشق الصمت سوى صوت تأوهات و توجعات و كلام بلهجه بدويه يقطعه صيحات من الجنود اللى بدأوا فى التوافد من على الطرف البعيد للشاطىء مهرولين و هم بيهددوا أى شىء سيتحرك بضرب النار فى المليان فورا .. و بدأت أضواء السيارات الجيب التابعه للجيش و أيضا سيارات الاٍسعاف فى التوافد .. و بدأ الكثيرون من الرجال المرتدين اليونيفورم المموهه و بيحملوا كشافات قويه فى مسح الشاطىء و كذلك مياه البحر ..

مش أكتر من نص ساعه و عاد كل شىء كما كان .. و كانت الست سومه بتختم أعجوبتها حيرت قبى معاك ( آى نعم و الله حيرتى قلبى معاكى ) و أنسحب كل الموجودين من حيث أتوا و أنسحبت كل السيارات من حيث أتت و بقيت لوحدى أسترجع شريط أحداث ما حصل و أنا مذهول حتى غلبنى النوم فى مكانى ..

يوم 16 يونيو 2008 :

أدركت حجم المعركه اللى دارت بالأمس لما توجهت للشاطىء صباحا و معايا كوباية النيسكافيه العجب و شاهدت بعينى آثار الدماء المتناثره بغزاره و آثار عجلات السيارات المحفوره على الرمال .. و دعوت الله من كل قلبى أن تكون هذه دماء المهربين الأندال فقط ..

و لسه بأتأمل فى الرمال المخضبه باللون الأحمر و ألاقى جاى عليا من اليمين قمرين :)

قمرين و الله قمرين .. قمرين مصريين لابسين يونيفورم حرس الحدود و مسلحين و معاهم كيس بيضعوا فيه أشياء لم أتبينها بيلتقطوها من على الرمال .. و واحد فيهم شايل هلب مركب و كوفيه بدويه و فردة شبشب أتضح لى فيما بعد أنها حاجات خاصه بالمهربين و التانى منهمك بشده فى تأمل الرمال ..

قالوا لى : صباح الخير .. معلش يا حاج دوشناك اٍمبارح !!

- دوشتونى ؟؟ بس طمنونى الأول أيه الأخبار ؟؟

اللى كان بيلتقط أظرف الطلقات الفارغه توقف عن عمله و قال ببساطه شديده و كأنه أمر عادى جدا :

- الحمد لله قدرنا نمنع التهريبه و ظبطنا 300 كيلو مخدرات متنوعه و موتنا واحد من المهربين و هرب واحد تانى فى البحر ( ألقت الأمواج بجثته على الشاطىء بعد 3 أيام ) و قبضنا على أربعه ..

قلت و أنا مبتهج :

- ما شاء الله ربنا ينصركم .. بس طمنونى على زمايلكم اللى ضربوا نار على المهربين الحمد لله بخير ؟؟

بصوا لبعض و أبتسموا و قال أحدهم فى تواضع :

- زمايلنا ؟؟!! زمايلنا مين ؟؟ ما أحنا أهو قدامك اللى ضربنا النار اٍمبارح ..

أبتهجت أكثر و قلت :

- طيب الحمد لله على سلامتكم ..

*************************************

ربنا يخليكم لمصر يا ولاد مصر .. و يحميكم و يحرسكم زى ما بتحمونا و بتحرسونا من أى خطر بيهددنا و اٍحنا نايمين فى بيوتنا فى العسل فى التكييف و أنتم بتراعوا شغلكم و واجبكم تحت كل الظروف اللى لا يقدر على تحملها سواكم ..

و أما أنتم أيها الجبناء الأندال فأعلموا أن رصاص رجال جيش مصر مستنيكم فى كل مكان و فى كل شبر من أرض سيناء و أوعوا تفتكروا أنها سايبه و لا فاضيه زى ما الناس فاهمين .. لاااااااا .. دى متأمنه ضد أى خطر فوق ما العقل يجيب .. و كفايه مش حأقول أكتر من كده :)

أدعوا لى بقى و النبى يخلص تصريح السفارى .. و أشوفكم البوست الجاى اٍن شاء الله و أحكى لكم عن الست الهولنديه مارجا اللى أتجوزت فى نويبع عياد اٍبن الشيخ زايد و كان مهرها 3 جمال و 6 معيز و جحشين ..

تقبلوا تحياتى ..

من راس سدر أحييكم ..

2009-07-18T13:30:00.003+03:00

صباح الخير أعزائى المدونات و المدونين ..

أولا بأعتذر لكم بشده عن عدم الرد على تعليقاتكم عندى فى الكام بوست اللى فاتوا و ده و الله لأنشغالى الشديد جدا بأمور كثيره طبعا مش أهم من الرد على التعليقات لكن أيضا ظروف النت السيئه و بطئه المفرط من أسباب عدم الرد ..

أرجو تتقبلوا عذرى ..

******************************************

من جنوب سيناء أحييكم حيث أمر بتجربه فريده ..

تجربة الاٍستعداد للقيام برحلة سفارى فى قلب الصحراء للمره الثالثه فى حياتى .. رحلة السفارى بالنسبه لى بتبدأ من راس سدر و منها لأبو زنيمه على بعد 80 كم و منها للتلال الملونه شرقا فى عمق الصحراء على بعد 80 كم تانيه ..

طبعا رحله زى دى لا يجوز أن يأخذها الاٍنسان ببساطه و سهوله لأنها بتحتاج لتجهيزات كتيره بيتولاها دليل بدوى من العالمين بطبيعة الاٍقامه فى قلب الصحراء .. و الدليل اللى معايا و أسمه طبعا لازم يكون سالم سلمان بيتولى اٍستخراج التصاريح الأمنيه اللازمه و الاٍبلاغ بمنتهى الدقه عن خط سير الرحله و نقطة النهايه و اليوم المتوقع لعودة صاحب الرحله و كده يعنى ..

أيضا بيتولى الدليل تجهيز خيمه و كليم لزوم النوم .. و شوية لوازم للأكل زى الدقيق و الرز و المعلبات و شوية لوازم اٍسعافات أوليه أهمها ترياق لسم العقارب و الأفاعى و طبعا كميه لا بأس بها من الماء و بيتولى نقل هذه الأغراض بسيارته النصف نقل و معاه السائح لو مش معاه سياره ملائمه للسير فى طرق الصحراء الغير ممهده أو غير متمرس على كده ..

أحب أعرفكم أن فى قلب الصحراء جربت كل أنواع خطوط الموبايلات ما أشتغلش غير خط فودافون و دى ملاحظه مهمه جدا جدا جدا للى ناوى ينعزل عن العالم لو حدث طارىء لا قدر الله ..

دلوقتى أنا فى مدينة راس سدر و هى أول مدينه بمعنى كلمة مدينه تقابل القادم من القاهره فى طريقه لشرم الشيخ بعد عبور نفق الشهيد أحمد حمدى رحمه الله و بتبعد عن النفق من مدخله الشرقى بحوالى 60 كم ..

راس سدر بجد مدينه رائعه رائعه .. بتجمع ما بين الطابع البدوى السيناوى و ما بين المد العمرانى السياحى المتمثل فى عشرات القرى و المنتجعات السياحيه اللى بتطل على خليج السويس من الناحيه المقابله للعين السخنه فى الجهه الغربيه من الخليج ..

و رغم فخامة و روعة هذه المنتجعات المقصور دخولها على أصحاب الشاليهات و الفيلل لكن الحق يقال اٍن الشاطىء العام أجمل و أحلى من الشواطىء الخاصه لنظافته الشديده و لخلوه من الصخور و تمتعه بشاطىء رملى جميل تم تنظيفه بعنايه و مهاره على عكس شواطىء المنتجعات السياحيه الخاصه ..

و اٍيجار الشقق للمصيفين بيتراوح ما بين 70 و 200 جنيه فى اليوم على حسب شياكة الشقه .. أما فى الشتاء فبينخفض السعر للربع و ربما أقل ..

مدينة راس سدر فيها محلات و كافيتريات و مطاعم و أسواق كثيره و أسعار السلع فيها عاديه بدون مبالغه كبيره و أغلب أصحابها و العاملين فيها من أهالى مدينة السويس أصلا .. و أما سكانها البدو الأصليين اللى بيضحكوا دائما و عينيهم على طول مقفوله نص قفله ( ايوه كده بالظبط علشان السبب اللى أنتم قلتوه ) فبيعملوا فى مهن مختلفه زى قيادة سيارات الأجره و النصف نقل و الزراعه بالتنقيط و مش لازم تعرفوا بيزرعوا أيه .. و بيمتازوا بالأمانه و الحفاظ على الوعد و لو على رقابتهم و الكرم خاصة مع الضيوف و الحفاظ على نسائهم و الرقه المتناهيه فى التعامل معهن ..

بحر راس سدر يخلو تقريبا من الشعاب المرجانيه و ربما يكون ده السبب فى كونها غير جاذبه لهواة الغطس من مختلف أنحاء العالم رغم بعدها عن شرم الشيخ بحوالى 300 كم و كلنا طبعا عارفين شهرة شرم الشيخ فى هذا المجال ..

لكن الحقيقه أن بحر راس سدر بيمتاز بهدوئه اللى يغيظ و نظافة مياهه و خلوها من أى ملوثات و أيضا بيمتاز بوجود الكثير من الدرافيل اللى يمكن مشاهدتها بالعين المجرده أثناء قفزها و لهوها و بجد شكلهم ممتع جدا ..

و أيضا تحدث ظاهره لها العجب هناك لم أرها فى أى مكان آخر و هو اٍنحسار مياه البحر لمسافة كيلو متر تقريبا أثناء فترة الظهيره مره و قبل المغرب بشويه مره تانيه مما يتيح سهولة المشى على قاع البحر و بالتالى جمع أحجام عجيبه من الكابوريا النتايه اللى وصى على أكلها الحكماء .. و لكن يجب توخى الحذر لأن فجأه البحر بيرجع يعلى تانى و بيطبق على كل شىء فى لحظة غضب مخيفه بتذكرنى بقصة اٍبتلاع البحر لفرعون موسى و جنوده و من المفارقات العجيبه وجود عيون موسى الشهيره بالقرب من المكان اللى بأحكى لكم عنه و اللى بيقال أن سيدنا موسى فجرها لبنى اٍسرائيل بقدرة الله عقب عبورهم للبحر و فرعون وراهم عاوز يقفشهم .. و قد شاهدت بعينى هذه العيون ال 12 و شربت من مائها و توضأت و سبحان الكريم اللى جعل طعمها أحلى من الشهد و الله ..

مدينة راس سدر أيام الاٍحتلال الاٍسرائيلى لشبه جزيرة سيناء كانت مركز لأجهزة الاٍستخبارات و الأمن الاٍسرائيليه و لا يزال لليوم يتذكر كبار السن من أهل المدينه العمليات الهجوميه العنيفه اللى كانت بتقوم بها قوات الكوماندوز المصريه ضد هذه الأجهزه أيام حرب الاٍستنزاف .. و كثير أيضا من أهل المدينه كانوا منضمين سرا لمنظمة أولاد الأرض اللى تكونت سرا من أهل سيناء لمقاومة الاٍحتلال الاٍسرائيلى و سقتهم الذل كاسات بسبب ما أشتهر عن أهل راس سدر من وطنيه و دهاء و سعة حيله و درايه تامه بدروب و مسالك الصحراء الشاسعه ..

و من الجدير بالذكر أنه أمام شاطىء المدينه تقبع فى أعماق الخليج 11 طائره فانتوم اٍسرائيليه تم اٍسقاطها بواسطة أبطال القوات الجويه المصريين فى حرب أكتوبر اللى شنوا هجمات جويه عنيفه على مراكز الاٍستخبارات العسكريه الاٍسرائيليه بالمدينه فى الدقائق الأولى للحرب و سويتها بالأرض كما حكى لى ..

بينى و بين راس سدر غرام و هيام و همسات و كلام ..

أهرب اٍليها كلما أشتقت للهدوء و السكينه خاصة فى الشتاء حيث تخلو تماما من الناس و بيبقى بوزى فى بوز رجال حرس الحدود الجدعان المصحصحين اللى بيحموا الشاطىء من تسرب أى صنف من الممنوعات من و اٍلى الجانب الغربى من الخليج برجوله و دقه متناهيه .. ولى فى هذا الخصوص حكايه عجيبه غريبه تشهد بمدى صدق و فدائية و أمانة رجال حرس الحدود بس مش عارف هل يجوز لى حكيها و لا لأ ؟؟

و أما الآن فى عز الصيف فشاطىء المنتجع بيزدحم بالمصيفين على كل الأحجام لما الواحد عينيه أحولت و الله و لا مفر لى من رحلة السفارى حيث لا شىء سوى السماء و التلال الملونه و صخب الصمت و التفكر فى خلق السماوات و الأرض ربنا ما خلقت هذا باطلا سبحانك !!

اٍن شاء الله أشوفكم فى بوست تانى قبل ما أبدأ رحلة السفارى أحكى لكم عن شوية ملاحظات كده خاصه بالسياحه الداخليه فى جنوب سيناء ..

متشكر لكم ..

أحبببك يا أبيض :))

2009-07-10T22:54:00.007+03:00

أوباما فى اٍيطاليا (لاحظوا ضحكة ساركوزى اللئيمه )

أوباما فى مصر

هو أنت كده ؟؟ !!

شكلك حتحصل كلينتون بدرى بدرى يا سى ياسين :))

صلاة الزين على عيالنا

2009-07-07T18:13:00.006+03:00

لأنى أب حنين على عيالى و قلبى بيهفهف عليهم هفهفه قررت فى لحظة تجلى أنى أبيع الواد اٍبنى الصغير آخر العنقود السكر المعقود عبد الرحمن عمرو الشهير بالواد الشيخ عبده حيث أنه أزهرى نشأ و ترعرع فى أحضان الأزهر الشريف منذ نعومة أظافره ..

و أصل الحكايه اٍنى بعد تفكير عميق وجدت اٍن أسلم السبل لضمان مستقبل سوبر لوكس للولد أنه يطلع لعيب كوره محترف و من ثم يتباع لنادى من الأنديه الكبيره بالملايين زى ما بنسمع عن لعيبة اليومين دول .. و مين عارف يمكن ربنا يكرمه و يتباع لنادى من نوادى أوروبا و تبقى الحكايه زهزهت معاه و يمكن مع اٍخواته كمان ..

و مكدبتش خبر .. و فضلت أنكش بمنكاش لما عترت و اللقا نصيب فى أكاديميه متخصصه فى تدريب العيال اللى فى سنه على مهارات الساحره المستديره بيديرها نخبه من لعيبة مصر العالميين الكبار اللى اٍعتزلوا المستطيل الأخضر و أنشأوا هذه الأكاديميه الفذه لتخريج جيل جديد من اللاعبين المحترفين ..

صحيح لاقيت الأمرين علشان ألحق الولد بالأكاديميه لأنها مقصوره على أبناء صفوة المجتمع و لأنها أصلا بتقع داخل كمباوند بيمر الداخل له على عدة نقاط تفتيش بسبب أهمية بعض ساكنيه .. و لكن الحمد لله أستطعت بتوفيقه تعالى أن ألحقه بها و أن أدبر مصاريفها المرتفعه و كله يهون فى حبك يا بت يا مدوره ..

و تمضى الشهور .. و يندمج الواد الشيخ عبده فى الأكاديميه و تبرز مواهبه الفذه كراس حربه ( الله يمسيك بالخير يا بيبو ) لا يشق له غبار .. و يحرز ميدالية أحسن هداف فى الأكاديميه .. و يشكل مع رفاقه فريق كوره مرعب لفرق الكمباوندات المجاوره بفضل مدربهم الكابتن الدولى و المحترف السابق فى اٍيطاليا ..

و أنا بقى يا فرحتى بأبنى كابتن مصر المستقبل لما أروح معاه يوم بعد يوم أتابع تدريباته و مبارياته .. و أقول فى عقل بالى يا ويلك يا ميدو يا ضلام ليلك يا أبو تريكه اٍدارى من كسفتك يا زيدان جايلكم لعيب محترف مافيش زيه .. بس ربكم لما يحب يكشف المستور بيكشفه رغما عن مناخير الجميع ..

الأسبوع اللى فات بقى أعلنوا فى الأكاديميه عن اٍقامة مباراه وديه بين فريق الواد أبنى و بين فريق مركز شباب بهموه السوق يوم 6\7 !!!!

فين يا أخوانا بهموه السوق دى ؟؟؟ الله و رسوله أعلم .. محدش عارف !!!

اللى يقول تقع بهموه السوق بعد بهموه المحطه بأتنين كيلو .. و اللى يقول لا لا دى قبل بهموه البلد بتلات مصارف و حاجات كده يعنى بس الخلاصه أنها بتقع فى أدغال الريف المصرى العتيد و برضو الله أعلم ..

اٍمبارح بقى كان ميعاد الماتش .. و أرتدت الأكاديميه أبهى الحلل مسبقا بمناسبة الفوز المرتقب على فريق عيال الفلاحين اللى حيسحقوهم فريق عيال الأغنيا و اللى لبسوا الأطقم الجديده اللى بالشىء الفلانى و جزم الكوره الجديده اللى برضو بالشىء الفلانى و اللى مش فاكر الوله أبنى قالى على اٍسمها بس نسيته و اللى أعرفه أنها على أيامنا كان اٍسمها الجزمه أم بزابيز .. و طبعا أهالى العيال برضو ملوا المدرجات علشان يفرحوا بعيالهم و كلهم من النوعيه اللى بالكم فيها دى اللى هم بيتكلموا كلمه عربى و عشره لامؤاخذه فرنساوى .. و الكل مترقب وصول الفريق الضيف اللى جاى ينسحق على حسب اٍعتقاد الجميع ..

و فجأتن يوصل الأتوبيس بتاعهم .. أتوبيس كده منظره كئيب و متهالك من اللى بنسميه فى الفلاحين الحلزونه .. و ينزل منه الفريق الضيف ..

العيال يا حبايب قلبى قد عيالنا برضو .. لابسين يا حبايبى شورتات و فانلات قديمه أكل عليها الدهر و شرب و مش كلهم كمان لابسين زى بعض .. و فى رجليهم جزم مشكله كاوتش من باتا على كوتشيات مخرمه و معاهم مدربهم اللى كان لابس تريننج من أبو 30 جنيه و كان خايف عليهم و بيلمهم تحت جناحه كأنهم كتاكيته خاصة أن عيال الفلاحين بان عليهم الاٍرتباك و الخجل بسبب اٍستقبال عيالنا اللى ينقرصوا و كان اٍستقبال ملىء بالسخريه و الملاحظات الرخمه عن هيئتهم المتواضعه ..

بس ربكم و الحق أنا من البصه الأولى أدركت الفرق الكبير بين بنية عيالنا الجسديه و بين العيال دول .. و كانت المقارنه مش فى صالح عيالنا أبدا !!

و أبتدا الماتش .. و شويه شويه بدأ فريق عيال الفلاحين فى فرض سيطرته المطلقه على الملعب .. و أظهروا رجوله و فدائيه و اٍستبسال رغم هتافات مشجعى فريق الأغنيا المحبطه .. و بدأ مهرجان تسجيل الأهداف :)

اٍكتشفت أن عيالنا فاقدين لحرفية تنفيذ الخطه اللى رسمها لهم مدربهم اللى أشهد له بالبراعه .. و فى المقابل كان الفريق الضيف يلتزم تمام الاٍلتزام بخطته و ينفذها حرفيا .. بان لى الفرق الشاسع بين لياقة الفريقين البدنيه و لما سلمت على عيال الفلاحين بعد اٍنتهاء الماتش يدا بيد أدركت من خشونة أيدين أغلبهم أنهم بيشتغلوا فى الغيط مع أهاليهم و ده طبعا أكسبهم صحه مش موجوده عند عيالنا المترفهين المتدلعين بتوع النجتس و الكورن فليكس و النوم فى التكييف للعصر ..

و أبتدا أهالى العيال الأغنيا يبلموا و المامهات دموعهم اللولى تسح على خدودهم البنور بسبب خيبة عيالهم القويه اللى أتصرف عليهم مبالغ طائله علشان يبقوا لعيبه محترفين ..

و لاقيت نفسى بدون ما أشعر بأشجع العيال لعيبة بهموه السوق أنا و سواق أتوبيسهم و أم عيل فيهم منقبه كانت بتناول العيال أزايز الميه علشان يشربوا .. و شويه شويه أبتدا التشجيع فى المدرجات يتنقل لصالح الفريق الضيف اٍعجابا بحرفنتهم و اٍصرارهم المخيف على الفوز مما زاد فى وكسة عيالنا و بقوا يجروا مفرشحين فى الملعب بدون هدف و لا غايه زى اللى ندهتهم النداهه و طبعا كانت النهايه أنهم أتهزموا هزيمه تقيله منكره غير مسبوقه ..
عارفين مع صفاره نهاية الماتش كانت النتيجه كام ؟؟

8 \ 3

أيوه 8 \ 3 لصالح فريق عيال الفلاحين مقابل 3 أهداف لعيالنا الواد أبنى سجل منهم هدفين ..

و طبعا أنسحبوا عيالنا من الملعب و هم يجرون ورائهم أذيال الوكسه و الخيبه القويه كعروسه راجعه على بيت أبوها يوم الصباحيه بعد ما كانوا قبل الماتش ماليين الدنيا هيصه و عنظزه و نكت و تريقه على ولاد الفلاحين اللى حيرجعوا البلد يلموا الدوده من الغيط على حد قولهم ..

و أما العيال الغلابه التانيين اللى ربنا جبر بخاطرهم فبسم الله ما شاء الله اللهم صلى على حضرة نبينا الزين كحيل العين كانت فرحتهم بالنصر المؤزر على ولاد الأغنيا اللى تعاملوا معاهم من فوق لا تضاهيه فرحه و حملوا على أكتافهم القويه مدربهم و سواق أتوبيسهم بالمره و لفوا بيهم أرض الملعب الشيك أوى اللى أزعم أنهم عمروا ما لعبوا على ملعب بالأناقه دى قبل كده .. و اللى شرح فؤادى و بهجج خاطرى أن عيل فيهم معرفش جاب منين علم كبير أوى لمصر و أبتدا يلوح بيه فى فرحه عارمه :)

و أنا مروح بأبنى لاحظت أنه ساكت و متنح على غير العاده و لما سألته عن السبب و أنا بأضحك علشان أغيظه قال فى بجاحه تشوبها حسره : غلبونا يا بابا علشان الهوا كان ضدنا فى الشوطين !! و كمان بيزقوا و لعبهم خشن !! و الحكم كان موالس معاهم !! و بصراحه كده الماتش ده مش محسوب !!

قلت له : أبشر يا أبنى مادام وصلت لكده يبقى حتنضم للمنتخب فى يوم من الأيام ..

مبروك عليكى ولادك يا بهموه السوق .. ربنا يحرسهم و يحميهم .. و منصورين اٍن شاء الله دايما يا أولاد الفقرا على ولاد الأغنيا و بأهدى لكم من قلبى الأغنيه دى :)

weladna Online recorder

مروه ..

2009-07-06T18:43:00.003+03:00

اللهم ابدلها دارا خيرا من دارهم واهلا خيرا من اهلها وادخلها الجنة واعذها من عذاب القبر ومن عذاب النار اللـهـم عاملها بما أنت أهله ولا تعاملها بما هى أهله ..

اللـهـم اجزها عن الاٍحسان إحسانا وعن الاٍساءة عفواً وغفراناً..

اللـهـم إن كانت محسنة فزد من حسناتها .. وإن كان مسيئة فتجاوز عن سيئاتها اللـهـم أدخلها الجنة من غير مناقشة حساب ولا سابقة عذاب .. اللـهـم اّنسها في وحدتها وفي وحشتها وفي غربتها .. اللـهـم أنزلها منزلاً مباركا وانت خير المنزلين .. اللـهـم أنزلها منازل الصديقين والشهداء والصالحين وحسن اولئك رفيقا .. اللـهـم اجعل قبرها روضة من رياض الجنة .. ولا تجعله حفرة من حفر النار .. اللـهـم أفسح لها في قبرها مد بصرها وأفرشه من فراش الجنة ..

اللـهـم اعذها من عذاب القبر .. وجاف ِالأرض عن جنبيها .. اللـهـم املأ قبرها بالرضا والنور والفسحة والسرور .. اللـهـم إنها فى ذمتك وحبل جوارك فقها فتنة القبر وعذاب النار وانت أهل الوفاء والحق فأغفر لها وأرحمها اٍنك أنت الغفور الرحيم ..

اللـهـم اٍنها أمتك وبنت عبدك خرجت من الدنيا و سعتها ومحبوبيها وأحبائها إلي ظلمة القبر وماهى لاقيه ..

اللـهـم اٍنها كانت تشهد أنك لا إله اٍلا أنت وأن محمداً عبدك ورسولك وانت أعلم بها ..

اللهم ثبتها عند السؤال .. اللهم اٍنا نتوسل بك اٍليك ونقسم بك عليك أن ترحمها ولا تعذبها .. اللـهـم انها نَزَلت بك وأنت خير منزول به واصبحت فقيره الي رحمتك وأنت غني عن عذابها .. اللـهـم اّتها برحمتك ورضاك وقها فتنة القبر وعذابه و أّتها برحمتك الأمن من عذابك حتي تبعثها إلي جنتك يا أرحم الراحمين ..

اللـهـم انقلها من مواطن الدود وضيق اللحود إلي جنات الخلود .. اللـهـم إحمها تحت الارض وأسترها يوم العرض ولا تخزها يوم يبعثون "يوم لا ينفع مال ولا بنون إالا من أتي الله بقلب سليم"

اللـهـم يمن كتابها ويسر حسابها وثقل بالحسنات ميزانها وثبت علي الصراط أقدامها واسكنها في اعلي الجنات بجوار حبيبك ومصطفاك صلي الله عليه وسلم اللـهـم اّمنها من فزع يوم القيامة ومن هول يوم القيامة وأجعل نفسها أّمنة مطمئنة ولقنها حجتها ..

اللـهـم اجعلها في بطن القبر مطمئنة وعند قيام الاشهاد أمنة وبجود رضوانك واثقة وإلي أعلي درجاتك سابقة .. اللـهـم اجعل عن يمينها نوراً حتي تبعثها اّمنًة مطمئنة في نور من نورك ..

اللـهـم انظر اليها نظرة رضا فإن من تنظر إليه نظرة رضا لا تعذبه ابداً اللـهـم أسكنها فسيح الجنان واغفر لها يارحمن وارحم يارحيم وتجاوز عما تعلم ياعليم ..

اللـهـم أعفو عنها فإنك القائل "ويعفو عن كثير"

اللـهـم اٍنها جاءت ببابك وأناخت بجنابك فَجْد عليها بعفوك وإكرامك وجد إحسانك ..

اللـهـم إن رحمتك وسعت كل شيء فأرحمها رحمة تطمئن بها نفسها وتقر به عينها ..

اللـهـم أحشرها مع المتقين إلي الرحمن وفداً ..

اللـهـم أحشرها مع أصحاب اليمين واجعل تحيتها سلام لك من أصحاب اليمين ..

اللـهـم بشرها بقولك "كلوا واشربوا هنئياً بما أسلفتم في الايام الخالية"

اللـهـم أجعلها من الذين سعدوا في الجنة خالدين فيها مادامت السموات والارض ..

اللـهـم لا نزكيها عليك ولكنا نحسبها اّمنه وعملت صالحاً فاجعل لها جنتين ذواتي أفنان بقولك: "ولمن خاف مقام ربه جنتان"

اللـهـم شفع فيها نبينا ومصطفاك واحشرها تحت لوائه وأسقها من يده الشريفة شربة هنيئة لاتظمأ بعدها ابداُُ ..

اللـهـم اجعلها في جنة الخلد التي وعد المتقون كانت جزاءا و مصيراُ لهم ما يشاءون وكان علي ربك وعداُ ومسئولاً ..

اللـهـم إنها صبرت علي البلاء فامنحها درجة الصابرين الذين يوفون اجورهم بغير حساب فإنك القائل " إنما يوفي الصابرون أجرهم بغير حساب "

اللـهـم اٍنها كانت مصلية لك فثبتها علي الصراط يوم تزل الاقدام ..

اللـهـم اٍنها كانت صائمة لك فأدخلها الجنة من باب الريان..

اللـهـم اٍنها كانت لكتابك تالية وسامع فشفع فيها القراّن وأرحمها من النيران واجعلها يارحمن ترتقي في الجنة إلي اّخر اّية قرأتها أو سمعتها وأخر حرف تلته ..

اللـهـم ارزقها بكل حرف في القراّن حلاوة .. وبكل كلمة كرامة وبكل اّية سعادة وبكل سورة سلامة وبكل جْزءٍ جَزاءا ..

اللـهـم أرحمها فاٍنها كانت مسلمة وأغفر لها فاٍنها كانت مؤمنة وأدخلها الجنة فاٍنها كانت بنبيك مصدقًة وسامحها فاٍنها كانت لكتابك مرتلة ..

اللـهـم أغفر لحينا وميتنا وشاهدنا وغائبنا وصغيرنا وكبيرنا وذَكّرنَا وأنثانا ..

اللـهـم من أحييته منا فأحيه علي الاٍسلام ومن توفيته منا فتوفه علي الايمان ..

اللـهـم لا تحرمنا أجرها ولا تفتنا بعدها ..

اللـهـم أرحمنا اٍٍذا أتانا اليقين وعرق منا الجبين و كثر الأنين والحنين ..

اللـهـم أرحمنا اٍذا يأس منا الطبيب وبكي علينا الحبيب وتخلي عنا القريب والغريب وارتفع النشيج والنحيب ..

اللـهـم أرحمنا اٍذا اشتدت الكربات وتوالت الحسرات واطبقت الروعات وفاضت العبرات وتكشفت العورات وتعطلت القوي والقدرات ..

اللـهـم أرحمنا اٍذا بلغت التراقي وقيل من راق وتأكدت فجيعة الفراق للأهل .. والفراق وقد حَمً القضاء فليس من واق ..

اللـهـم أرحمنا اٍذا حملنا علي الأعناق اٍلي ربك يومئذ المساق وداعا أبديا للدور و الأسواق والأقلام والأوراق الي من تذل له الجباه والاعناق ..

اللـهـم أرحمنا اٍذا وورينا التراب وغلقت القبور والأبواب وأنقض الأهل والأحباب فإذا الوحشة والوحدة وهول الحساب ..

اللـهـم أرحمنا اٍذا فارقنا النعيم وأنقطع النسيم وقيل ماغرك بربك الكريم ..

اللـهـم أرحمنا اٍذا أقمنا للسؤال وخاننا المقال ولم ينفع جاه ولامال ولا عيال وقد حال الحال وليس اٍلا فضل الكبير المتعال ..

اللـهـم أرحمنا اٍذا نَسي اٍسمنا ودَرس رسمنا وأحاط بنا قسمنا ووسعنا ..

اللـهـم أرحمنا اٍذا اَهملنا فلم يزرنا زائر ولم يذكرنا ذاكر ومالنا من قوة ولا ناصر فلا أمل اٍلا في القاهر القادر الغافر يامن اٍذا وعد وفي .. واذا توعد عفا .. وشفع يارب فينا حبيبنا المصطفي وأجعلنا ممن صفا ووفا وبالله إكتفي يا ارحم الراحمين ياحي يا قيوم يا بديع السموات والارض ياذا الجلال والاكرام ..

اللـهـم اٍنها أمتك و بنت عبدك و بنت أمتك ماتت و هى تشهد لك بالوحدانية و لرسولك بالشهادة فأغفر لها إنك انت الغفار ..

اللـهـم لا تحرمنا أجرها ولا تفتنا بعدها و اغفر لنا و لها و أجمعنا معها في جنات النعيم يا رب العالمين ..

اللـهـم أنزل علي أهلها الصبر والسلوان و أرضهم بقضائك .. اللـهـم ثبتهم علي القول الثابت في الحياة الدنيا وفي الاخرة ويوم يقوم الأشهاد ..

اللـهـم صلي وسلم وبارك علي سيدنا محمد وعلي اّله وصحبه وسلم إلي يوم الدين ..

الفاتحة ..

راحت عليكى يا حفيظه :))

2009-07-02T23:30:00.003+03:00

أييييييه .. دنيا !!

و الله وراحت عليكى يا عربيتى يا جيب يا رانجلر يا عشرة السنين ..

خلاص بقى بقيتى عجوزه زيى و مابقتيش حمل مشاويرى الصعبه اللى تهد الحيل ..
صحيح فى شبابك كنتى وحش جبار يا خاله رانجلر و كنت معجب بيكى و بقوتك الخرافيه اللى زى قوة الديناصور جنب بقية العربيات الورق الكورى و اليابانى اللى كانوا بيخافوا منك و يعملوا لك ألف حساب لما تعدى بس من جنبهم و تعملى كدهو :

بس خلاص بقى راحت عليكى يا تيزه و مبقتيش تستحملينى و لا طيقانى و بقيتى على طول بتشتكى مره من دبرياجك و مره من فراملك و مره لامؤاخذه من فتيسك لما يا ينبوع الرخامه بقيت أخاف أركبك لحسن تولعى بيا زى ما عملتيها فى مره و فين فى محطة بنزين أون ذا رن و لولا ستر ربنا كنتى عملتى مصيبه يا كلبه ..

طيب بلاش دى .. فاكره يا بت يا رانجلر لما طرمبتك قطعت بنزين و أنا فى المزرعه فى وسط الصحرا حيث لا قرطار و لا نافخ نار و لولا فضل الله و جدعنة البرنسيس شمس التهار كانت السباع الضاريه و الضباع الجوعانه طلعوا عليا و أكلونى و قرقشوا عضمى ..
و لا يا حلاوتك لما تكييفك عطل و فشل فى تصليحه عتاة بتوع التكييف .. و بقيت برضو بأركبك و أروح بيكى الصحراء كل يوم و أنا مش متكيف منك خالص و أنزل منك بأشر عرق و لا اللى فى الساونا .. بس أعمل أيه كنت مضطر لك يا من كنتى حبيبتى و أنتى بندالتك زى ما تكونى كنتى عارفه و عماله تتمادى فى رخامتك و كل يوم تطلعى لى بمصيبه شكل لما خليتى عيشتى مرار ..

و لا اٍبتلاء الردياتير بتاعك يا مجرمه أنتى اللى لففنى حوالين نفسى شهور طويله و خلانى أمشى بيكى و أنا شايل جركنين مياه كل واحد 20 لتر زى ما أكون طالع هجره للصحراء الكبرى لما بقيت مضحكة العيال و كل ندل فيهم بكلمه و اللى يقول لى : حج مبرور يا آبه .. و اللى يسألنى : أنت بتروح تبيع الميه دى فين يا أبويا ؟؟ .. و أضطرتينى أخيرا يا قاسيه أنى أبتدى أشحت عربية الواد أبنى الكبير ده بتاع الصاعقه اللى كل ما أشحت منه عربيته بسبب أعطالك يبكتنى على غلو البنزين زى ما أكون وزير البترول و يلمح لى من تحت لتحت علشان أفولها له !!

ما أنكرش يا طنط أنك شيلتينى سنين طويله أنا و عيالى و ليا معاكى ذكريات هى من أجمل ذكريات عمرى .. بس النصيب غلاب يا حفيظه و أبتدت عينيا تبص بره لما قعدتى لى زى أمنا الغوله تنكدى عليا طول الوقت و أنتى جنبك زمايلك الحلوين المقطقطين اللى يرجعوا شباب العواجيز اللى زيى .. لحد ما عينيا وقعت على السنيوره دى :

عربيه جيب شيروكى قلبى أغرم بيها من أول لقاء و ماسبتهاش اٍلا لما بقت على اٍسمى .. و سبحان العاطى الوهاب مسبب الأسباب الرازق بغير حساب ..
صحيح هى مش بنت بنوت بس اللى يشوفها و الله يفتكرها لسه على الزيرو و الحقيقه أنى لسه بأفهمها اٍكمنها كلها بالكومبيوتر و كده بس بعونك يا رب و بخبرتى الواسعه فى هذا المجال أبتديت أفهمها و ألينها اٍكمنى حنين و رومانسى مع العربيات ..
و أما أنتى أيتها الرانجلر العنيده الشرسه يا قوقه فخليكى كده عبره أديكى بتنفعى العيال برضو و لعلمك بقى كذب من قال : القديمه تحلى و لو كانت وحله !!
و يا كل من عنده عربيه قديمه قاعده فى أرابيزه تغلس عليه غلاسات أشكال و ألوان شد حيلك و أنوى خير و هاتلها عربيه ناعمه و عسوله زى البنوته دى :

تعوضك عن وجع قلب الميكانيكيه و تحرق بيها دم عربيتك القديمه :)

كل سنه و أنتى طيبه يا شموستنا ..

2009-06-27T19:05:00.004+03:00

كل سنه و أنت طيبه يا شموستنا ..

كل سنه و أنتى مدفيانا بحبك و طيبتك و رقتك و اٍخلاصك ..

كل سنه و أنتى راضيه بما قسم الله ..

و كل سنه و اٍحنا دايما حواليكى ..

Get this widget

Track details

eSnips Social DNA

الأغنيه دى يعنى كل سنه و أنتى طيبه يا برنسيس شمس النهار بس بالكورى (حاجه جديده علشانك يعنى )

الوليه الخايبه و دقية الباميه !!

2009-06-23T00:24:00.003+03:00

صباح الخير أعزائى المدونات و المدونين ..

بخصوص بوست حسن شحاته ..

لا أنكر أنى متغاظ أشد الغيظ من المعلم حسن شحاته و من كومبينة اللعيبه بتوعه اللى بيمثلوا مصر ..

الناس دى مش بتمثل مصر .. لأ .. دول بيمثلوا نفسهم ..

الناس دى أتصرف عليها دم قلبى و دم قلبكم علشان يرفعوا اٍسم مصر فى المحافل الدوليه .. فهل ده حصل ؟؟

لا محصلش .. لأن حتى التمثيل المشرف اللى كنا بنرضى بيه أفتقدوه و مابقوش بيمثلوا الوطن تمثيل مشرف ..

بلاش مش حنتكلم فى واقعة الفضيحه اللى عمرو أديب أتكلم عنها لأنها شىء خفى لا يعلمه اٍلا المولى علام الغيوب و ما كنا بشهداء عليهم و مش حنتهم حد بغير علم اليقين لأنه أمر لو تعلمون عظيم ..

لكن حنتكلم فقط عن عدم تمكن الفريق يقيادة المعلم على الحفاظ على مستوى الأداء و ده بيدل على أنه أصلا مافيش أساس سليم للموضوع ككل ..

مثلا ..

لو وليه طبخت دقية باميه باللحمه الضانى لجوزها و طلع تمام و عشره على عشره و الراجل أستمخ منه و كافئها على شطارتها مكافأه هايله تعمر الدماغ .. تقوم بعدها بكام يوم تعمل دقية باميه تانى بس يطلع وحش و جوزها برضو يكافئها حبا فيها .. و المره اللى بعدها تعمل دقية باميه تالته بس تطلع أيه بقى نص نص يعنى فيروح جوزها برضو مكافئها .. أمال أيه ما هو بيحبها .. تروح هى بقى مطمنه و ماتحاولش تجود فى صنعتها مادام هى كده كده جوزها بيكافئها سواء أجادت أم طلع منها طبيخ زى خلقتها .. و تركن على كده و خلاص ..

ده بيدل على أن أصلا هى ماعندهاش أساس سليم للطبيخ .. و أنها ست مهمله و طماعه و كسلانه و بتركن للسهل ..

عارف أن الكوره غالب و مغلوب .. الرياضه عامة غالب و مغلوب .. بس اللى بيحصل معانا ده لا يمت للرياضه بصله .. و لكن يمت للوليه أم دقية باميه .. و اللى أستسهلت و أطمنت مادام كده كده جوزها بيكافئها سواء أجادت أم أستهبلت ..

الملايين اللى أتصرفت على هذا المنتخب من جيبى و من جيبكم يعنى اٍحنا أولى بيها ..

أنا عن نفسى عاوز حقى نقدا و مش عاوز حد يمثلنى فى المباريات الدوليه بهذا الشكل خاصة أنى داخل على جوازة البت بنتى الوسطانيه و عريسها أساسا دمياطى يعنى فالرحمه حلوه برضو ..

عاوز حد يعوضنى عن ألم الواد أبنى الصغير الشيخ عبده لما حضن علم مصر و هو بيعيط بعد نهاية الماتش الأخير و اللى كان عنده أمل أنه حيلوح بيه من البلكونه لما المنتخب يكسب اٍن شاء الله فى المشمش علما بأنه أشتراه من مصروفه البسيط بعد ما حوش 15 جنيه من أول ما بدأت البطوله ..

الناس دول مش بيمثلوا الوطن و لكن بيمثلوا حسن شحاته الفتاكه ..

بخصوص بوست العالم السرى لأكل الشوارع ..

أتسألت فى التعليقات كتير اٍزاى عرفت كل هذه البيانات و الأرقام اللى أوردتها فى البوست ؟
الحقيقه أكتسبت خبره لا بأس بها من عملى أيام دراستى فى الجامعه بمطاعم الاٍسكندريه زى شى جابى و أستريا و سانتا لوتشيا و البلفدير و غيرهم .. و أطلعت بعينيا على ما كان يحصل فى مطابخهم :)

و لما أكرمنى المولى من فضله فتحت مطعم نظيف لطيف و كافيتريا برضو لطيفه ظريفه فى القاهره و بسببهم أحتكيت كثيرا بالعاملين بالعالم السرى لأكل الشوارع فأزددت بفضل الله خبره على خبره ..

كمان كتير من التعليقات سألتنى عن رأيى فى الكشرى و مدى سلامة الأطعمه اللى بتقدم فى المطاعم الكبيره الشهيره ذات الأسماء الرنانه ..

رأيى الشخصى أنه لا يمكن أبدا بأى حال من الأحوال ضمان نظافة العاملين فى المطابخ لأننا مش بندخل جوه ضميرهم .. تضمن منين بجد و ده كنت بأشوفه بعينى اٍن اللى مجهز لك الأكل اللذيذ ده مش هارش هنا و لا هنا و ماغسلش أيده بعدها ؟؟

تضمن منين نظافة الأوانى المستعمله فى الطبيخ ؟؟ هل شفتهم بنفسك و هم بيغسلوها ؟؟ أبدا ..

طيب أيه اللى يمنع اٍنتشار الأمراض و تفشيها بعد كده ؟؟ و لا حاجه ..

بنقول اٍحنا شعب معدته حديد و نهضم الزلط و عندنا مناعه .. الكلام ده مش صحيح .. و لو كان صحيح ما كان المصريين تفشى بينهم الاٍلتهاب الكبدى بأنواعه .. و السرطان بأنواعه .. و الفشل الكلوى و الحصوات بأنواعها .. و أمراض القولون و القرح المعويه و بلاوى زرقا لا آخر لها ..

الكشرى لما بيبات منه شويه فى المحل معدومى الذمه مش بيرموه طبعا لكن بيخلطوه بالكشرى الطازه اللى بيكون لسه نازل من على النار سخن و ده ضرر ما بعده ضرر .. لأن البايت بيدفا بفعل درجة حرارة الطازه و بيفسد و خاصة المكرونه و بيعمل نوع من السموم الضاره للغايه بس ناسى اٍسمها و أكيد الدكتوره ستيته حتفيدنا فى هذه النقطه ..

أقسم برب العزه أنى شفت بعينى برص محترم وقع من سقف مطعم كشرى شهير للغايه فى الحله اللى بيغلوا فيها الصلصه و أنا قاعد بآكل فما كان من الوله اللى واقف على النصبه اٍلا أنه بحث عنه بالكبشه و طلعه و رماه فى الخباثه و لا من شاف و لا من درى و أستئنف عمله عادى جدا !!

أيه ضمنكم أنه مش بتحصل حاجات كده فى المطاعم الأخرى ؟؟

خلونا فى أكل البيت أحسن صدقونى .. حتى لو كانت اللى عاملاه الوليه الخايبه بتاعة دقية الباميه اللى تستاهل اللى كان بيعمله عدى صدام حسين فى المنتخب الوطنى العراقى لما كان بيتهزم و يلاقوا البوكس بابه فى بق الطياره اللى راجعه بيهم من بره و على المعتقل عدل حيث يلاقوا العذاب أصناف و أشكال لأنهم لم يمثلوا وطنهم تمثيل مشرف ..

و تقبلوا كل التحيه و الاٍحترام ..

العالم السرى لأكل الشوارع + تحديث ..

2009-06-20T21:40:00.002+03:00

تحديث : الخبر ده يتصل اٍتصال مباشر بموضوع البوست و تم نشره بعد نشر البوست ده بيوم و عجبنى لأنه بيؤيد المعلومات اللى وردت فى البوست ..

عمتم صباحا بنى البلوجر ..

عربيات الكبده و السجق المنتشره فى شوارع مصر طولا و عرضا و بنجد عليها اٍقبال شديد من الزبائن و اللى أحيانا بتنافس عربات الفول فى شدة الاٍزدحام عليها بتعتبر هى البديل المنطقى لأكل اللحم اللى الكيلو منه تعدى الأربعين جنيه بل و الستين جنيه فى بعض المناطق مما يجعله صعب المنال للكثيرين ..

طيب هذا البديل رخيص الثمن اللى بيجذب الماره بروائحه المثيره للشهيه مش جدير بالبحث عن أصله و مكوناته و محاولة اٍيجاد سبب معقول لرخص ثمنه ؟؟

بادىء ذى بدء و قاعده أساسيه فأن جميع أصناف الكبده و اللحوم الداخله فى الصناعات الغذائيه زى السجق و الهامبورجر و ما شابه كلها بغير اٍستثناء مستورده من الخارج .. يعنى ما تصدقوش أبدا أنه فيه كبده أو لحمه بلدى تدخل فى هذه الصناعات ..

فيه 3 أنواع رئيسيه من الكبده المستورده الأمريكى و الأرجنتينى و البرازيلى .. و المفترض طبعا أنه بيتم الكشف على شحنات الكبده فى الموانىء كشف دقيق للسماح بمرورها للبلاد بعد التأكد من صلاحيتها ..

أرخص أنواع الكبده هى الكبده البرازيلى و سعر كيلو الجمله منها يتراوح بين 6 جنيه و 7 جنيه على حسب السوق و قد يصل وزن الكرتونه ل 30 كيلو ..

المشكله مش فى تقارير اللجان الصحيه اللى بموجبها بيتم الاٍفراج عنها فى الموانىء لأننا سنفترض بالطبع أنها سليمه و دقيقه و لا يدخل فيها لعب .. لأ .. المشكله فى طريقة تخزينها فى التلاجات الكبيره اللى غالبا مش بتراعى الأسس السليمه للحفاظ عليها مجمده لأن غالبا أصحاب التلاجات دى بيشغلوها نصف يوم فقط و بيطفئوها النصف التانى توفيرا للكهرباء .. و ده بيدى فرصه للكبده المجمده أن يفك تتليجها شويه و بعدين ترجع تتجمد تانى و هكذا و ده من أشد الخطر على صلاحيتها ..

تشتهر قليوب بالذات بوجود تلاجات التخزين التابعه لأباطرة اللحوم المجمده ..

و نأخذ فى الاٍعتبار أن الكبده اللى أصلا سهلة التسييح بتنتقل من ثلاجات السفن الشاحنه لثلاجات المبردات الناقله لثلاجات التخزين لسيارات نقل غالبا غير مبرده لثلاجات تاجر الجمله لسيارات نقل تانيه برضو غالبا غير مبرده لتجار القطاعى اللى بيشترى منهم فى النهايه أصحاب عربيات ساندوتشات الكبده اللذيذه ..

صناعة الساندوتش بقى نفسه فيه صنعه و حرفه عاليه أوى أوى ..

فاٍما أن ترفع عربية الكبده صاحبها و تخللى الجنيه يجرى فى اٍيده يا اٍما تفلسه و تخليه يبيع عفش بيته و هدوم مراته .. اٍزاى ؟؟!!

صلوا على حضرة سيدنا رسول الله ..

لا يجوز بأى حال من الأحوال أن يحتوى الرغيف الفينو الصغير على أكثر من 100 جرام حشو .. الحشو ده بيبقى عباره عن 40 جرام كبده و 60 جرام خضار ..

الخضار اللى هو بصل و ثوم و فلفل حراق و الكل متتبل تتبيله جهنميه أول ما بتترمى فى الزيت بتفوح منها زيوت عطريه تجوع اللى

لسه واكل خروف و تخليه ينجذب كالمنوم مغناطيسيا لعربية الكبده علشان يضرب رغيفين على الماشى كده ..

بنلاحظ أن فيه نوعين من قطعية الكبده .. قطعية الكبده العصافيرى و بتبقى صغيره جدا كأنها مفرومه .. و قطعية الكبده الاٍسكندرانى و بتبقى أكبر شويه و لكل نوع عربيه مشهوره بيه و صنعه تكاد تتقارب ..

لو اٍفترضنا أن أرخص رغيف كبده دلوقتى ب 2 جنيه فلزمن و حتما يكون صافى مكسب صاحب العربيه جنيه صافى كامل بالتمام و الكمال بعد خصم كل المصاريف يعنى لو باع 100 رغيف يوميا كحد أدنى يبقى صافى مكسبه 100 جنيه يوميا من غير ضرايب و لا حجوزات .. و ده فى أيده هو أو فى اٍيد الوله اللى جايبه يشتغل على العربيه ..

أكيد لا يوجد ضمان لصحة اٍجراءات الحفاظ على سلامة الكبده بعد كل هذه الخطوات لنقلها من تلاجه لتلاجه .. و لا أصلا يوجد ضمان لعدم تسرب أنواع أخرى من الكبده للمستهلك زى مثلا كبدة الخنازير و الحمير و الكلاب و بالفعل تم ظبط العديد من مثل هذه الجرائم .. نضيف على كده عدم ضمان سلامة عامل تقطيع الكبده و هى صنعه قائمه بذاتها و لا سلامة دمه اللى بيختلط بالكبده اللى بيقطعها لما بيجرح صوابعه أثناء قيامه بعمله .. و لا سلامة القائم على البيع و لا أنه مش هارش فى حته كده و لا كده قبل ما يمسك الرغيف الفينو و يفتحه .. و لا سلامة الطرشى اللى بيتباع على العربيات نفسها .. يعنى من الآخر كده ما تقدرش تضمن سلامة الساندوتش الرهيب العجيب اللى فى اٍيدك ده رغم الجهود الجباره اللى بتبذلها الأجهزه الحكوميه المختلفه لظبط المخالفين ..

السجق بقى موضوع تانى :)

الأمعاء الدقيقه المستورده بتمر هى كمان بنفس مراحل التنقل من مكان لمكان زى بنت عمها الكبده .. و بيصطلح على تسميتها بالرانك .. و الكيلو فى الجمله بيوصل لحوالى 2 جنيه فقط لا غير ..

فيه نوعين من السجق .. نوع رخيص أوى بيصل سعر كيلو الجمله فيه ل 5 جنيه و نوع راقى مفتخر بيوصل الكيلو فيه ل 7 جنيه .. خدوا بالكم أنا بأتكلم عن السجق بتاع العربيات مش اللى عند الجزار ..

النوع الرخيص بيتم حشوه بخليط من هياكل الفراخ و البرغل و البصل و الثوم المطحونين على الناعم ..

هياكل الفراخ لمن لا يعلم هى ما يتبقى من صدر الفرخه بعد تشفيتها لأخذ الفيليه منها .. فبيتبقى منه القفص الصدرى و الجلد اللى عليه و الرأس سليم و نصف المقار و غالبا الرأس بيكون بالريش .. و بيتم فرمهم فى مفارم عملاقه جباره بتخللى العظم زى العجين فمايبانش أبدا فى السجق اٍلا لحريفة أكل الشوارع .. و نسبة الخلط لكل كيلو هياكل مفرومه كيلو برغل و نص كيلو بصل و 100 جرام توم طبعا بيتفرموا بقشرهم ..

بتتم طبعا اٍضافة ملح و توابل و مواد حافظه و مواد ملونه و كبريت و حاجه اٍسمها اللعلى بتضيف لون أحمر جميل على السجق و كمان بتدارى طعم هياكل الفراخ الزفره ( باردون للفظ ) .. الخلطه المريعه دى بتبقى بنسبة 150 جرام لكل كيلو ..

و بنعرف النوع ده من أنه بيبقى طرى و لما بيتحط على النار مش بيكش أوى ..

النوع التانى اللى هو الراقى بتستبدل فيه هياكل الفراخ المفرومه و البرغل بدهن بقرى خالص مفروم على الناعم و نسبه بسيطه من اللحم المستورد من منطقة البطن المخصص للفرم و اللى اٍسمه بين أهل الصنعه الفريسكا و بيبقى بنسبة 2 : 1 .. و بيضاف له نفس التوابل المخصصه للسجق و كذلك المواد الحافظه و الملونه غير طبعا الثوم و البصل أحيانا بنسبة نص كيلو لكل كيلو لحم ..
بيتم حشو الأمعاء الدقيقه بواسطة ماكينه تشبه المدفع و اٍسمها كده فعلا بيشتغل عليها عامل متخصص و حريف علشان الأمعاء ما تتمزقش و فى نفس الوقت ماتبقاش فاضيه و جواها هوا بيسبب اٍنفجارها و هى على النار ..

أهم خطوه لحفظ السجق هو تشميعه فى الهواء بعد حشوه لتصفية المياه و الدماء اللى فيه .. و الست العاقله الراسيه ما تشتريش سجق من جزار أو من محل لسه حديث الحشو لأن السوائل اللى فيه بتوزن طبعا ..

و اللى يضمن سلامة كل هذه الخطوات حتى يصل صباع السجق لفم المستهلك يبقى جدع :)

و فيه مثل فرنسى بيقول : كل السجق بشهيه بس ما تسألش معمول اٍزاى ..

السجق ده غير السجق الاٍسكندرانى اللى بيبقى محشو فى الأمعاء الغليظه و بيبقى فيه طعم اليانسون باين شويه و هو أصلا اٍيطالى ..

نيجى بقى للحواوشى ..

فاكرين فيلم خللى الدماغ صاحى ؟؟

اللى كان فيه سامى العدل بيلعب دور عفريت نزل على الأرض و عشق الحواوشى و حاول يعرف سر صنعته لكنه فشل رغم كونه عفريت اٍبن عفاريت ..

و الحقيقه أنه مهما ست البيت حاولت بشتى الطرق توصل لطعم حواوشى الشارع لا يمكن أبدا تنجح فى ده لكن حتطلع حواوشى بيتى نضيف طعمه قريب من الكفته لكن لا يمكن يبقى طعمه زى مثلا حواوشى شلبى بتاع سوق التوفيقيه .. و يقال بين محترفى أكل الشوارع اٍن السبب بيرجع لسيدى الحلى اللى دعا ربنا أنه يخللى أكل الشارع أحلى و ألذ من أكل البيوت !! مقام سيدى الحلى فى نهاية عطفة الشيخ عبد الله فى باب الشعريه ..

لييييييه ؟؟

صلوا على حضرة رسول الله ..

بادىء ذى بدء لازم يكون العيش البلدى اللى بيتم حشوه مخبوز نص خبيز يعنى مش مستوى .. و بيتساب لما يبرد تماما من غير ما يعرق لأنه لو عرق يبقى فسد طعم الحواوشى ..

حواوشى الشارع برضو نوعين ..

نوع رخيص بيبقى عباره عن هياكل فراخ مفرومه و برغل و ليه ضانى أو دهن بقرى خالص حتلاقوه بيمسك فى سقف الحنك بعد الأكل و بصل و فلفل أخضر حراق و خلطة توابل شيطانيه سيأتى ذكرها ..

النوع الراقى منه بيبقى عباره عن بوش و لحمه مفرومه مستورده و باقى مكونات النوع الأول ..

البوش هو ما يتبقى من تنظيف اللحوم عند الجزارين .. يعنى الدهون و الشغت و الجلد و الختم و كده يعنى .. و بيبقى كندوز يعنى بقرى على بتلو على ضانى .. و الكيلو منه فى الجمله ب 7 جنيه .. و يوجد متعهدين لجمعه من محلات الجزاره للمتاجره فيه و أشهر متعهده فى القاهره هى الحاجه نورا عاشور اللى مسكت تجارة المرحوم زوجها فتحى الطحش و قد ترملت و هى فى عز شبابها و بتفوح منها رائحة المسك و العنبر تقريبا فى الأسبوع التانى من كل شهر و عندها تلاجات عملاقه مهوله فى سوق العتبه و المدبح القديم ..

الصنعه الصح للحواوشى لو عاوزين تجربوه فى البيت هى كالآتى :

- كيلو لحمه كندوز ملبسه ..

- نص كيلو ليه ضانى أو بوش ..

- كيلو بصل و يفضل الصغير علشان مايبقاش فيه ميه كتير ..

- نص كيلو فلفل أخضر حراق و يمكن الاٍستغناء عنه أو عن بعضه أو تضاف الشطه ..

- 100 جرام ثوم ..

- 50 جرام كبابه صينى مطحونه و يفضل سليمه و تطحن فى البيت و هى حبات بنية اللون صغيره نوعا و السر كله فى هذه الكبابه الصينى ..

- معلقه كبيره جنزبيل مطحون .. و ممكن معاهم حتة جذور جنسنج كورى للمتزوجين حديثا ..

- - معلقه كبيره قرفه مطحونه ..

- رشة زر ورد ..

- معلقه و نص كبيره بهارات ..

- 3 حبات جوزة الطيب مفرومين ..

- ملح و فلفل أسود على حسب الطلب .. و لا يضاف كمون أبدا ..

الاٍسكندرانيه بيضيفوا على الخلطه دى حزمة بقدونس و هذا للعلم ..

بتتفرم كل هذه المكونات مرتين أو تلاته و بيتحشى بيها العيش و بيلف فى ورق سيلفر طبعا يعنى بلاش ورق الجرائد و لا الورق الأبيض اللى أصلا مصنع من القمامه و على الفرن متوسط الحراره مش هادى علشان ما ينشفش أو بلغة أهل الصنعه ما يتسليش ..

ملحوظات :

- بيكثر وجود الدود الأبيض صغير الحجم فى الشاورما عند الكثير من المحلات بسبب سوء التخزين من يوم ليوم و بسبب وجود طبقات الليه فى العمود ..

- محلات الكبده و المخ المقليه بالرده بتستعمل كبده مستورده مش بلدى .. و المخ غالبا بيكون نخاع جملى مش مخ خالص أبدا ..

- جميع محلات الكباب و الكفته بغير اٍستثناء حتى المحلات الشهيره منهم بيتعاملوا مع الحاجه نورا و بيدخلوا البوش فى صناعة الكفته .. و للعلم بيتسمى فى السوق زبالة الجزار ..

- الأرز بيدخل كمكون أساسى فى صناعة الفول و الطعميه حيث بيضاف للفول أثناء تدميسه و قبل ما يستوى بشويه علشان يدى له تخانه بعد اٍضافة مواد كاويه مستورده من ألمانيا لسرعة تدميس الفول و يبقى زى اللوز .. و أغلب المطاعم بيسلقوا أرز التموين اللى بيشتروه بثمن بخس من الفقراء و بيضيفوه على خلطة الطعميه علشان تكتر ..

- أدينى عملت اللى وعدتك بيه ياض يا سامح يا ملك الكبده ياللى عربيتك فى مجمع الأردنيه بالحى السابع بمحافظة 6 أكتوبر أمام جنة الفواكه تحت البواكى بجوار البحصلى .. بقى ياض أقولك زود الطحينه تقولى هو كده يا حاج !!!

طييييييييب ..

و تقبلوا خالص تحياتى ..

المجد للقوارير ..

2009-06-17T00:02:00.001+03:00

أسعد الله صباحكم بالمسرات أعزائى المدونات و المدونين ..
من شهور طويله و نحن ملاك الأراضى الصحراويه المستصلحه بمنطقة وادى الملوك بالكيلو 52 طريق القاهره الاٍسكندريه الصحراوى ننتظر بلهفه لجنة الخبراء المشكله من خبراء وزارة العدل و خبراء هيئة اٍستصلاح الأراضى لفحص موقفنا القانونى من الأراضى الصحراويه اللى بحوزتنا و اللى قمنا باٍستصلاحها و زراعتها و طفحنا الكوته من كيعاننا لحد ما أزهرت و أثمرت و صارت خضراء بهجة للناظرين ..

و بالأمس فقط وصلت اللجنه الموقره لمنطقتنا الصحراويه المستصلحه فى موكب مهيب يتبعه عشرات السيارات لأصحاب الأراضى الراغبين من اللجنه التوجه لأراضيهم لفحصها ..

أعضاء اللجنه قاموا بالتنبيه على الملاك اللى بيتبعوهم بأن أول أرض سيتم فحصها هى أرضى و حددوها بالرقم و بالاٍسم لا لشىء سوى لكونها أول قطعه فى حيازة بئر 120 و بأن على الجميع أن يتوجه كل واحد لأرضه و البقاء فيها لحين وصول اللجنه لحد عنده ..
لكن ماحدش اٍستجاب لهم و فضلوا برضو وراهم مش عارف ليه ..

أنا و العيال كنا فى الأرض فى الوقت ده بنلم البصل و بنعاكس الدبابير أم 4 جنحات رغم حرارة الشمس اللى بدأت فى الاٍلتهاب و اٍذا فجأة يتبدل المشهد .. و تقف سيارات أعضاء اللجنه قدام الأرض ملكى ( و الملك لمالك الملك لا شريك له وحده ) و تتبعهم سيارات الحرس المرافقين و أيضا سيارات ملاك الأراضى الآخرين .. و ينقلب المكان بعد هدوءه لما يشبه ساحة قتال لم أشهد لها مثيلا اٍلا فى طوابير فراخ الجمعيه فى منتصف السعينيات !!

كل الملاك يقاتلون ليفوزوا من أعضاء اللجنه بكلمه أو اٍشاره تطمئنهم على مصير أراضيهم .. و أعضاء اللجنه يطالبونهم بالهدوء و بالتوجه لأراضيهم فى اٍنتظار اللجنه اللى حتمر عليهم تباعا بغير أى اٍستجابه من الملاك .. و حالة فوضى عارمه لا أتصور أنها تليق اٍلا بأحفاد التتار والفراعنه !! بل اٍن بعضهم للأسف الشديد اٍقتحم أرضى بالسيارات الجيب الثقيله أم نمر جمرك السويس ليسبق باقى السيارات للوصول لأعضاء اللجنه مما تسبب فى تلف عدد من شجرات البرتقال اللى تعبت أوى فى رعايتها لحد ما أزهرت و ربنا يستر و ماتكونش حصلت تلفيات فى مواسير مياه الرى المدفونه تحت الرمال بسبب ثقل السيارات ..

بجد المشهد كان مضحكا و مؤلما فى نفس الوقت ..

و فجأه تهبط من سيارة خبراء وزارة العدل سيده فاضله فى منتصف الأربعينيات .. سيده وقوره و محتشمه أثار ظهورها حاله من الاٍنضباط و يتبعها عدد من الرجال و النساء ممسكين بدفاتر هم أعضاء اللجنه ..

هذه السيده الفاضله كما قيل لى هى رئيسة اللجنه المرسله من قبل وزارة العدل .. و يشهد لها الجميع بالكفاءه و النزاهه و بقوة الشخصيه و أنها لا تخشى فى الحق لا لومة لائم و لا نفوذ و لا سطوة كبير و هى على درجة مستشار ..

سألت عن صاحب هذه الأرض .. فتقدمت و وصلت لها بصعوبه بالغه ..

تفحصتنى من خلف نظاراتها و أمرت واحدا من مساعديها بفتح المحضر الرسمى ..

سألتنى عن ظروف تملكى للأرض و نوعية الزراعات بها و عمرها و حاجات من هذا القبيل .. فجاوبتها بكل أمانه ..

لم تكتفى السيده المستشاره بأخذ أقوالى لكن نزلت بنفسها و تمشت وسط الزراعات و تفحصت عن قرب أشجار البرتقال و البصل لتحديد عمر الزراعات و تحديد ما اٍذا كانت فعلا زراعات حقيقيه أم ديكور غرس حديثا فى الأرض بغرض تزويق الصوره كما حدث فى الجيزه مؤخرا ..

و يعدين سألتنى عن المبنى المخصص للتسمين الحيوانى و مساحته بالتحديد .. فجاوبتها بالتقريب ..

لكن يبدو أنها لم تطمئن تماما لأقوالى فطلبت من مساعديها قياس المبنى بكل دقه .. و سجلت الرقم الصحيح للمساحه ..

أشهد أن السيده المستشاره الفاضله لم تعبأ بشمس الصحراء الحارقه و هى تمارس عملها و لا بهواء الجنوب الملتهب بحرارة رمال الصحراء اللى كان بيلفح الوجوه و كانت تصر على التأكد بنفسها من كل كبيره و صغيره .. علما بأن هذه اللجنه ستقوم بفحص ألوف الأفدنه فى المنطقه يعنى مساحات أراضى شاسعه تبلغ فى مجملها مساحة بعض الدول الشقيقه فمن أين تستمد هذا الجلد و من أين تنبع هذه القوه الداخليه اللى بتعينها على أداء عملها بكل أمانه و نزاهه ؟؟؟!!!

سؤال سألته لنفسى و أنا أتأمل سيادة المستشاره اللى رفضت بحده أخذ زجاجة مياه مثلجه و علبة عصير قدمها لها واحد من الملاك و العرق الغزير ينصب من جبهتها و قد أقفلت المحضر الرسمى معى بتوقيعى على أقوالى و على ما أثبتته فى المحضر .. يعنى خلاص المحضر الرسمى أتعمل و توقع عليه منها و من أعضاء اللجنه و منى فمدحى أو ذمى أو اٍبداء اٍعجابى بشخصيتها القويه لن يقدم أو يؤخر فى الأمر شيئا ..

تحيه كبيره أوى أوى لكل سيده تحمل الأمانه فى عنقها و تحافظ عليها و تؤديها بما يرضى الله و الضمائر سواء كانت ربة بيت أم عامله أو طالبه ..

أحلى صباح على عيون كل أم فيكى يا مصر تعرف تربى عيالها تربيه صح و تنشئهم تنشئه صح و تبث فى نفوسهم روح المثابره و حب الاٍجتهاد و الأمانه و الصبر على الشدائد ليكونوا فى الحياه بمثابة قناديل مضيئه ينوروا الطريق لأجيال تيجى من بعدهم و يتحملوا المسئوليه زيهم بشرف و نزاهه ..

الرفق و المجد للقوارير ..

و زلطه كبيره أوى على دماغ كل أم ماعرفتش تربى عيالها و تعلمهم أنه لا يصح اٍقتحام أراضى الغير بالسيارات الجيب أم نمر جمرك السويس و تدمير ما فيها من أشجار ..

و تقبلوا خالص حبى و تقديرى ..

ملحوظات من زمن العذاب !!

2009-06-15T07:52:00.005+03:00

مراهقة الصبيان و اللحظات الحرجة ..

بوست جديد على بعبعه بلوجاريه ( مدونه للكبار فقط ) ..

شوشو جنبهم غلبان !!

2009-06-12T16:30:00.001+03:00

ده المقصود بيه الشيطان يعنى

طيب و بعدين يعنى ؟؟
يعنى أعمل أنا أيه دلوقتى ؟؟
دماغى عماله بتلف و عقلى عايم فى البالوظه من ساعة ما قريت هذا الخبر النحس الذى تقشعر منه أبدان الحلاليف مش بس البنى آدمين ..
ما هو أصل بصراحه خبطتين فى الراس توجع و تدوخ و تطلع من النافوخ نجوم و علامات اٍستفهام و حاجات كده من اللى بتطلع من دماغ توم لما جيرى يهبده بالنشابه على دماغه فى أفلام الكارتون !!
و أنا بصراحه أخدت هبده على دماغى من أسبوعين كده لما الصحف طالعتنا بخبر القبض على الطبيب الشهير اللى كان بيصور مريضاته أثناء الكشف عليهن و هن عرايا بكاميرا خفيه مثبته فوق سرير الكشف بعيادته ثم لا يلبث الوغد أن يهددهن بنشر هذه الكليبات و اٍلا يخضعن لرغباته الدنيئه و يوافقن على ممارسة الفعل الحرام معه .. و حتى بعد موافقة بعضهن كان يقوم بتصوير هذا اللقاء الشيطانى بينهم و يطبعه على سيديهات ليوزعها على أصدقائه للتباهى برجولته المزعومه بعد ما زوجته أشاعت بين أصدقائه أنه – لا مؤاخذه ما بيعرفش - محاولا نفى هذه التهمه عن نفسه الحقيره ..
أنا بصراحه أترعبت بعد ما قريت هذا الخبر .. و أتخذت خطوه اٍيجابيه بأنى بطلت أروح لدكتورة الأسنان بتاعتى اللى كانت بتنضف لى أسنانى لتبدو براقه و جذابه تسر الناظرين و تلهب العواطف و تحطم القلوب ..
طبعا .. ما يمكن كانت بتصورنى من غير ما أشعر و يمكن يكون بق الرجل عوره فى هذا الزمن الشقلباظى المسخره و يمكن ترجع تهددنى بنشر كليبات ليا على الأنترنت و أنا بأنضف أسنانى و تبقى فضيحه فى بلدنا أبو كبير - شرقيه ( على فكره ده اٍسم بلد مش صفه يعنى ) ..
الخبطه التانيه بقى غلبت الأولانيه .. من كام يوم كده طالعتنا الصحف بخبر القبض على مدرس ثانوى عوقب من قبل بسبب سوء سلوكه و تم نقله من مدرسة البنات اللى كان بيشتغل فيها بسبب تحرشه بتلميذاته لمدرسة صبيان قام بتصوير ممارسات غير أخلاقيه مع 18 تلميذه من تلميذاته بالمرحله الثانويه كان بيديهم دروس خصوصيه و برضائهن كما يظهر ذلك جليا من بعض الكليبات التى شوهدت بعد تداولها على الموبايلات فى مدينة القاهره الكبرى و ما حولها !!
و أن هذه الممارسات الدنيئه كانت بتتم داخل منزله حيث اٍعتادت بعضهن الذهاب لبيته لأخذ الدروس على الرغم من كونه أعزب و بعلم أولياء أمورهن اللى يستحقوا الاٍعدام رميا بالجزم القديمه لموافقتهم على ذهاب بناتهم لبيت مدرس أعزب كما هو معروف عنه متعللين بحسن سمعته ( يا أخى النهه ) .. و البعض الآخر كان بيتم داخل منازل التلميذات أنفسهن و بحضور أولياء أمورهن فى غفله منهم و هم قاعدين فى الأوضه اللى جنبهم بعد ما دخلوا له طبعا كوباية الشاى و طبق البتى فور !!!!!!!!
الغريب أن المدرس السافل كما جاء فى الصحف كان بينقل هذه الكليبات الفاضحه على سيديهات و يروجها برضو بين أبناء حى اٍمبابه كما لو كان حريصا على فضح نفسه حتى توصلت الشرطه لشخصيته بعد جهد جهيد و ألقت القبض عليه و قدمته للنيابه العامه اللى أقر قدامها بفعلته الشنيعه ..
لا يفوتنا هنا أن نحيى رجال النيابه العامه اللى قرروا عدم اٍستدعاء الطالبات المتصورات فى الكليبات اٍلا بعد الاٍنتهاء من أداء اٍمتحانات الثانويه العامه اللى بقت على الأبواب حفاظا على مستقبلهن !!!
يعنى أيه اللى بيحصل ده ؟؟
طبيب و مدرس و الأتنين المفترض فيهم أنهم يكونوا على درجه عاليه من الأمانه الصادقه حيث كون الأول مستأمن على الحياه و الصحه و العرض .. و التانى مستأمن على بناتنا و أولادنا فى هذا السن الخطر و ده برضو لا يعفى أولياء أمورهم من معاقبتهم هم كمان على اٍهمالهم و تغفيلهم و سوء تقديرهم للأمور ..
يعنى خبطتين ورا بعض كده صحيح حاجه تدوخ و تلخبط و مش عارف أعمل أيه ؟؟ مش عارف ألوم مين و لا مين و لا مين بمعنى أصح ؟؟
خصيمكم سيدنا النبى تعالوا ندور على حد نرمى عليه اللوم و نبهدله و نعلق عليه سلسلة أخطائنا اللى لا تنتهى بس بلاش الكابتن حسن شحاته لحسن ده اللى فيه مكفيه يا ولداه :)
أنا عن نفسى حأبتدى بالدعاء بالخراب المستعجل على مستر نوكيا شخصيا اللى عمل موبايلات بكاميرات فيديو شديدة الحساسيه و الخطوره بتسجل أحلى اللحظات ..
يالا مين تانى ؟؟

اٍحذروا من مدونة شمس النهار :))

2009-06-08T00:40:00.007+03:00

دلوقتى يا جماعه مدونة البرنسيس شمس النهار أتملت ورد من كل صنف و لون .. و الشيخ زكريا أحمد قال زمان شوف الزهور يا بنى آدم و أتعلم بين الحبايب تعرف تتكلم :)

كويس .. بس كده مدونة البرنسيس حتتملى بالنحل و النحل طبعا بيعمل العسل .. و عماد بعرور بيقول : أكل العسل حلو بس النحل بيقرصنى :))

الوله بعرور ده بيفهم و الله :)

تحديث : بوست كليب .. حدث بالفعل !!

2009-06-07T08:40:00.000+03:00

تحديث : الموضوع حصل فعلا و بنفس التفاصيل اللى ذكرتها فى البوست فى شهر ديسمبر اللى فات .. و رغم الجهود الكبيره لرجال الشرطه للعثور على الجناه اٍلا أنهم لايزالوا طلقاء و بعيدين عن يد العداله .. و لا حول و لا قوة اٍلا بالله ..

المشهد الأول :
نهار خارجى .. الكاميرا تركز على بلكونة شقه مغلقه فى الدور التانى فى عماره من عمارات شقق العرايس باٍحدى المدن الجديدة .. زووم آوت لتظهر العماره كلها و يبدو اٍن أغلب شققها غير مسكونه .. حتى يظهر الرصيف المقابل لمدخل العماره ثم الشارع الذى يبدو هادئا قليل الحركه ..
تظهر من اليمين و الشمال فى وقت واحد سيارتان تتوقفان أمام بعضهما و تكاد المقدمات أن تصطدم ببعض ..
تنفتح أبواب السيارات فى وقت واحد و ينزل منهما عدد من الرجال مفتولى العضلات و أيضا من كل سياره رجل و أمرأه كبار فى السن يبدو عليهم الوقار و الشعر الأبيض نعرف فيما بعد أنهم والد و والدة العريس و والد و والدة العروسه ..
بمجرد نزول الجميع يلتف الرجال مفتولى العضلات حولهم و كأنهم يقومون بحماية كل طرف من الطرف الآخر بينما تركز الكاميرا فى كادر متوسط على الاٍشتباك اللفظى الذى بدأ بين أهل العروسين و نفهم من المشاجرة التى بدأ بعض الماره فى الشارع متابعتها و كذلك بعض الجيران الذين أطلوا من الشرفات أن كل أسره تعاير الأخرى بأنهم أسره عره و دون و لا يساووا بصله .. و أيضا تقوم كل أسره بحمد الله أن الجوازه الشؤم لن تتم و أن أبننا عندنا و بنتكم عندكم و كل طرف يحمل العفش الخاص به و تنفض الشركه ..
فى هذه اللحظه تتابع الكاميرا سيارتين نقل تأتيان من جهتين مختلفتين و تتوقف كل واحده خلف سيارة عائله و ينزل منهم بعض الرجال يبدو عليهم أنهم شيالين ..
يحاول بعض العقلاء من الجيران و الماره التدخل لفض الاٍشتباك بين الأسرتين و لكن كل الأطراف ترفض الحوار و يصر الجميع على اٍنهاء الزواج و أن تحمل كل أسره ما يخصها من منقولات و عفش و يتبادل الكل الكلام المقذع مع التركيز على معايرة أم العريس لأهل العروسه بسوء سمعة اٍبنتهم الذى أتضح لهم مؤخرا ..
يتوجه أهل العروسين و معهم الشيالين لداخل العمارة بينما يقف الرجال مفتولى العضلات أمام المدخل ..
تبدأ التيترات فى النزول مع موسيقى المقدمه مع زووم اٍن لمدخل العمارة مصاحب لمشهد اٍنصراف المارة المتجمعين حول المشاجرة لحال سبيلهم و بعضهم يضرب كفا بكف و بعضهم يقول : لا حول و لا قوة اٍلا بالله .. قطع
المشهد الثانى :
ليل خارجى .. مع آخر سطر فى التيتر نشاهد شابين يجلسان فى الكنبه الخلفيه لتاكسى .. تركز الكاميرا فى كلوز اٍن على واحد منهما و هو يهز رأسه و يحرك جسده منتشيا على اٍيقاع أغنية شعبية تنطلق من كاسيت السيارة .. و نتبين أنه شاب فى منتصف الثلاثين يبدو عليه و على شقيقه الأصغر الجالس بجواره مبتسما أنهما من الطبقة المتوسطة التى تشقى على لقمة عيشها .. نفهم من الحوار أن الشاب الأول يطمئن من شقيقه أنه أكد على حجز قاعة الفرح التى سيقام بها فرحه غدا .. يطمئنه شقيقه أنه أكد الحجز و يتبادل معهما السائق الحوار بخفة دم أولاد البلد و لا يفوتنا أن نشير فى حوار الثلاثه لكمية الطعام الكبيره التى حملها العريس و شقيقه فى شنطة التاكسى تمهيدا لنقلها لعش الزوجية .. و من الممكن أن يلمح السائق أن العرسان لن يحتاجوا لكل هذا الطعام فى شهر العسل ..
يقابل التاكسى كمين مرورى و يطلع الضابط على رخص السائق و أيضا البطاقات الشخصية للعريس و شقيقه و يستفسر منهما عن وجهتيهما و ما يحملانه فى شنطة السيارة فيخبروه و يتركهم الضابط يستكملوا طريقهم بعد أن يلقى عليهم نظرات فاحصة لكنها طبيعية ..
يمتدح شقيق العريس الأمن و الأمان فى المدينة الجديدة و نلمح فى المرآة الأمامية سائق التاكسى و على وجهه اٍبتسامة صامتة ذات مغزى .. قطع
المشهد الثالث :
ليل داخلى .. الكاميرا داخل شقة مظلمة خاوية و فارغة تماما .. تركز الكاميرا فى لقطة متوسطة على باب الشقة و هو يفتح من الخارج و يظهر شقيق العريس و هو يمد يده و ينير ضوء الصالة و هنا تبدو الشقة على البلاط و ليس فيها و لا حتى كرسى .. تتجول الكاميرا فى أنحاء الشقة من وجهة نظر العريس الذى يتبين أنها خاوية على عروشها فتعقد المفاجأة لسانه و تسقط من يده الشنط البلاستيكية التى فيها الأطعمة بينما يقف سائق التاكسى خلفهما و هو لا يفهم شيئا ..
كلوز آب على وجه العريس الذى سقط على الأرض مغشيا عليه من هول المفاجأة بينما شقيقه قد اٍنحنى عليه منزعجا يحاول اٍفاقته و هو يناديه باٍسمه .. قطع
المشهد الرابع :
نهار داخلى .. داخل قسم الشرطة .. أهل العريس و أهل العروسة الحقيقيين و هم غير أهل العريس و العروسة المزيفين الذين ظهروا فى المشهد الأول و قاموا بسرقة عفش و محتويات الشقة مستعملين هذه الحيلة الشيطانية و هم يحررون محضرا بالسرقة و يظهر الضيق على وجه الضابط من شدة الضجة و الجميع يتكلمون بصوت عالى و فى نفس الوقت يشرحون له ما حدث كما سمعوها من الجيران .. الضابط يطلب منهم فى حدة أن يتقدم شخص واحد فقط للحديث و اٍلا قام باٍخراجهم من القسم .. يتقدم والد العريس و يبدأ فى شرح الموضوع من بدايته و نفهم اٍن أبنه عمل لسنوات فى السعودية حتى يستطيع توفير نفقات الزواج التى ضاعت هباءا و أنه الآن فى المستشفى و قد أصيب بصدمة عصبية حادة من هول المفاجأة .. و يبدى الأب تعجبه من قيام اللصوص بسرقة ليس فقط الأجهزة الكهربائية الصغيرة و لكن أيضا غرفة النوم و المراتب و المخدات و البطاطين و السفرة و الصالون و الأنتريه و المطبخ بالكامل و الثلاجة و البوتجاز و السخانات و الملابس و أيضا خلاطات الحنفيات و الستائر و كل شىء !!
يسجل الضابط أقوال الأب و يطلب منهم غدا اٍحضار العريس و العروس و كل من دخل الشقة لعمل فيش و تشبيه له لمضاهاة بصماتهم بالبصمات التى سيتم رفعها من الشقة لمعرفة البصمات الغريبة .. و لما يعترض الأب على هذا الاٍجراء لأن اٍبنه فى شبه غيبوبه و لا يقدر على الحركة يعرض الضابط عليه فى لهجه تهكمية أن ينتقل القسم للمستشفى لأخذ بصمات العريس لو أحب ..
ينهض الضابط من مكانه و يطلب من أمين شرطه تقفيل المحضر و اٍعطائهم رقمه و يصرفهم من القسم لحين طلبهم مرة أخرى لاٍستكمال المحضر بعد شفاء العريس ..
اٍن شاء الله بعد عمر طويل .. قطع
الشاشه تصبح سوداء تماما و تنزل تترات النهاية من أعلى لأسفل ببطىء شديد ..

****************************************************

السيناريو ده حصل بالفعل :))

اٍن كان حظى فى الحياة قليلها . فالصبر يا مولاى فيه رضاك

2009-05-31T16:45:00.000+03:00

تتصورى ؟؟ لا عمرى حقدر ع الفراق و لا أنتى عمرك تقدرى !!

2009-05-29T23:39:00.003+03:00

lma elsheta Upload Music

مصنع الرجال

2009-05-26T21:00:00.005+03:00

مساء الخير أعزائى المدونات و المدونين ..

بأستسمحكم أنى حأفصل شويه عن سلسلة بوستات من الصعيد الجوانى و عاوز أتكلم فى موضوع هام و حيوى و لا يحتمل التأجيل خاصة اٍن الأجازه المدرسيه قد بدأت بالفعل ..

دلوقتى يا جماعة الخير حان وقت الاٍهتمام برعاية أولادنا من الناحيه الرياضيه كما راعيناهم دراسيا أثناء الدراسه .. و كما أوصانا بذلك سيدنا الفاروق عمر و هو ليس حديثا نبويا كما نبهنى لذلك الأبن beautiful mind - جزاه الله خيرا - عن السباحه و الرمايه و ركوب الخيل و اللى هى مقوله معجزه بمقاييس الزمان لأن هذه الرياضات الثلاثه بالذات جمعت فى منافعها كل منافع الرياضات على اٍختلافها ..

و أنا عن نفسى الحقيقه و بصراحه لم يهتم أبويا رحمة الله عليه بتنشئتى تنشئه رياضيه فى طفولتى السعيده رغم اٍتساع مداركه الفكريه و كان أقصى اٍهتمامه الرياضى بى أنه أشترى لى بندقيه رش نمره واحد ماركة رمسيس علشان ألسوع بيها الكلاب المكلبظه من بلكونة بيتنا القديم فى العباسيه اللى كانت بتتخذ من سقف عربيته ملاذا آمنا ( الكلب من دول كان ياخد الرشه فى وركه و يبص لى باٍستهزاء و يكمل نوم و الله ) ..

و روحى يا سنين و تعالى يا سنين و مياه كثيره جرت فى نهر الحياه .. ورزقنى الله بالذريه من الأولاد و البنات .. و كانت أول تجربه لى فى الاٍهتمام بالرياضه مع أبنى الكبير .. و اللى حأكيهالكم و اللى أتمنى أن يستفيد منها القراء ..

بدأت التجربه لما لاحظت أن الواد أبنى ده بيميل لحياة الدعه و الخمول خاصة لما بلغ العشرين .. أغلب يومه بيقضيه قدام الأنترنت يشيت مع البنوتات حول العالم و حاطط جنبه لترات البيبسى الساقعه و أكياس الشيبسى و الجيرسى من كل نوع .. و طبعا بقى ليله نهار و نهاره ليل لاٍختلاف فروق التوقيت فى بلاد البنات اللى بيشيت معاهم !! و لما يزهق بقى من الأنترنت يقوم يحضن جيتاره و هاتك يا مزيكا و هو لابس شورت جينز مقطع و تى شيرت مهربد و لا مؤاخذه شبشب بصباع و عامل زى الشحاتين الطلاينه اللى فى ميدان أفينتى .. ناهيكم طبعا عن منظر شعره و ذقنه اللى سايبهم من غير لا حلاقه و لا تهذيب اٍعتقادا منه اٍن الفنان الروش لازم يكون منظره كده ..

ده غير بقى طبعا طريقته فى الكلام مع الكبير و الصغير اللى ماكنتش بتعجبنى أبدا و اللى كان سببها اٍختلال الساعه البيولوجيه بداخله .. و حاجات بقى يعنى تخنق كتير من حاجات الشباب اللى فى السن ده و اللى بالنوعيه دى ..

كان نتيجة ده طبعا أن الوله أبتدا يطلع له كرش من القعده و قلة الحركه و هو فى هذه السن المبكره خاصة أنه ضخم الجسم أصلا بشكل ملحوظ و كان أبعد مشوار يمشيه على رجليه هو مرواحه لبيت مدرس الموسيقى اللى هو أصلا لازق فى بيتنا .. و كان أقصى مجهود يعمله أنه يلعب فى ...... ودنه يعنى ..

طبعا ماكنش عاجبنى حاله .. و ريقى نشف معاه : يا أبنى يا حبيبى روح ألعب شوية رياضه يشدوا جسمك .. قوم يا حبيبى أجرى فى الشارع شويه .. يا عين أبوك حترهرط و تمهمط و مش حينفع تتلم تانى و مش حتلاقى و لا عروسه ترضى بمنظرك ده !!

و الواد ودن من طين و ودن من عجين .. و كان بيهاودنى على قد عقلى و يقولى باٍبتسامه لئيمه :

- أشترك لى يا بابا فى نادى دريم و أنا أروح ..

دريم حته واحده يا وله ؟؟ ما يقدر على القدره اٍلا ربنا يا أبنى .. فرجه قريب ..

ماكنتش عارف بقى أن ربنا سبحانه و تعالى مدبر من عنده تدبيره اٍنما أيه !!!

فى يوم كده رجليا خدتنى عند ميدان الرمايه اللى فى آخر شارع الهرم .. و ألاقيهم معلقين اٍعلان كبير على نادى الرمايه بتاع القوات المسلحه بيعلنوا فيه عن فتح باب القبول للشباب فى مدرسة الصاعقه حتى اٍشراف ظباط متخصصين !!

و من غير ما أفكر و الله لاقيت نفسى داخل الاٍداره و بسأل عن شروط القبول .. و بعتونى مع مجند للرائد أسامه قائد المدرسه الرياضيه .. و هو ظابط صاعقه بكل ما تحمل الكلمه من معنى شكلا و موضوعا .. و الراجل الحقيقه أستقبلنى بود و ترحاب لكن من النوع الميرى .. و أستفسر منى اٍذا كنت من أفراد القوات المسلحه الحاليين أو السابقين فأفهمته أنى لم أنل هذا الشرف من قبل رغم أنى خريج ثانويه عسكريه عريقه ( أيام ما كان الشباب فى عصرنا بيفخروا باٍلتحاقهم بالمدارس الثانويه العسكريه ) ..

و الرائد أسامه بدوره أفهمنى أن المدرسه الرياضيه لها شروط محدده و صعبه لقبول الطالب بها و هى بتؤهل أصلا الشاب للاٍلتحاق بالكليات العسكريه و كمان بتبنى جسده رياضيا و بتخليه قادر على تحمل أشق الظروف و أيضا بتساعده على الثقه بنفسه و بقدراته البدنيه و الذهنيه ..

حلو أوى :)

صبرت و نلت يا أبنى هع هع هع ( ضحكة شماته )

لما روحت البيت ناديت على الوله باٍسم الدلع اللى بيحبه فأتانى مستبشرا بعد ما قلت له : أشتركت لك فى حاجه حلوه أوى يا لولوش :)

سألنى و على وشه اٍبتسامه متفائله :

- خير يا بابا بس أوعى يكون نادى الجولف بتاع دريم لحسن الشمس بقت حاميه :)

قلت له :

- ما تخافش يا حبيبى .. أشتركت لك فى مدرسة الصاعقه :)

سألنى و قد اٍنقلبت سحنته و كأنه غير مصدق لما يسمع :

- مدرسة مين ؟؟!!

- مدرسة الصاعقه يا حبيب أبوك حيث مصنع الرجال و مستودع الأبطال .. و روح يا أبنى قلبى و ربى راضيين عليك ..

طبعا الموضوع بالنسبه له ماكنش سهل لتقبله .. و الكام يوم اللى سبقوا تقدمه للمدرسه ورانى الويل و وريته ظلام الليل لحد ما أقتنع أنه لا فكاك من تنفيذ رغبتى .. و أستعملت حقى كأب له الحق فى أن يكون ديكتاتور رحيم بأولاده لما بيلاقى خطر على مستقبلهم و سلوكياتهم و صحتهم .. و البيت أتقلب مناحه من جميع الأطراف بس و لا همنى :))

شفتوا فيلم عبود على الحدود ؟؟

شفتوا علاء ولى الدين أول ما شاف جنود الصاعقه قال أيه ؟؟ قال : " و لا تحسبن الذين قتلوا فى سبيل الله أمواتا بل أحياءا عند ربهم يرزقون "

أهو الواد أبنى عمل كده .. جات له كرشة نفس و وشه أزرق و ركبه سابت و بقت بتخبط فى بعضها لما أول ما دخلنا المدرسه و أنا ماسكه من أيده و قابلنا فى وشنا عشرات الشباب اللى زى الورد البلدى المزهزه ضخام الأجسام أصحاء البنيه ربنا يحميهم و هم بيجروا فى طابور منتظم بطريقة أفراد الصاعقه و بيصيحوا بصوت واحد بيرج أرجاء الفضاء : صاعقه .. تضحيه .. فداء ..

بصيت على الوله لاقيت فكه التحتانى بيترعش و بيقول لى :

- هى الحرب قامت يا أبويا ؟؟!! أنتم مش عبرتم القناه و خلاص ؟؟!!

- أطمن يا حبيبى أطمن و هو أنا حألاقى صدر حنين عليك يا أبنى أحن من الجيش المصرى :))

و سلمته من أيده للرائد أسامه و وصيته عليه توصيه لوز أوى .. و توقعت أن اللى أكله الوله وز وز حيطلع على جتته بط بط ..

و أجرى يا أيام و تعالى يا أيام .. و روحى يا شهور و تعالى يا شهور .. و تنتهى الدوره على خير ..

دوره بدأها الواد أبنى بأنه كان بيكسل يقوم يطفى جهاز التكييف اللى فى أوضته و أنتهت بأنه أجتاز جميع التدريبات الشاقه الرهيبه اللى فى الكليب اللى فوق ده .. و بعد ما أتفرد جسمه و أتشكل بشكل رجولى خشن لاقيته أنه عشق الحياه العسكريه كأغلب الشباب .. و أتغيرت هيئته هو وزملاء دفعته و بقوا بنى آدمين .. و لاقيت أن أخلاقه تحسنت و تبدلت و أصبح رجل يعتمد عليه بجد .. و موقن أن معايشته لحياة الخشونه جعلته يقلع عن عادات سيئه كثيره بعضها معلن و بعضها غير معلن ..

كان الهدف الأساسى عندى لما ألحقته بمدرسة الصاعقه أنه يلعب رياضه تفيده صحيا و ذهنيا و أن يفرغ طاقته فيما يفيده لكنى وجدت أن الهدف ده جر وراءه ما لا يحصى من الفوائد و الفضل لله أولا و لرجال الجيش ثانيا ..

عاوز أقول أنه حان الوقت بجد للاٍلتفات لصحة عيالنا الجسديه و النفسيه .. صبيان و بنات .. و أن مافيش حجه أبدا لعدم ممارسة الرياضه اللى أبسط أشكالها المشى نص ساعه يوميا و القيام بشوية تمارين خفيفه اٍن شاء الله حتى فى البيت .. لأن ده اللى حيقعد لهم فى كبرهم و لأننا بجد مش عاوزين نكرر أخطاء اللى سبقونا و لم يهتموا بتنشئة عيالهم على حب الرياضه و ده بيؤدى بالتالى لمشاكل صعبه جدا .. و مش بأقول طبعا أنه من الضرورى أن يجتاز الشباب تجربة الواد أبنى لأن دى كانت تجربه خاصه بيه و لا تعد كنموذج يعنى لما ينبغى أن يكون عليه الحال ..

البوست الجاى بقى اٍن شاء الله حأحكيلكم عن تجربتى التانيه مع الوله الصغير الشيخ عبده اللى قررت أبيعه بتمن كويس كما ينبغى لأب مثلى محب لعياله .. و اٍزاى بدأت بالفعل تنفيذ هذه الخطه النميسه بأنى أشتركت له فى أكاديمية نادر السيد لكرة القدم :)

أشوفكم على خير اٍن شاء الله و لكم كل الشكر و التحيه ..

تحديث مهم : من الصعيد الجوانى .. حبيت بنوته من أخميم !!

2009-05-21T17:40:00.000+03:00

تحديث مهم : أشتكى كتير من المدونين أن الكتابه مش بتظهر على بعض المدونات و لا حتى الصور !! و من ضمنهم مدونتى ..

التفسير البلوجرى المنطقى للمشكله دى أنهم بيستعملوا برنامج فايرفوكس للتصفح لكن لو اٍستعملوا برنامج اٍنترنت اٍكسبلورر فبعون الله ستحل المشكله ..

مساء الخير ..
وقفنا فى البوست اللى فات عند رغبتى فى زيارة مدينة أخميم الشهيره جدا ليس فقط محليا و لكن عالميا أبضا لأسباب كثيره حأقول لكم عليها ..

أخميم أصلا بتقع جغرافيا على الضفه الشرقيه لنهر النيل العظيم .. بتبعد عن سوهاج جنوبا بحوالى نص ساعه بالسياره و مثلهم من نجع العيساويه .. و بتشتمل على عدد من القرى هى بالترتيب : نيده .. آبار الملك .. ابار الوقف .. الصوامعه شرق .. نجوع الصوامعه شرق .. عزبة العرب .. جزيرة محروس .. عرب الأطاوله .. الحواويش .. الديابات .. السلامونى .. الكوله .. نجع العيساويه .. الاحايوه شرق ..

و كل قريه من دول يا أخوانا يتألف فيها عشرميت ألف كتاب !!

المؤرخ هيرودوت لما أتكلم عن مدينة أخميم قال أنها كانت محتله بواسطة اليونانين .. و كان فيها حاميه عسكريه يونانيه قويه للغايه اٍسمها هيرموتيب .. و حاول المحتلين أن يصبغوا أهل أخميم بالصبغه اليونانيه اٍجتماعيا و دينيا .. لكن على مين يا عم اليونان ؟؟ الصعايده الأخميميين فى هذا الوقت البعيد كانت دمائهم بتفور بحب الوطن و لم يقبلوا أبدا أن تمحى هويتهم المصريه و لما فاض بهم الكيل هبوا هبه صعيديه مصريه على المحتلين اليونان و حرقوهم بجاز و أشتعلت الثوره اللى ألهبتها الروح الوطنيه و أمتدت للصعيد كله و أنهارت قوات اليونان الطريه أمام صلابة الصعايده ذات الشهره العالميه و فروا من الصعيد كله و هم بيغنوا : رجب حوش صاحبك عنى !!

المهم يعنى ..

المقريزى كمان ذكر مدينة أخميم .. و قال أن عجائب الدنيا 30 !! و من ضمنها مدينة بربا اللى هى أخميم لما أنبهر بما فيها من آثار فرعونيه يحتار العقل فى روعتها .. و بما تحتويه من قصور و ممرات و سراديب تعد معجزه فى عالم الهندسه ليومنا هذا ..

أيضا المقريزى ذكر معلومه جديره بالدراسه و هى أن مدينة أخميم على أيام فرعون موسى كانت مركز تجمع جبابرة السحره المصريين !! و أن كان فيها 30000 ساحر بارعين و صفوتهم هم اللى أستعان بهم فرعون لينصروه على سيدنا موسى عليه و على نبينا المصطفى أفضل الصلاة و السلام فأراد ربنا أن يؤمنوا بنبيه لما ألقى موسى عصاه فلقفت ما يأفكون ..

لما فتح العرب المسلمين مصر أسموا أخميم كورة أخميم يعنى مركز كبير و بتتبعه عدة قرى .. و كان بيحدها من الشمال كورة طهطا و من الجنوب كورة قوص .. و كان بها أطلال مدينة بانوبوليس الاٍغريقيه اللى أنبهر العرب بروعة أعمدتها و زخارفها .. و أشتهرت أخميم على مر العصور بصناعة الحرير اليدوى و السكر .. و كان للحرير الأخميمى منذ القدم و ليومنا هذا شهره كبيره ..

مررنا فى الطريق من نجع العيساويه لأخميم على عدد من القرى الصغيره و برضو كانت مزارع القمح اللامتناهيه على الجانبين بتحف الطريق من أوله لآخره :

و عجبتنى أوى قرية الحواويش لأنها بجد قريه نضيفه جدا .. و أهلها ناس فى غاية الكرم و الطيبه ككل أهل سوهاج و لا يسمحوا أبدا أن يقوم الغريب عن قريتهم بدفع تمن المشروبات اللى شربها على القهوه أو يعنى الحاجه اللى زى القهوه اللى على الطريق و اٍلا أعتبروها سبه فى حقهم و تبقى مشكله كبيره لو أصر الضيف على الدفع .. فبلاش تحاولوا تدفعوا تمن الشرب و الأكل فى الحواويش لو زرتوها و آدينى عملت اللى عليا و قلت لكم ..

ندخل بقى على مدينة أخميم ..

الله على المدخل الواسع الجميل النظيف .. و يا حلاوة الثعلب اللى بيعدى الطريق قدام محطة كهرباء أخميم فى عز الضهر بمنتهى الهدوء و الطمأنينه !!!!!

و يا سلام على مشروع توسيع الطريق اللى بيجرى على قدم و ساق بأيدين العمال أبناء سوهاج المشهورين بتفانيهم فى العمل من غير هزار و لا لكاعه ..

- حنشوف أيه أول حاجه يا أبو اٍسلام ؟؟

أجاب :

- متحف أخميم يا بييه ..

- هى أخميم فيها متحف يا أبو اٍسلام ؟؟!!

- هيع هيع هيع (بيضحك بسخريه) أخميم فيها أثارات أكتر من الأجصر (الأقصر يعنى) يا بييه ..
و من ميدان كبير لميدان أصغر لشارع كبير لشارع أضيق حتى لاح على البعد مكان كده واسع و هابط عن مستوى الشارع شويه و متسور بسور حجرى مش عالى أوى و المكان كله محاط بالمنازل من جميع النواحى وسط كثافه سكانيه كبيره للغايه ..

دخلنا من الباب و أستقبلنا رجل شرطه مهيب الهيئه و رحب بنا ترحيبا عظيما و أرسل معنا رجل يرتدى الجلباب الصعيدى و يحمل سلاح آلى ليكون مرشدنا فى جولة المتحف المفتوح ..

الطريق يزداد هبوطا بس ممهد بشكل جيد جدا .. و على اليمين تمثال ضخم للغايه بدأت ملامحه تتضح :

أيه ده ؟؟!! هو ده بقى الحب من أول نظره ؟؟
مين البنوته الصعيديه الرائعه دى ؟؟!!

دى ميريت آمون !! اللى سحرتنى بجمالها و رقتها و غموضها .. و مياصتها :)

ميريت آمون بنت رمسيس التانى .. دلوعة باباها أشهر فراعنة مصر على الاٍطلاق و اللى كان بيقعدها على حجره و يداعب دقنها فى كل النقوش و الرسوم اللى جمعتهم ببعض .. و من حبه فيها تزوجها و كان كهلا .. و المعروف أن رمسيس التانى أنجب 150 ولد و بنت تزوج منهم ثلاثا فقط .. و كانت ميريت آمون (يعنى محبوبة آمون) أقرب عياله و بعدها أقرب زوجاته لقلبه .. و هى غير ميريت آتون بنت اٍخناتون من زوجته نفرتيتى و اللى أتولدت فى العام الثانى من حكم أبوها ..

بجد أنا وقفت قدام التمثال اللى بيبلغ طوله 11 متر و ذهلت !!

ذهلت من هذا الجمال الناعم الأسطورى اللى سحر الكثيرين من قبلى .. وتذكرت على الفور الأستاذ محمد هاشم صاحب دار ميريت للنشر و اللى أسمى مؤسسته على اٍسم هذه البنوته الجميله لما قال عنها : تشعر حين تنظر لتمثال ميريت أنها فرغت لتوها من قبلة !!

تمثال الأميره ميريت تم الكشف عنه سنة 1981 .. و عثر عليه بدون ساقين و لم يعثر عليهما حتى الآن بس تم عمل ساقين من الأسمنت البشع و تم لصقهما بالجسد و هو أطول تمثال لملكه أو أميره فرعونيه على الاٍطلاق .. و أختلف علماء الآثار وقتها حول شخصية هذه البنوته الصعيديه الحلويات !!

بعضهم قال أنه تمثال الملكه تى أم اٍخناتون اللى عاشت فى أخميم برضو و كانت دلوعة جوزها أمنوفيس التالت اللى ماكنش بيوقع لها كلمه الأرض أبدا ..

و بعضهم ظن و بعض الظن اٍثم أنه تمثال الملكه الجميله نفرتارى .. لكن الدكتور أحمد قدرى و الدكتور لبيب الحبشى أكدوا أنها ميريت آمون بنت رمسيس التانى و تأكد هذا الكلام لما تم الكشف عن النقوش اللى على التمثال بعد اٍزالة التراب عنه .. و كانت تصف ميريت بأنها : ميريت أمون جميلة الوجه مضيئة لقصرها كلما مشت فيه .. حبيبة سيد القطرين .. تقف دائما الى جانب مليكها رمسيس الثانى كما يجاور نجم الشمال برج الجوزاء .. عازفة شخشيخة سيستروم للاٍلهه موت وعازفة الهارب للاٍلهه حتحور و منشده بارعه لباقي الآلهه ..

يا عينى يا عينى يا سيدى يا سيدى .. يا روح قلبى من جوه يا ميريت !!

يعنى كمان بتحبى الموسيقى و بتعزفى و بنوته عسليايه و آخر بهججه :)

طيب المغرم بيكى عمو عمرو عازف بيانو قديم سماعى و بالنوته و حياة طعامتك و ممكن برضو أعزف لك للصبح بدون كلل و لا ملل لحد الجيران ما يستجيروا بالقسم علشان يعرفوا يناموا .. بس أنتى قولى آه يا حتة جاتوه ميل فيى و أنا أتقدم لأبوكى و أطلب أيدك منه :)

أبوكى ؟؟

أبوكى ميييين ؟؟

رمسيس التانى حته واحده !!!

لا يا أبله يفتح الله ..

وده الواحد يتعامل معاه اٍزاى ده ؟؟

ده شوفى أصلا يا ميريت يا حبيبتى أبوكى عاكش ملوك الحيثيين من شعرهم اٍزاى تمهيدا للفتك بيهم بالبلطه اللى فى أيده الشمال !!!

أبوكى ده جبار و مفترى و أصلا حاطط عينه عليكى علشان يتجوزك يعنى أروح جنبه فين أنا بقى ؟؟

بأقول لك أيه يا وردة الحب الصافى : خلينا كده أحسن .. أحبك من بعيد لبعيد و أقاسى فى بعدك الأهوال .. و أنضم عن طيب خاطر للى طيرتى عقلهم بجمالك و بهائك .. و أدينى كل ما حتسمح الظروف حتلاقينى عندك فى أخميم ..

أخميم ..

الله عليكى يا أخميم .. يا عايمه فوق بحيره لا تجف و لا تنضب من آثار الأجداد .. و على قولة واحد من أهلك : دى حاجه تزهج و الله !! كل ما ننوى ندج طرمبه نلاجى أثارات لمن الواحد بجى مش عارف يدجها فييين ؟؟!!!

بقى الحكايه كده ؟؟

العجيبه بقى أن الآثار الموجوده فى أخميم بتنتمى مش بس للحضاره الفرعونيه و أسراتها و لكن أيضا لحضارات أخرى نمت و أزدهرت على أرضها زى الحضاره الاٍغريقيه مثلا .. بصوا التمثال ده المجاور لتمثال محبوبتى ميريت :

ده تمثال فينوس كما قيل لى بس ده النسخه المحتشمه منه و للأسف بدون رأس .. و عثر عليه برضو فى أخميم بس شتان ما بين جمالك المصرى يا ميريت و ما بين مقصوفة الرقبه الخوجايه فينوس ..

و خلصت زيارتى للمتحف ..

و غادرته و عينى على ميريت اللى أرتبطت بها اٍرتباط صعب وصفه و لكن أزعم أن للنفس البشريه دهاليز من الصعب توصيفها و لا فهمها !!

باى باى يا ميريت .. يا بنوتة الصعيد يا اللى خطفتى قلبى و أنا فى السن ده !! بس اٍن جيتى للحق بقى أنتى أكبر منى ييجى ب 3000 سنه :))

خرجنا من المتحف المفتوح .. و سألت طبعا عن متاجر الحرير الأخميمى اليدوى المشهور عالميا من آلاف السنين .. و ذهلت و فجعت لما أخبرت أنه ما بقاش فيه خلاص هذه الصناعه الجميله و أستبدلت بمنتجات الصين القبيحه رديئة الخامات و الصنع !!!!!!!!

و فعلا تجولت شويه فى السوق الرئيسى .. و مالقيتش فى كل المحلات غير بضاعة الصين و محلات معلقه لانجيريهات نسائيه تنافس ما هو موجود فى محلات المهندسين و ده شىء غريب أن تعرض مثل هذ القطع الصغنونه علنا فى الصعيد الجوانى و تقلب بين أيدى الشاريات هكذا علنا !!

فييييين و فييييييين لما واحد أبن حلال دلنى على آخر مشغل للحرير اليدوى فى أخميم و يقع قدام المتحف اللى كنت فيه مباشرة ..

المشغل يقع فى بيت ريفى أنيق و شديد النظافه من بيوت باشوات زمان و بيشغل الدور الأرضى بالكامل و يبدو أن صاحبه يسكن فى الدور العلوى من نفس البيت و اٍسمه مش فاكر أيه الخطيب ..

صالة عرض المشغولات اليدويه تمتلىء بالمعروضات و خاصة قماش المفارش لزوم جهاز العرايس :

الميزه و القيمه الحقيقيه فى هذه الأقمشه أن صناعتها كلها يدوى على الأنوال بغير أى اٍستعانه بماكينات النسيج .. و هى شديدة النعومه و الجوده .. و أشتريت من هناك شال جميل هديه لأغلى اٍنسانه فى الدنيا :)

الأستاذ الخطيب صاحب المشغل أخبرنى أن صناعة الحرير اليدوى فى طريقها للاٍندثار .. لأن السوق لا يساعد على اٍستمرارها و لأن السياح فى أخميم قل عددهم بشده فى السنوات الأخيره و هم كانوا عماد تجارة هذه الصناعه الرائعه اللى كانت بتدر دخل جيد لأصحابها و للبنات العاملات فى المشاغل .. و أضاف على كده كمان سبب هام جدا و هو أن الزبون دلوقتى بيهتم برخص تمن المنتج و مش مهم جودته أو قيمته و ده بسبب غلاء المعيشه أصلا و بسبب زحف المنتجات الصينيه على الأسواق ..

للأسف يعنى ..

- يالا يا أبو اٍسلام خلصنا اليوم على خير و لله الحمد ..
- على فييين يا بييه ؟؟

- على الأوتيل يا أبو اٍسلام !!

- أوتييل أييه يا بييه ؟؟

- مطرح ما خدتنى الصبح يا أبو اٍسلااااام !!

- أيوه أيوه .. جصدك الباخره بجا هع هع هع (يعنى بيضحك فى سخريه)

و ده كان نموذج للحوارات بينى و بينه ..

و أخيرا غادرت أخميم و أنا أحمل بداخلى ذكريات بجد من أجمل ذكريات حياتى و وجه ميريت لا يفارق خيالى السارح بعيدا و أنا أتأمل دروب أخميم العتيقه حيث عاشت هنا ميريت الرائعه المذهله و ماتت و ضم تراب أخميم جسدها الشاب ..

أييييييييييه كل من عليها فان .. بس للى يتعظ و الله ..

و رجعت الأوتيل قبل المغرب بشويتين.. الباخره على رأى أبو اٍسلام و قبل أى شىء توجهت رأسا اٍلى المطعم لأن الحب و الوجد لا يمنع برضو عصافير البطن أنها تزقزق و تصوت كمان .. فكان فى اٍنتظارى حقيقه تقبلتها بنفس راضيه و عين دامعه و قلب مكلوم و هى أنهم خلاص شطبوا الغدا و عليا بقى الاٍنتظار للعشاء .. عارفين العشاء كان مقرر له اٍمتى ؟؟

الساعه 5 الفجر :))

و لولا لطفك يا رب أنك ألهمتنى و أفتكرت طبق الفاكهه الملوكى اللى فى الأوضه لكنت مت جوعا .. و فعلا نزلت عليه حتتك بتتك نزول جند رمسيس التانى على قادش ..

و أفتكرت ميريت حبيبة قلبى لما أفتكرت أبوها و قطمت قطمه من التفاحه الأمريكانى و سرحت شويه و أبتسمت بس رجعت أستعذت بالله العزيز من الشيطان الرجيم :)

البوست اللى جاى بقى باٍذنك يارب حيكون عن شوية حكايات كده متفرقه لكواليس تصوير المسلسل و حكايات العاملين العجيبه على الباخره .. و حتلاقوا فيه حقائق غريبه أوى بجد .. فترقبونا ..

و لكم خالص الشكر و التحيه ..

من الصعيد الجوانى .. عيد ميلاد نور الشريف ..

2009-05-17T11:05:00.000+03:00

أسعد الله صباحكم بكل خير أعزائى المدونات و المدونين ..

لما أنتهت زيارتى للدير الأبيض على خير - زى ما قلت لكم فى البوست اللى فات - كنا بنصارع الوقت للوصول للمركب سوبك الراسيه على ساحل نجع العيساويه و كلى أمل فى اللحاق بالحفل اللى كان مقرر اٍقامته بمناسبة وصول الأستاذ نور الشريف فى أول يوم له لبدء التصوير و كمان بمناسبة عيد ميلاده اللى كان أحتفلت به معظم الفضائيات قبل هذا الحفل بكام يوم ..

لما وصلت المركب قبل الغروب بحوالى نص ساعه عرفت أن الأستاذ نور و مساعدينه لسه ما وصلوش و أنهم فى الطريق و حيوصلوا كمان ساعه اٍلا ربع علما أنه فضل الحضور لنجع العيساويه بالسياره و مش بالقطار ( يا بخته ) و مش بالطائره اللى لازم تنزل اٍما فى مطار أسيوط أو مطار الأقصر اللى بينهم و بين المركب حوالى ساعه و نص بالعربيه ..

قلت حلو أوى ..

فرصه الواحد يستحمى و يزيل شبرين التراب و العفره اللى لزقوا على جتتى من رحلة النهارده و يتكولن و يلبس اللى ما تلبسش علشان ده برضو عيد ميلاد الأستاذ نور يعنى مش أى كلام :)

أنجزت المهمه .. و طلعت على سطح المركب أتأمل الشمس و قد بدأت فى المغيب خلف الضفه الغربيه للنيل .. و كان هذا المشهد الساحر :

بعدها بدقائق حسيت بحركه غير عاديه على المركب و ناس طالعه و ناس نازله و حركة نشاط كده .. فتوقعت أن الأستاذ نور قد وصل .. و بالفعل لاحت سياره ميكروباص تابعه لشركة سياحه و وقفت أمام المدخل .. و أطلق الريس على قبطان المركب الأبواق بصوت عالى جدا شق الهدوء اللى تعودنا عليه كتحيه لوصول الأستاذ نور الشريف ..

و لكن هيهات !!

علينا واحد :)

الأستاذ نور ما نزلش من السياره اللى كانت بتحمل مساعديه و عدد كبير جدا من الحقائب الضخمه اللى بتحوى ملابسه و لوازم التصوير .. و سمعت الريس على بيزعق بصوت جهورى للى قال له اٍن الأستاذ وصل و خلاه يطلق الأبواق أونطه :)

- أمال فين الأستاذ ؟؟!!

سألت واحد من مساعديه ..

و علمت أن الحاج سيف كبير نجع العيساويه قام رجالته باْيقاف السياره اللى كان بيستقلها الأستاذ نور و أصر على دعوته لبيته اللى بيقع على مدخل النجع للقيام بواجب الضيافه تجاهه قبل أن يدخل القريه على عادة أهل الصعيد شديدى الكرم و اللى لا ينافسهم فى كرمهم سوى نحن و أعوذ بالله من قولة نحن معشر الشراقوه .. و أيضا أرسل من يدعو كل الطاقم الأول من العاملين بالمسلسل بغض النظر عن السبع ساعات اللى قضاها الأستاذ نور فى رحلته من القاهره للنجع .. و طبعا يعنى لا يجوز رفض أو الاٍعتذار عن هذه الدعوه فى الصعيد و اٍلا توبجا عيبه و شينه و الله وحده يعلم بعواقب الأمور :)

نص ساعه كده كمان و وصلت السياره اللى بتقل الأستاذ نور للمركب و المره دى بجد يعنى :) و أنطلقت مره تانيه الأبواق لتحية الأستاذ :

وصول الأستاذ نور للمركب

و هو بيدخل المركب

طبعا الاٍستقبال داخل المركب بقى كان شىء خرافى من كل العاملين بالمسلسل من فنانين و فنيين و اللى بتربطهم بالأستاذ نور صلات وثيقه لأنه محبوب من الجميع زى ما عرفت بعد كده لتواضعه الشديد و اٍلتزامه بمواعيد العمل و الراحه و حرصه الفائق على أن تسود روح المحبه فى أى عمل بيشارك فيه ..

كمان كان فى اٍستقباله على الباب الداخلى للمركب الريس على القبطان و مساعدوه و أيضا كل طاقم العاملين على الباخره و أشتغل التصوير بكاميرات الموبايل و الاٍبتسامه لم تفارق وجه الأستاذ نور أبدا رغم أنى رأيت الاٍجهاد الشديد واضح على وجهه لأنه ما لحقش يرتاح بعد وصوله من القاهره ..

الصدفه البحته جعلت جناح الأستاذ المخصص له و هو رقم 306 يقع مباشرة أمام غرفتى رقم 305 و لا يفصل بينهما سوى خطوتين هم عرض الممر اللى بتقع على جانبيه الغرف و الأجنحه ..

الحقيقه يا جماعه مش عاوز أتكلم كتير عن نور الشريف الفنان لأنه حيكون كلام متكرر لا فائده منه .. الخلاصه أنه فنان ملتزم جدا و شديد الحساسيه تجاه الأعمال المسيئه لمسيرة الفنان .. لا عمرنا شفناه بيعمل عمل تافه الغرض منه اٍضحاك المتفرج و خلاص .. و لا عمرنا سمعناه بيتكلم كلام فارغ الغرض منه التقرب لأولى الأمور حتى لو كان على حساب تاريخه الفنى ..

أنا اللى على اليمين برضو علشان ما تتلخبطوش يعنى

الصوره دى كانت أثناء تناول العشاء .. و الأستاذ نور رفض كل أنواع الطعام رغم فخامتها لما عرف أن الشيف عامل كشرى و طلب يجيبوا له طبق كشرى محبش أكل منه و أبدى اٍعجابه بيه .. بصراحه أنا بصيت لكمية اللحوم اللى قدامى و أنكسفت على دمى !!

لما سألته ذات مره و اٍحنا قاعدين بالليل على سطح المركب أيه أقرب عمل فنى لنفسك يا أستاذ نور ؟؟

قال بدون تردد :

- ناجى العلى .. فيلم ناجى العلى ..

و ألتفت خلفه يتأمل صفحة النيل و قد اٍنعكس عليها وجه القمر ..

السياسه و واقع الحال العربى .. شيئان هما محور أحاديث الأستاذ بعيدا عن اللوكيشن .. و الحق أن آراءه التى يعلنها فى وسائل الاٍعلام هى هى نفسها التى سمعتها منه لم يغير منها حرفا و لم يبدل فيها على عكس الكثيرين من المشاهير الذين جالستهم و اللى بيبقى كلامهم المعلن غير كلامهم اللى مش معلن :))

نور الشريف قست عليه الحياه قليلا فى طفولته .. القسوه لا تكون دائما عن طريق الماديات لأنه كان من أسره ميسورة الحال .. مثلا هو أكتشف أنه يتيم لما دخل المدرسه و أستغرب فى دهشه طفوليه لما علم أن اٍسم أبوه اللى المفروض يكتبه ملحقا باٍسمه ليس هو اٍسم الرجل اللى كان بيعتقد أنه أبوه و قد ساعدته شقيقته الكبرى على فهم هذا اللغز .. و أزعم أن هذا الموقف قد أثر فى حياته و فى طريقة معاملته لمن هم أقل منه تأثيرا كبيرا ..

نور الشريف اٍنسان متواضع لأقصى درجات التواضع .. لم تبهر أضواء الشهره عينيه .. و لم تنسه المكانه المرموقه التى وصل اٍليها كفنان معدود ضمن أكثر 10 ممثلين فى العالم نجوميه أنه فى النهايه اٍنسان .. اٍنسان يتعامل مع الجميع من هذا المنطلق .. و له تصرف لاحظته و أستغربت له أنه بيقوم و يقف و يبتسم لما حد من المتردوتيلات يضع له المشروب !!

و رغم اٍجهاده الشديد بسبب الرحله التى قام بها من القاهره للعيساويه و برغم الضجه التى حدثت بسبب وصوله للمركب ناهيكم كمان عن أنى ما رحمتوش و هاتك يا كلام و أسئله اٍلا أنه مانسيش يتابع بالموبايلات الأتنين اللى معلقهم فى رقبته آخر تطورات الموقف العائلى بين مديرة منزله و بين زوجها اللى كان بينهم خلاف و كان بيطمئن أن الأمور بينهم هدأت و المياه عادت لمساراتها الطبيعيه !!

الأستاذ نور له طبيعه خاصه جدا قد تكون موجوده لدى أغلب الفنانين الكبار و له طقوس يعرفها كل من يشاركه العمل قبل أن يبدأ التصوير و هى تبدأ مباشرة عقب اٍنتهاءه من عمل المكياج و لبس الملابس الخاصه بالدور .. ينزوى لوحده و مش شرط يكون بعيد عن الموجودين .. يصمت تماما لمده قد تطول أو تقصر على حسب موده .. ينفصل نفسيا عن المكان و الزمان و شيئا فشيئا تتغير ملامح وجهه .. يتغير صوته .. تتغير مشيته .. يخرج من شخصية نور الشريف تماما و يدخل فى اٍهاب الشخصيه اللى بيجسدها .. و لما بيتم له ما يريد ممكن بقى يتبادل الحديث مع الآخرين لكن قبل كده ممنوع التحدث معه اٍطلاقا ..

أيه ده ؟؟

أنا سرحت كده ليه ؟؟!!

معلش :)

نرجع تانى لموضوع البوست و هو حفلة عيد الميلاد !!

دى صورة البهو الرئيسى للفندق العائم سوبك قبل الحفله .. لاحظوا الهدوء اللى فيها :

لما نزلنا البهو الجميل ده كان المكان ممتلىء عن آخره بطاقم العمل .. و فجأه اٍنفتح باب المطعم و خرج منه ما لم أتوقعه أبدا !! و أصيب الأستاذ نور بالدهشه الشديييييييده .. بصوا :

زى ما شفتوا كده :))

فوجئنا جميعا بتورته عملاقه و بكل العاملين بمطبخ و مطعم و بار الباخره (على فكره البار لايقدم خمور و لكن شاى و نيسكافيه و حاجات من دى ) و على رأسهم كبير الشيفات محمود اللى شعره أبيض رابط منديل أحمر على رقبته (لاحظوا رشاقته و لياقته العاليه) و هم شايلين الدفوف النوبيه و هاتك يا مغنى و رقص .. ما هم أصلا كلهم من النوبه و على حسب ما قالوا لى اٍن النوبيين بيعبروا عن كل شىء فى حياتهم بالرقص و الغناء حتى فى قمة أحزانهم برضو لا يتخلوا أبدا عن شغفهم بالتعبير رقصا و غناءا عما يدور بداخلهم ..

و شاركهم الأستاذ نور الرقص النوبى لبعض الوقت و لاحظوا ملامح التعب اللى على وجهه ..

ثم كانت لحظة طفى الشموع و اللى شاركت فيها الفنانه سوسن بدر اللى علمت منها اٍن لها جذور نوبيه هى كمان !! و بالمناسبه هى بتؤدى فى المسلسل ده دور شخصية سيده صعيديه قاتله و مخيفه شعرت بقشعريره فى جسدى و هى تؤدى مشهدا كانت تتشمم فيه طفلا كالذئبه المفترسه قبل أن تذبحه !! بصوا الصوره دى :

و برضو الجماعه ماسابوش الأستاذ نور يستريح و أصروا على مشاركتهم رقصهم و غناءهم ..

بالمناسبه بقى الرتم النوبى ده مصطلح موسيقيا مش صح لأنه الحقيقه هو اٍسمه الاٍيقاع الخماسى اللى هو الاٍيقاع الاٍفريقى و اللى كان بيستعملوه المصريين القدماء فى غناءهم و فى ترانيمهم و هو اٍيقاع ساحر شديد الحيويه يخليك غصب عنك تتمايل معاه .. و النوبيين حافظوا عليه على مدى آلاف السنين و لم يتأثروا بأى نوع من الاٍيقاعات الموسيقيه الأخرى ..

و اٍنسحب الأستاذ بأعجوبه و جلس ليستريح و كان فى ضيافته بقى المره دى الحاج سيف كبير نجع العيساويه اللى وصل مع مجموعه كبيره من رجاله و معاه اٍبنه طفل صغير لكنه بيتصرف كالرجال الكبار و كان لابس بدله و بابيون .. و الحاج سيف أهدى الأستاذ نور هديه قيمه جدا جدا بمناسبة عيد ميلاده عباره عن نموذج موغل فى القدم لرحايه فى علبه قطيفه حمراء تماشيا مع اٍسم المسلسل اللى هو الرحايه برضو .. الحاج سيف اللى لابس جلابيه بيضاء :

و فضلوا برضو الجماعه يرقصوا و زى ما يكونوا أما صدقوا سمعوا دق الدفوف علشان يرقصوا و ما شعرتش أنهم حسوا بالتعب :)فى الكليب ده حتلاقوا الظابط الاٍدارى للباخره اللى لابس قميص أبيض و كرافته بيرقص مع البارمان شريف اللى هو الشاب اللى لابس صديرى أحمر و اٍذ فجأتن و على حين بغته بيروح ناطط وسطهم المتردوتيل نجيب اللى لابس صديرى أسود زى ما يكون ماهنش عليه يسيب فرصه و ما يرقصش فيها !!

لاحظوا كمان شخص اٍسمه أنور لابس جلابيه و متحزم و بيرقص معاهم علشان ده له حكايه رهيبه و كانت حتحصل له مصيبه كبيره لولا لطف الله و حأبقى أحكيهالكم فى بوست تانى :)

و لاقيت موبايلى بيرن و كانت البرنسيس شمس النهار .. رديت و طبعا كانت الدوشه عاليه جدا جدا و مش سامعين بعض .. لاقيتها بتقولى :

- أنا مش سمعاك خالص و واضح أنك فى مولد .. هو فيه مولد فى البلد اللى أنت فيها ؟؟

قلت لها :

-أيوه .. بنحتفل بمولد الأستاذ نور الشريف :))

ردت فى براءه :

- طيب لما ترجع المركب اٍبقى كلمنى !!

و دى كانت اللحظات الأخيره فى الاٍحتفال قبل ما الأستاذ يستأذن من الجميع و يصعد لجناحه الساعه 11 بالظبط زى ما هو متعود لأنه بينام 11 و نص بالثانيه مهما كانت الظروف ليستعد لأول يوم من الأشغال الشاقه لتصوير أول مشاهد خارجيه له فى المسلسل و اللى كانت فى منطقه اٍسمها الهدار حاجه كده شبيهه بالشلالات :

شويتين كده و أنا كمان طلعت على غرفتى بعد ما هبدت حتة تورته قدددددددددددددددددددددد كدهوه (قد عقلة الصباع و الله) اٍستعدادا لرحلتى تانى يوم لزيارة مدينة أخميم الفرعونيه الصميمه حيث وقعت فى غرام بنوته صعيديه بنت ناس أوى أوى سحرتنى و سلبت عقلى بجمالها و شبابها و مياصتها !! هى صحيح فى سن عيالى بس أعمل أيه ؟؟ أصل الهوى غلاب !!

و ده بقى موضوع البوست القادم باٍذن الله .. فترقبونا :)

لكم كل الشكر و التحيه ..

من الصعيد الجوانى .. زيارة الدير الأبيض

2009-05-10T02:19:00.001+03:00

أسعد الله صباحكم أعزائى المدونات و المدونين ..
نستكمل سويا أحداث جولتى فى الصعيد .. و أسمحوا لى أحكى لكم النهارده عن زيارتى للدير الأبيض القابع فى سكينه على حدود جبل أدربيه على بعد 6 كيلو متر من سوهاج و حيث كانت توجد قرية أدربيه الفرعونيه من آلاف السنين ..

الطريق من نجع العيساويه للدير قطعه أبو اٍسلام السواق اٍبن المنطقه و اللى حافظ كل شبر فيها فى حوالى ساعه و ربع .. الطريق ممهد و رائع و على جانبيه مزارع قمح العين ما تجيبش آخرها و أزعم اٍن كل هذا القمح فى الصعيد بطوله و عرضه يكفى لاٍطعام شعوب 10 دول و من الشعوب المفجوعه كمان .. لكنى ذهلت لما عرفت الحقيقه المضحكه المبكيه اٍن 95% من القمح المصرى الصعيدى بيتم تصديره للخارج و بنرجع نستورد اٍحتياجتنا من القمح برضو من الخارج :)) ده طبعا غير ما يتم أخذه كمعونه من أمريكا الويكا كونيكا و لله فى أمره شئون ..

أفقت من تأملاتى على صوت أبو اٍسلام و هو يشير لجبل لاح من بعيد :

- ده جبل الشيخ حمد و مليان مطاريد يا أستاذ أصلهم عيستخبوا فى كهوفه .. و الحاكومه عتكبس عليهم دلوكيتى كل يوم و التانى لمن جلبت عيشتهم مرار ..

جبل ؟! مطاريد ؟! كهوف ؟!

أحمدك يا رب :)

و شعرت بشغف شديد لاٍرتياده .. و قد كان .. و ماعدوش يومين اٍلا و كنت بأتآنس بمجالسة الريس أبو رحمه و هو واحد من عتاة المطاريد على سفح جبل بنى حمد .. و ده حيكون موضوع بوست آخر أزعم أنه سيكون من أعجب البوستات :)

لما أقتربت السياره بشده من سفح الجبل المهيب أنحرفت يمينا فى طريق مسفلت و نظيف تحفه من على الشمال مقابر للمسيحيين على مساحات شاسعه و فى حالة يرثى لها و من على الشمال مزارع هائله للقمح .. منتهى التناقض فى المشهد ما بين الحياه و الموت !! ..

و ظهرت مبانى الدير الأبيض بعد المقابر مباشرة ..

مش حأتكلم كتير عن تاريخ الدير و ممكن تلاقوا كل شىء عنه فى هذا اللينك :
تاريخ الدير الأبيض ..

بس أحب أذكر ما قيل لى فيما بعد من أن فكرة و فلسفة الرهبانيه فى العالم أجمع خرجت أصلا من هذه البقعه على أرض الوطن .. و أنه لا يوجد راهب فى العالم لم يدرس تاريخ الدير الأبيض اللى اٍحنا بصدد زيارته و لم يتأثر به .. طبعا دى مقوله لا أملك الأدوات للحكم بصحتها أو لا حيث أنى لست فى موقف الدارس لتاريخ الرهبنه القبطيه و من قال لا أعرف فقد أفتى .. فقط أنا بانقل لكم ما قيل لى ..

الأمر التانى و المهم عندى شخصيا أنه هذه المنطقه قد شهدت صراعات طاحنه بين أصحاب الديانه المسيحيه الأوائل عند بدء اٍنتشارها على أرض الصعيد و بين المصريين اللى تمسكوا بالوثنيه الفرعونيه القديمه اٍن صح التعبير .. و واضح أن الغلبه كانت لمتبعى الديانه الجديده حيث أنتشرت المسيحيه على أرض الصعيد بل و قام المسيحيون الصعايده الجدد باٍعلان اٍنتصارهم الحاسم بعد أن قويت شوكتهم بشىء عجيب حنشوفه فى الصور و الكليبات العجيبه اللى ألتقطتها فى الدير الأبيض !!

دخلنا بالسياره لفناء الدير ..

و توقفنا بجانب البوابه الداخليه الصغيره .. كل شىء مبنى من الحجر الجيرى الأبيض و ده سبب تسميته بالدير الأبيض و بناءه قديم يرجع لحوالى 1600 سنه مضت .. و فيه منطقه مسوره بسلك أى كلام كده بتحتوى على بقايا آثار فرعونيه و عليها يافطه كبيره بتقول أن هذه المنطقه تخضع لهيئة الآثار المصريه !!

قادنى أبو اٍسلام لداخل الدير من خلال بوابه حجريه صغيره و كنت قد علمت منه أنه شخصيه معروفه لدى رهبان الدير بحكم عمله كسائق بيجيب بسيارته الميكروباص الزوار من سوهاج للدير رايح جاى ..
و فعلا أستقبلنا القائمون على كشك بيع التذكارات القبطيه و الموجود على يمين البوابه الداخليه بترحاب شديد و أرسلوا واحد منهم يستدعى الراهب المسئول عن اٍستقبال الضيوف ليكون مرشدى داخل الدير ..
الجو كان شديد الحراره بس كان فيه نسمات حلوه كده بتهب من الجنوب .. قعدت على دكه خشب قديمه جدا و لكنها مريحه بجوار ترابيزه عليها برطمانات عسل نحل من اٍنتاج الدير معده للبيع .. و لما لاحظ أبو اٍسلام تأملى للعسل حيث أنى بأفهم فيه كويس أخبرنى اٍن المنطقه هنا بها أجود أنواع عسل النحل فى العالم !!
سألته :
- اٍشمعنى يا أبو اٍسلام ؟؟ أيه السبب يعنى ؟؟

- أصل المنطجه دهياتى مبروكه يا بييه ..
سكت و لم أعلق أحسن يعنى ..
شويتين و وصلوا 2 رهبان .. أول ما لفت نظرى فيهم طولهم الفارع و نحول أجسادهم الواضح .. سلموا عليا بترحاب شديد و باٍبتسامه مشرقه .. عرفونى بنفسهم الراهب الأب مش فاكر اٍسمه و الراهب الأب بيشوى و عرفتهم بنفسى .. الأول كانت لهجته صعيديه و الآخر لهجته قاهريه و هو الراهب بيشوى و اللى كان مرشدى داخل الدير ..

أنا و الراهب بيشوى (أنا اللى على اليمين علشان ما تتلخبطوش يعنى)

قادنى عبر بوابه حجريه أخرى لداخل الدير نفسه .. بهو كبير فى الهواء الطلق به بقايا أعمده حجريه على الصفين

أفهمنى الراهب بيشوى أن فى هذا الفناء كان الرهبان الأوائل يتناولوا طعامهم لأن كان عددهم كبير جدا يتجاوز ال 4000 راهب .. و كان بينضم لهم رهبان أجانب كانوا بيسعوا للاٍنضمام لدير الأنبا شنوده رئيس المتوحدين علشان يتعلموا أصول الرهبنه المصريه اللى بقت مناره لكل رهبان العالم .. و بالمناسبه البابا شنوده الثالث بابا الأقباط الحالى أخذ لقبه الكنسى من اٍسم الأنبا شنوده رئيس المتوحدين و قضى فتره كبيره جدا من حياته الكهنوتيه فى هذا الدير ..

أرض الفناء مبلطه ببلاط حديث وضع فوق البلاط القديم الأثرى و هى عاده مصريه متأصله عملا بمبدأ اٍردم على اللى فات و أنساه حتى لو كان اللى فات ده بلاط أثرى عمره يتجاوز ال 1600 سنه ..

لاحظت وجود اٍزاز مكسر على الأرضيه فبدأت فى لملمته و وضعه جانبا .. اٍبتسم الراهب بيشوى فى وداعه و قال :

- بتميط الأذى عن الطريق ؟؟

ضحكت رغما عنى و جاوبته :

- شعبه من شعب الاٍيمان :))

شايفين الباب الصغنون ده اللى فى آخر الصوره اللى فوق ؟؟

ده بقى بيقود لداخل الكنيسه الأثريه العجيبه حيث المذبح المقدس و حيث بتقام الصلوات ..

قبل ما ندخل لاقيت الراهب بيشوى بيخلع نعله فخلعته أنا كمان .. و يبدو أن هذا المكان شديد القداسه لدى الأقباط لأنى ما شفتهمش بيخلعوا الأحذيه اٍلا قبل الدخول للكهف اللى أختبئت به السيده العذراء مريم و أبنها السيد المسيح عليه و على نبينا المصطفى أفضل الصلاة و السلام أسفل الكنيسه الموجوده بمنطقة الكنائس فى مصر القديمه بالقرب من مسجد عمرو ابن العاص ..

أرض الكنيسه مفروشه بسجاجيد قديمه و لكنها ذات قيمه عاليه جدا .. و أول ما يقابل الداخل عمود رخامى و ولد و بنت قاعدين جنبه على الأرض بيتبادلوا الهمس و الضحك :) و أول ما شافوا الراهب بيشوى أتنطروا و فزوا على حيلهم و أختفوا عن الأنظار ..

العمود الرخامى

الراهب بيشوى شرح لى أن هذا العمود كان واحد من أربعه موضوع عليهم المذبح المقدس و لم يتبق منهم غير العمود ده ..عرفت بعد كده أنه بيقال أن جسد الأنبا شنوده رئيس المتوحدين مخفى تحت هذا العمود و أن الرهبان قاموا بتخبية جسده بعد ما تعرض لمحاولة الاٍعتداء عليه من قبل شيركوه عم صلاح الدين الأيوبى قديما .. و الله وحده أعلم بحقيقة الأمر ..

الجو داخل الكنيسه كان شديد اللطف و كأن تكييف مركزى بيبرد الهواء على الرغم من الحر الشديد فى الخارج و أرجعت ده لأرتفاع السقف الشاهق و للقباب العملاقه اللى بيبلغ اٍرتفاعها حوالى 20 متر ..
و بدأ الراهب بيشوى فى شرح ما أستغلق عليا فهمه من لوحات رائعه و أيقونات قديمه تعبر عن أحداث مقدسه فى تاريخ الدير و فى تاريخ الديانه المسيحيه بصفه عامه ..

و الحقيقه أنى أرهقت الرجل بالأسئله الكثيره و الحوارات اللى لم أشعر أبدا أنه أتخنق منها أو تضايق بل على العكس كان صدره رحبا جدا و أكتشفت أنه واسع الاٍطلاع بشكل مثير للدهشه و فى مختلف مجالات الثقافه و التاريخ و اللغات بل و الفنون ناهيكم عن الأديان أيضا ..

لفت نظرى شبه رسم تصويرى غير واضح التفاصيل و لكنه فى المجمل شديد الوضوح علمت أنه من أشد مقدسات الدير لأنه بيصور الأنبا شنوده رئيس المتوحدين و قد ظهرت صورته على الجدار بفعل عوامل الرطوبه يعنى زى ما تقولوا معجزه كده .. أهى :

كمان عجبتنى جدا لوحه مرسومه على قبه عملاقه و تعجبت من مقدرة الفنان المصرى القديم على رسم القباب و زخرفتها و يبدو أن مايكل أنجلو تأثر بهذا الأسلوب لما رسم سقف كنيسة القديس بطرس فى الفاتيكان .. و شرح لى الراهب بيشوى مغزى هذه اللوحه و كيف أنها بتعبر عن خالدية الله و سرمديته و هيمنته على ما فى الكون :

سألت الراهب بيشوى عن اللغه القبطيه .. قال :

- الأقباط المصريين بيستعملوا فى صلواتهم اللغه القبطيه اللى هى اٍمتداد طبيعى و اٍبنه شرعيه للغه المصريه القديمه .. و أيضا بيستعملوا اللعه العربيه لأنها دقيقه تماما كاللغه اللاتينيه اللى بتستعمل فى صلوات غير المصريين .. أما اللغه السريانيه فبتستعمل فى بعض الكنائس العربيه و خاصة فى سوريا ..

الأيقونه دى بقى مصنوعه من خشب الجوز و محفوره يدويا و هديه من دير فى اليونان و بجد تحفه رائعه :

و أما الأيقونه دى فللأنبا شنوده رئيس المتوحدين .. لاحظوا التناقض الرهيب ما بين الجدار الحجرى اللى فى الخلفيه و مابين الدولاب الألوميتال البشع اللى عليه الأيقونه ..

الحقيقه و الحق يقال اٍن الراهب بيشوى لم يترك لا صغيره و لا كبيره مما لفت نظرى بداخل هذا المكان اٍلا و قد وفاه حقه من الشرح المفصل اللى بيبين مدى سعة أفقه و اٍطلاعه و بلغه سهله سلسه و لم تفارقه اٍبتسامته الودوده أبدا .. و قد لفت نظرى لنقطه هامه للغايه لم ألتفت لها من قبل و هى أن فى كل الرسومات القبطيه اللى بيظهر فيها السيد المسيح لم يظهر أبدا مع الحواريين يهوذا الخائن اللى وشى بالمسيح عند الرومان و ضرب لى مثل على ذلك بلوحة العشاء الأخير الشهيره لدافنشى .. و فقط ظهر يهوذا الخائن فى بعض الأعمال الفنيه اٍما على هيئة رجل كريه الوجه بعين واحده كدلاله على رؤيته نصف الحقيقه فقط و اٍما على هيئة شخص يحمل كيس فى اٍيده كدليل على بيعه السيد المسيح بقطع معدوده من الفضه ..

دى النسخه القبطيه المصريه من لوحة العشاء الأخير و معلقه فوق المذبح :

لما سألت الراهب بيشوى هل فيه مسلمين بييجوا يزوروا الدير ؟ أكد لى أنه فيه مسلمين كتير جدا من أهل الصعيد و من المحافظات التانيه بيواظبوا على زيارة الدير و أنه نشأت صداقات كثيره بينهم و بين الرهبان هنا و أنه لافرق عندهم بين مسلم و مسيحى لأننا فى النهايه جميعا مؤمنين بالله الواحد خالق الكون ..

- طيب يا أبونا على حسب ما أعرف فلكل دير معجزاته المشهور بيها .. فهل ياترى يا هلترى و هلبت ما أيه هى معجزات الدير الأبيض ..

بدون تفكير جاوبنى الراهب بيشوى :

- معجزات الدير الأبيض بتتركز فى حل المشكلات الدنيويه و خروج الأرواح الشريره اللى بتتلبس أجساد البنى آدمين ..

- اٍزاى يعنى ؟؟!!!

- يعنى اللى عنده أى نوع من أنواع المشاكل زى المشاكل العائليه أو قضايا فى المحكمه بييجى يقعد هنا طول النهار و بعون الرب تنحل كل مشاكله .. و كمان اللى بيعانى من تلبس الشياطين أو الأرواح الشريره لجسده فبييجى لوحده أو أهله بيجيبوه و بيقضى هنا وقت فى الهدوء اللى أنت شايفه ده و برضو باٍذن الرب بيشفى تماما و بيرجع أحسن من الأول ..

رديت عليه بتلقائيه :

- ما شاء الله ما شاء الله ..

و خرجنا من الكنيسه للفناء الخارجى مره تانيه .. و أخبرنى الراهب بيشوى أنه كان فيه بئر خاص بالدير تم حفره من حوالى 1500 سنه و ظل الرهبان و الزوار يستعملوه على مدار هذه السنوات الطوال لحد ما دخلت مياه الحكومه للمنطقه فأصبح البئر مهجور و غير مستعمل فتمت تغطيته من حوالى 12 سنه فطلبت أنى أشوفه ..

فأنتقلنا للطرف الآخر من الفناء الخارجى .. و كان فيه مجموعه كبيره من الشباب و البنات الأقباط بيتبادلوا الحديث ربما بشكل غير مألوف فى الصعيد و خاصة فى مثل هذه المنطقه القاصيه منه و تبادلوا معايا الاٍبتسامات الودوده مرحبين على عادة الصعايده تجاه الغرباء ..

اٍجتزنا بوابه حجريه صغيره للغايه بتؤدى لشبه ردهه مستطيله شاهقة الجدران الحجريه .. على اليمين واخد بالك كوه رائعة البناء قد شدت بأعمده و قضبان حديديه أخبرنى الراهب بيشوى أن خبراء من هيئة الآثار وجدوا شروخ فيها فقرروا أن يسندوها بتلك الأعمده و القضبان و الحديديه !!

- طيب مادام عملوا كده ما يكملوها بقى !!!

ده الراهب بيشوى اللى بيقول ..

و جنب الكوه دى توجد بقايا أعمده حجريه أثريه بتيجان على شكل زهرة اللوتس الفرعونيه أغلبها محطم و مرميه فى اٍهمال يصعب على قلب الكفار !! أهيه :

شوية الأعمده و التيجان ساحرة النقوش دى لو كانت فى بلد تانيه كانوا عملوا لها متحف لوحدهم .. شايفين بقى الدرجتين الحجر اللى فى الصوره دى ؟؟ الدرجتين دول بقى بيؤدوا لممر كل جدرانه و أرضيه و سقفه من الحجر و الممر ده بيؤدى للبئر ..بس فيه حتة نتفة مفاجأه فى هذا الممر العجيب بجد دوختنى و خلتنى ألف حوالين نفسى و ما صدقتش عينيا .. بس الصوره ما بتكذبش ..

ده الممر الحجرى :

و دى المفاجأه .. تأملوا الصور كويس كده :

المفاجأه اللى أذهلتنى - للى مش واخد باله - أن جدران و سقف هذا الممر العجيب يمتلىء بالنقوش الفرعونيه على أحجاره !! و بعض هذه الأحجار وضعت مقلوبه و كذلك النقوش بالتالى مقلوبه !! يعنى كان الغرض هو اٍستعمال هذه الأحجار كخامات للبناء فقط !!

و لما أبديت دهشتى الشديده للراهب بيشوى من هذه الملحوظه اٍبتسم فى وداعه كعادته و قال :

- مش كتير اللى بياخدوا بالهم من الملاحظه دى .. فعلا غالبية أحجار الدير متاخده من معابد فرعونيه قام بفكها بناة الدير الأوائل اللى آمنوا بالمسيحيه لما بدأت تنتشر فى الصعيد و حاربوا الوثنيين اللى كانوا لسه بيعبدوا آلهة الفراعنه و سقط منهم شهداء لا حصر لهم و لما أنتصروا عليهم أستعملوا أحجار معابدهم فى بناء الأديره و الكنائس ..

أعربت له عن دهشتى من هذا الاٍكتشاف اللى بالنسبه ليا اٍكتشاف يعنى فقال ببساطه :

- لا ما تستغربش .. كتير أوى من بيوت الصعيد القديمه مبنيه بأحجار المعابد و القصور الفرعونيه .. ماتنساش أن المنطقه بتسبح فوق بحر من الآثار الفرعونيه اللى لسه الكتير منها لم يكتشف و الأهالى بيكتشفوه بطريقتهم !!

خدوا بالكم يكتشفوه بطريقتهم دى حتقودنا لبوست قائم بذاته عن ميراث الأجداد اللى شايفينه الأحفاد حق طبيعى لهم و لا دخل للحكومه فيه و بيع يا لطفى و اٍعرضى يا متاحف العالم قطع أثريه نادره لم تسجل أبدا فى دفاتر هيئة الآثار .. بس ما يبرد القلب قليلا بصراحه أن هذه القطع النادره على الأقل تعامل بالاٍحترام اللائق بها مش بتترمى فى مخازن لتنهب و لا فى العراء علشان كلاب السكك تعمل عليها بيبيه زى ما شفت بعينيا و أتقطع قلبى على ما آل اٍليه الحال ..

نرجع مرجوعنا للممر العجيب الموصل للبئر المهجور ..

فى نهاية الممر على الشمال يوجد البئر و هو مغطى بغطاء حديدى كبير و يطل على كشك بيع التذكارات القبطيه اللى قلت لكم عليه فى أول البوست و البئر أصلا موجود فيما يشبه الصاله المربعه المغطاه و على جدرانها توجد كوات كبيره بيضاوية الشكل .. أهو :

رجعنا تانى عبر الممر الحجرى العجيب لبهو الأعمده الخارجى .. و الراهب بيشوى كان بيستكمل سرده الشيق لتاريخ الدير و اللى تقريبا بيتطابق مع ما ورد ذكره فى اللينك اللى فى أول البوست عن تاريخ الدير ..

و لما طلبت منه أزور القلالى ( جمع قلايه ) الخاصه بالرهبان و هو المكان المخصص لكل راهب للقراءه و الصلاه و التأمل اٍعتذر فى لطف و الحقيقه ما حاولتش أسأله هل ده بسبب قوانين خاصه بالرهبنه و لا لأنى مسلم علشان ما أحرجوش ..

سألته عن طبيعة حياته قبل ما ينخرط فى سلك الرهبنه فأجابنى فى اٍقتضاب :

- كنت بأشتغل فى سلك النيابه ..

متهيألى كده و الله و رسوله أعلم أنه كان وكيل نيابه .. و ما حبتش برضو أسأله عن صحة ذلك ..

اٍقتربت الزياره من نهايتها بعد ما قضيت حوالى 3 ساعات ضيف على الدير الأبيض و فى صحبة الراهب بيشوى الهادىء الوديع المثقف اللطيف دائم الاٍبتسام ..

و وصلنا عند الباب الخارجى للدير و بجوار كشك بيع التذكارات لفت نظرى تانى حاجه فرعونى كده واضح أنها متاخده هيلا بيلا زى ما هى كده من معبد فرعونى و مش عارف أيه فايدتها فى الدير :

و كمان لاقيت نقش قديم جدا باللغه القبطيه كتبه أحد الرهبان كتمجيد فى الله و قد بدأ فى التآكل للأسف الشديد كمعظم النقوش الحجريه البديعه اللى بتزين أسوار الدير بسبب الاٍهمال الشديد و عوامل الزمن .. و قد قدر الراهب بيشوى عمر هذه الكتابه بحوالى 1000 سنه !! أهيه :

و بالمره بقى لفت نظرى اٍعلان عن شريط اٍسمه فى اٍيديك حمايتى بيباع فى كشك التذكارات به ترانيم قبطيه للمنشده فاديا بزى ( هى اٍسمها كده ) :

و لما حان وقت الرحيل شددت على يد الراهب بيشوى مصافحا و شكرته بجد من قلبى على تعبه معايا و على الوقت الطويل اللى قضيته بصحبته فأبتسم كالعاده فى وداعه و دعانى للزياره مره تانيه فشكرته تانى و قلت له :

- اٍن شاء الله فى أقرب فرصه .. السلام عليكم ..

رد برضو باٍبتسامه :

- و عليكم السلام و رحمة الله مع ألف سلامه ..

غادرنا الدير .. و سرحت شويه و أنا أتأمل فى المنطقه المحيطه و أسأل نفسى كم من أحداث جسام شهدتها هذه المنطقه لما بدأت العقيده المسيحيه فى الاٍنتشار فى هذه البقعه و كم اٍصطدمت و تطاحنت بعقيدة المصريين الوثنيه و كم من نفوس أزهقت من الطرفين دفاعا عن العقيده بغض النظر عن ماهية هذه العقيده .. المصريين متدينين بطبعهم و بفطرتهم سواء كانوا وثنيين أو مسيحيين أو مسلمين و المصرى لا ملجأ و لا ملاذ له سوى الله فى حالة يسره أو عسره .. هو كده .. و يبدو أن ده شىء بيجرى فى دماء المصريين و موجود فى جيناتهم منذ بدء الخليقه ..

فى طريق العوده و قد بدأت الشمس فى المغيب لاحظت وجود مكثف للأمن فى كل الطرق .. و لما أستفسرت من أبو اٍسلام عن السبب قال :

- من يوم اللى جرى فى الشارونيه لما الناس جامت على بيوت البهائيين و حرجتها بالجاز و الحكومه مشدده جوى ..

- طيب شد حيلك شويه يا أبو اٍسلام عاوزين نوصل المركب قبل العشاء ..

أصل بينى و بينكم كنت عاوز ألحق حفلة عيد ميلاد الأستاذ نور الشريف من أولها .. و قد كان .. و ده بقى موضوع البوست القادم باٍذن الله حيث ستشاهدوا كليبات حصريه بجد بجد ستدهشكم :)

و تقبلوا شكرى و تحياتى ..

من الصعيد الجوانى .. (2) جباطنة النيل و حكاويهم !!

2009-05-06T14:09:00.008+03:00

مساء الخير ..

بينى و بين البحر و المراكب عشق و هوى قديم ..

يمكن ده بيرجع لنشأتى منذ طفولتى فى مدينة الجزائر العاصمه اللى هى مدينه ساحليه من أجمل و أرقى المدن الساحليه فى العالم على حسب رأيى المتواضع ..

و يشاء المولى أن تكون فترة دراستى الجامعيه فى مدينة الاٍسكندريه حيث تبلور و تعمق حبى للبحر و عشقى للمراكب اللى كنت بأهوى متابعتها و اٍبحارها و عودتها محمله بالخير بالقرب من القلعه فى بحرى ..

و حتى لما ربنا فتح عليا من حيث أدرى و من حيث لا أدرى كانت فكرة اٍمتلاك يخت تراودنى و تقض مضجعى حتى توكلت على الله و بدأت فى بناء يخت رائع بدورين و طوله 22 متر عند الحاج صلاح السمبوسكانى أشهر صانع يخوت فى العالم و ورشته فى مدينة عزبة البرج .. و كان حلمى أن أطوف بحار العالم من شرقها لغربها على ظهر هذا اليخت و لكن للأسف تحطم هذا الحلم على صخرة الاٍرهاب اللى ضرب الأقصر من كام سنه كده و سحب البنك حصته فى تمويل بناء اليخت و ذهبت هذه الأمنيه أدراج الكازوزه ..

و لكن ده لم يوقف عشقى لحياة البحر و الحياه فوق سطح المراكب ..

و خضت تجربة تعلم الاٍبحار و قيادة اليخوت على يد الكابتن خالد الحنينى صاحب و قائد اليخت جنوه ستار اللى لما أطمأن لقدرتى على الاٍبحار السليم الآمن سابنى أقوم لوحدى بعدة رحلات باليخت و على متنه عدد كبير من السائحين هواة الغطس فى مياه الغردقه .. و كانت تجربه لذيذه أوى :)

و ما أنساش كمان يخت الغطس الرائع الفارس المينا اللى قضيت عليه فتره لا تنسى من حياتى برضو فى الغردقه و بدون مقابل و الله و لكن حبا فى حياة البحر ليس اٍلا .. و ضرغام 1 و 2 فى شرم الشيخ اللى كانوا أصحابهم دمايطه على منايفه (نمايه صغنونه على الماشى من غيظى منهم) و كانوا بيسيبوا طاقم المركب من غير أكل معتمدين على الصيد من البحر علشان ياكلوا لحد ما أتبهدلوا و بقوا مظهرهم كالقراصنه العتاه ..

عشقى للبحر و المراكب لم تنطفىء جذوته بداخلى أبدا ..

حتى بعدما وهن العظم منى و أشتعل الرأس شيبا لسه بأشتاق لشعور لحظة الاٍبحار و لشعور لحظة الرسو على الأرض بعد الغياب ..

فى رحلة الصعيد ..

سعيت للتعرف على كابتن الفندق العائم سوبك .. و بعد محاولات و مراسيل بينى و بينه وافق على مغادرة كابينة القياده اللى لا يفارقها أبدا و اللى ممنوع منعا باتا صارما على أى مخلوق كائنا من كان أن يخطو عتبتها سوى الكابتن و مساعده و دى أوامر صارمه ليس فيها شبهة هزار ..

أنتظرته على سطح المركب بجوار حمام السباحه و قد صار مكانى المفضل :)

و فوجئت برجل صعيدى مهيب يرتدى الزى الصعيدى و يسير كفرعون خرج لتوه من جداريه مصريه قديمه !!

الباشريس عبد الرحيم على اليمين و الريس على قبطان المركب سوبك

بعد السلام و الترحيبات عرفته بنفسى و عرفنى بنفسه بلهجه صعيديه قحه لا تخلو من الزهو : أنا الريس على قبطان سوبك و الأميره ..

- ................ ؟

- بقالى أكتر من 45 سنه بأبحر فى النيل يا ولد عمى من بحرييه لجبليه .. بدأتها مع أبوى الله يرحمه على مركب شراعى و غويت البحريه و الفرجه على النجوم بالليل لما بجيت أتكعبل لما أمشى على البر !! حفظته شبر شبر بجزايره بهيشه بشحطاته لمن بجيت ريس مركب شراعى كد الدنيا ..

- ................ ؟

- من المنيا يا بو خالو .. و كل رويس بواخر النيل من المنيا .. و أيوه متجوز و عندى ربنا يعطيك 6 رجاله و بت .. عأجضى على الباخره وجت كبير يمكن شهور فى وجت الموسم و أكل العيش أكده ..

- ............... ؟

يسرح لبعيد بعينيه و يقول :

- طبعا عأحن للبيت و العيال و المره بس الباخره بجت بيتى و الطاجم بجوا عيالى و الركاب ضيوفى و كلو متسطر ع الجبين ..

- ............... ؟

- الفرج بينى و بين كابتن مركب البحر المالح كبير جوى جوى .. أنا عأمشى بالليل ع النجوم و الجمر و هو بيمشى ليل و نهار ع البوصله و الجهاز (قصده جهاز تحديد الأماكن بالقمر الصناعى) .. و أنا طول الرحله بأبجى صاحى و حافظ خط سير المركب لتشحط و لا تخش بين الجزاير و أبجى خربت الدنيا .. ده غير الهيش و ورد النيل اللى لو دخل ع الرفاص يبجى جول على المواتير يا رحمان يا رحيم .. حج ربنا يا أستاذ ريس النيل أشطر من ريس المالح .. طب جيب اٍكده ريس مالح و جوله عدى من هويس جنا (قنا) يمين بالله العظيم ليطربج المركب باللى فيها !!

- .............. ؟

- لع ما تفرجش معايا كتير ريح و لا موج .. موج النيل حنين على المركب زى يد المره الحنينه اللى تملس على يد راجلها الخشنه المشججه !! بس اللى بأعمله ألف حساب دوامات الهويس اللى لو الريس أستهون بيها ممكن تلفلف منه البوز و تبجى مصيبه .. دوامات النيل لازم الريس يجف لها على حيله و هو بيعديها و يحترمها و ما يستهونش بيها واصل ..

عند هذه النقطه أنضم لنا رجل صعيدى كبير فى السن تبدو عليه المكانه المرموقه و وقف الريس على اٍحتراما و سلم عليه بتوقير شديد و قدمه لى :

- الباشريس عبد الرحيم .. كبير جباطنة النيل ..

سلمت عليه بمزيد من الاٍحترام فرضه هذا اللقب الكبير : كبير جباطنة النيل !!

يعنى ده أكيد حاجه كبيره بقى .. (قلت كده فى عقل بالى)

- ............. ؟

قال الباشريس عبد الرحيم :

- طبيعة شغلى يا أستاذ أنى أجدم ريس فى النيل بحاله من شماله لجنوبه .. و عأفتش على المراكب التابعه للشركه و عأنظم الأجازات و ساعات الشغل للطواجم .. شغلانه صعبه و الله يا ولدى و كلها مشاكل و مسئوليات كبيره جوى جوى بس ربك المعين ..

- ............ ؟

- المركب دى بحوالى 15 مليون جنيه .. و فيها 3 مواتير الواحد منيهم بمليون و نص و كل ده مسئولية الريس و بيمضى على اٍستلامها سليمه و شغاله تمام و بيبجى مسئول عن كل كبيره و صغيره فيها و لو خرب فيها حتى لوح جزاز بيبجى هو المسئول عنه ..

- ............ ؟

يجاوب الريس على :

- لما بيبجى معانا سواح أجانب فى رحلات طويله أسبوع و لا 3 تيام بيطلبوا يجابلوا الجبطان .. و بيتفاجئوا لما بيلاجوه راجل صعيدى بالجلابيه و العمه و بيتصوروا معانا و بيبجوا فرحانين جوى بالزات الحريمات !!

يضحك و يقاطعه الباشريس عبد الرحيم بلهجه ذات مغزى :

- فاكر يا ريس على المره الخوجايه اٍياها ؟؟

يجيبه الريس على ببراءه :

- مين فيهم يا باشريس ؟؟

- ............. ؟

سرح الباشريس بعينيه لبعيد شويه و قال بلهجه لا تخلو من السخريه :

- عبد الناصر الله يرحمه حاول يعملها .. و جاب رجاله بحريه بالبدل البيضا و الكابات علشان يسوجوا مراكب النيل جال أيه علشان يبجى مظهرهم مشرف جدام السواح الأجانب .. بس البحاروه ما سلكوش مع النيل و جالو حجنا برجابينا و رجعوا تانى ع المالح و ماشفنهمش بعد اٍكده ..

- ............. ؟

- الأول كان فيه رحلات مراكب بتجوم من مصر (القاهره يعنى) لمن لحد أسوان .. بس جه وجت كان الاٍرهابيين بيصطادوا المراكب عند أسيوط و يضربوا عليها نار و يداروا فى الجبل زى الحريمات فوجفوا الرحلات دى و بجت الرحلات تجوم من الأجصر (الأقصر) لأسوان و تحت حمايه شديده جوى ماتخرش المى ..

- ............ ؟

قالوا ألتنين فى نفس واحد :)

- الجبض جليل و الله يا أستاذ حكمن الموسم نايم و السياحه مش كد اٍكده .. أنا اللى اٍسمى باشريس النيل جبضى ما يعديش الألفين جنيه !!

- لع يا باشريس جبضك ألفين و تلتمية جنيه ..

- لع يا ريس على جبضى 1900 جنيه ..

- لع يا باشريس و عليا اليمين جبضك ألفين و تلتميت جنيه و أنى اللى جبضى 1800 جنيه !!

- جولتلك لع يا على و ما تعارضنيش واصل ..

أوباااااااا وقعوا فى بعض .. و العرق الصعيدى طج يا بوى و أبتدت رجابيهم تتنفخ ماعرفش كيف فقلت و أنا بأضحك علشان ألطف الجو بعد ما أتكهرب فى ثوانى :

- ما تطلبوا لنا شوية شاى حبر نعدل دماغنا بيها و صلوا على النبى كده ..

سكت الأتنين عن المناقره و قال لى الباشريس عبد الرحيم و على وجهه اٍبتسامه مشرقه و قد تبدلت حالة الغضب عنده فى ثانيه ككل أهل الصعيد :

- لع .. جبل الشاى الحبر لازمن ناكلو لجمه الاول .. أكل المراكب ده ما ينفعش معانا .. اٍحنا دابحين جدى و عاملين عليه فته و ملوخيه .. جوم معانا و يبجى عيش و ملح ..

أعتذرت له فى لطف لأرتباطى بميعاد زياره لأحد الأديره الأثريه فى حضن الجبل الشرقى فتبدلت وجوهم تانى فى ثانيه و فوجئت بالريس على يقول غضبان :

- طب و عليا اليمين يا أستاز لازم تاكل معانا عيش و ملح بلا دير بلا غيره .. أتغدى معانا الأول أكل بيتى و بعدين روح ميعادك !!

و لم أجد فكاكا من عزومتهم و الحقيقه أن أكل فنادق ال5 نجوم ماكنش جاى على هوايا أوى يعنى برغم جودته و كمياته المهوله فبريت نفسى بحتتين نيفه و طبق فته معمول بالعيش الشمسى الصعيدى و اٍحنا التلاته قاعدين على مقدمة المركب فى الحته الشهيره بتاعت صورة اٍعلان فيلم تيتانيك :))

و بعد الغدا و الشاى الحبر جه أبو اٍسلام السواق بالعربيه ليصحبنى فى رحله خرافيه قد لا تتكرر فى الحياه مرتين للدير الأبيض القابع فى هدوء و سكينه لا نهائيه فى حضن الجبل الشرقى حيث شاهدت بعينى ما كنت لا أصدقه أبدا و حيث قضيت ساعات مع الراهب بيشوى اللى لا يمكن أن ينسى أبدا .. و ده موضوع البوست القادم ..

و تقبلوا شكرى و تقديرى ..